Cueva el Boquiqui
La Cueva el Boquiqui está assitiá a 580 metrus sobri el nivel del mari, entri berrocalis de los montis de Traslasierra, pretenecientis a la Sierra e Greus. S'alcuentra ena umbria la hesa e Valcorcheru, nel parahi conociu cumu Era la Guihosa, assitiau enas cercanias la ciá e Praséncia. Mas que duna cueva se trata dun abrigu graníticu, compuestu pol una estáncia mas u menus ampria nel acesu prencipal i dun ampriu correol que conduci a otra entrá.
Enos alreoris de la cueva desistin albondus restus prestóricus qu'án siu sistemáticamenti espoliaus, i tal vezi una necrópolis. Amás, enas sus prosimiais s'á alcuentrau una crasi e cerámica catalogá bien cumu neulítica pol angunus estoriaoris, u bien cumu pretenecienti a la eá el bronci pol otrus. Esta cerámica tiini una decoración caraterística a la qu'á dau nombri, siendu conocia cumu cerámica e boquiqui.
La cueva ebi el su nombri al ensulhenti carlista Mariano Ceferino del Pozo, llamau Boquiqui, que se refuhió nella en várias ocasionis, la primera duranti el triéniu liberal, i la segundera en 1834, duranti la Primel Guerra Carlista. Ena nochi el 5 al 6 de Marçu d'esti añu hue apresau ena cueva con otrus miembrus la su partia, entri los que s'alcuentraba la su própia esposa.
Una tupa pubricacionis s'án centrau ena cueva endi qu'en 1873 Vicente Paredes Guillén la diera a conocel. A prencipius del sigru XX, Pedro García Faria, un enhenieru, escava la cueva i envia parti las cerámicas a Pere Bosch i Gimpera, quien las estuya, pubricandu los resurtaus. Posterioris labutus de Cleofé Rivero de la Higuera dierun a conocel un alabán de cerámicas arrecuperás en prospeción, i recientimenti es Martín Almagro-Gorbea quien escava nel su enteriol en 1970. Dendi altonci s'án pubricau angunas revisionis del yacimientu, chegandu a la conclusión de que la cueva hue ocupá en dos momentus distintus del Neolíticu Antigu i el Bronci Final.
Los restus s'alcuentran repartius entri el Museu e Caçris, el Museu Arqueolóhicu Nacional i Museu de Arqueologia de Catalunya en Barcelona, inque solu están espuestus al púbricu nel Museu e Caçris.
[eital] Atijus
Ayuntamientu e Praséncia (Ruta a la Cueva el Boquiqui)
