Autupista
Dendi Güiquipeya
Una autupista es una via e circulación de veículus terrestris de cargación i autumóvilis; es lihera, tiini gran seguráncia i permiti la circulación d´un volumin de tráficu consierabri, con una seri e caraterísticas que la deferencian d´una carretera convencional. Las primeras vias costruias con esta confeguración se hizierun en Alemaña duranti los añus trenta.
Pa puel sel calificá cumu autupista, una via e circulación ebi tenel las siguientis caraterísticas:
- Dos bandas de circulación, una pa cá sintiu, separás entri sí pol una franha ancha e terrenu u pol vallas de proteción.
- Al menus dos carrilis de circulación en cá banda.
- Arcenis lateralis en cá banda, pa que un veículu puea tenelsi en chascu d´emelhencia sin ostaculizal el tráficu.
- Curvas pocu prenunciás pa que los veículus nu tengan que bahal la velociá al circulal pol ellas.
- Ausencia e crucis a nivel, que se resuelvin meyanti pasus superioris u inferioris.
- Entrás i salias con carrilis, separaus de los prencipalis, de desaceleración i d´aceleración pa que los veículus que salin u entran ena autupista chambin la su velociá huera d´ella.
- Las salias i entrás están asiahás casi siempri nel lau derechu el sintiu la marcha, ya qu´el carril gochu es el d´adelantamientu i, polo tantu, el mas liheru.
- El acesu a los enmuebris colindantis cola autupista nu se hazi diretamenti endi la mesma, a nu sel que se gastin entrás i salias cumu las descrebias anteriolmenti. Enas zonas urbanas es normal la desistencia e callis paralelas asiahás a cá lau, hucheás "vias de serviciu" u "coletoras", que permitin el acesu a los enmuebris que limitan cola autupista sin pertulbal el tránsitu ena mesma.
