Arquílocu

Dendi Güiquipeya

En griegu, Ἀρχίλοχος. Sordau i cantautol hóniu, pioneru la lírica griega arcaica.

[eital] Via

Son poquinus los endirguis concernientis a la via desti antíguu pueta, la huerça dellus proceentis de los sus própius testus. Tuvu nacéncia ena isla cicládica Paru, en prenu mari Eheu nel 680 e. C. Su pairi hue Telesicli, nobri hóniu, i su mairi una escrava trácia. La su família bia participau ena colonización de Tasu, isla rica en oru al norti el Eheu, hunta las costas trácias, bicha velallí desarrollá pol agúriu délficu.

Hurgau pola probécia i, quiziá tamién, pol charabascas con quien le prometió a su iha en casamientu, Licambi, sigún s’entrivé enas sus cancionis (88, 90), dehuyó de Paru i s’enroó enos runchaerus contra los trácius cumu sordau réziu i entelihenti (6). Esti sedria el ofíciu que le sustentó (2). En trebahandu cumu mercenáriu pa Tasu i pal mari Negru, tuvu mu mala canuhia i la poca chamba le llevó a guarreal enas sus cancionis a los compañerus (79, 67b) i hata, velaí, a la própia isla (18, 54).

Contra el que huera piu sel el su suegru, Licambi, i contra su iha tamién pegó levantihus. A lo vistu enas sus cancionis, Licambi le bia prometiu a Arquílocu en matrimoñu a su iha Neobuli, peru a la final se desaculó. El ton aguarreanti dessas cancionis i la sonaha que cobró la família nel su tiempu hizun a pairi i iha suicidalsi.

Arquílocu murió al reol el 640 u el 645.

[eital] Obra

Arquílocu hue frutu el su tiempu. Los menumentalis puemas épicus perdierun emportáncia anti una mentaliá coscienti del chambu los valoris i la demuación el pensamientu inescapás d’acetal ena via cotidiana los princípius oméricus. S’estilaba la canción lihera con motivu celebración en furrionas, fiestas localis i otrus rehuihus, assinque la puesia alquiria un holmatu brevi. Arquílocu cautivó destintus hénirus de la canción lírica, dendi el yambu a la elehia, passandu pol pie trocaicu, escrebieru balburdosu que sigrus endispués siguiria Oráciu.

De la su produción, nu se conselvan puemas enterus, sinu apeninas unus quantinus de velsus siguius u cachinus dellus. Escrebió en dialeutu hóniu, anque dominaba tamién la luenga trácia. El su estilu s’ascrebi al arcaicu, con periodus cortinus i gustu polas opusicionis, nuna luenga crara de sintassi simpri.

[eital] Bibliografia

• Fränkel H., Poesía y filosofía de la Grecia Arcaica, trad. Ricardo Sánchez Ortiz de Urbina, Visor, Mairil, 1993.