Estesícoru

Dendi Güiquipeya

Estesícoru (en griegu Στησίχορoς) hue un cantautol griegu el sigru VI e. C.

Via[Edital | Editá'l códigu]

El su nombri de verdá era Tísia, Estesícoru era un moti pola su albeliá derihiendu corus. Gaspaleó pal sigru VI e. C. en Sicília i Sul d’Itália. Son mu poquinus los datus que se tien dél. El artículu la Suda lo has ihu d’Uforbu, Ufemu u, sigún otrus, d’Uclidi, Ietu u Esíodu, lo qual demuestra el pocu alcuerdu qu’abia. Ubu dos helmanus, Elianati i Mamertinu, lehislaol i matemáticu —siguru pitagóricu— al respetivi.

Las huentis[1] polo heneral endican qu'era de la ciá siciliana de Ímera, puebrá con colonus hónius i dórius. La própia Suda asseñala qu'otrus crein sel de las Mataurias, nel continenti, hundá polos lócrius. Seya cumu seya, Estesícoru tuvu relación conas dos ciais.

S'eicó professionalmi al canti i a la música, compusiendu pol encargu u cantandu enas fiestas. Trebahal lo bichó en Ímera quasi que tol tiempu, anque se conoci que se movió polas colónias griegas en Itália i qu’enclusu aballó pa Grécia, andi participaria en certámin puéticus i enas prencipalis fiestas localis, cumu las d’Esparta. Se cuenta que, cumu escrebió un puema contra Elena, a la que los espartanus tinian pol diosa, se queó ciegu i que pa enmendalu, escrebió la Palinodia a la mesma, ena que has alabáncia. Assina arrecuperó la vista. El atihu con ciertas ciais i el su papel social hizu qu'andara en política. Enos sus testus mienta cúmu convenció a los de Ímera paque premitieran que Falari se hiziera tiranu la ciá.

Obra[Edital | Editá'l códigu]

Hue unu los cantautoris mas prolíficus la Antigüeá. Los alehandrinus eitarun 26 librus puemas suyus i tamién hue mu mentau enas obras los antíguus, polo que se conselvan, hunta las hallauras papirácias, muchus framentus. Namás se sabi que lo estuyara monograficamenti Cameleonti, de la escuela peripatética. Estesícoru hue el gran difusol la lírica coral rescrebiendu sobri temas crássicus de la mitolohia i épica omérica, assín cumu temas tradicionalis las curturas dórias, hónicas i tamién própias los lócrius (polo que se l'atihaba cona colónia lócria las Mataurias).

Los sus puemas tratan sobri los ciclus tebanus, leyendas tessálias, etólias i albarcan temática omérica i posomérica, cumu retornus, la estruición Troya, Elena, ec. La su ficáncia anti el testu oméricu has que lo imiti con angunas variacionis paí —mas que ná, polas dessihéncias el metru—, enclusu llegandu a quasi la cópia. En tratandu mitus i temas popularis, Estesícoru consiguió gran nombreria ena Antigüeá.

Abreviaturas[Edital | Editá'l códigu]

Esti autol alcibi l'abreviatura Stesich. procedenti del su nombri latinizau Stesichorus.

Huentis[Edital | Editá'l códigu]

  1. Pl. Phdr. 243; Cic. Verr. II 2. 87

Bibliografia[Edital | Editá'l códigu]

  • Safo-Poetas arcaicos, Lírica, entrod., trad. i notas P. Rodríguez Adrados, Gredos, Mairil, 1982.
  • Liddell H., G., Scott R., A Greek-English Lexicon, Oxford, 1996.
  • VV. AA., Antología de la poesía lírica griega, entrod. i trad., Alianza, Mairil, 2001.