Gorropéndola
La gorropéndola europea[1] u oriol (Oriolus oriolus) es una especii d'avi paseriformi d'aprosimámenti unus 25 cm, de la familia Oriolidae. Vivi enas regionis temprás 'el hemisferiu norti. Pasa el hivielnu pa lus trópicus, diendu dispuesinu en migración pa Europa y Orienti Meyu a pasal el veranu. El su nombri científicu provieni 'el latín aurum, «doráu», «avi d'oru».
Es una avi ispierta abondu y ajuyióra, de vuelus cortinus y velocis. Suelin escuendelsi entri los árbulis en cuantis sientin presencia d'humanus. Enas sus migracionis puéin jadel vuelus a grandi altura. El su prumaji colol d'oru, ligeramenti verdosu, la premiti mimetizalsi perfeutamenti enus destellus solaris n'el follaji. Jadi los sus ñíus con verdaera estreza y en mu poquinu tiempu, habitualmenti en bosquis renti arroyinus u ríus. Estus ñíus son auténticas obras d'arti: a'specii cestus (jechus con pastu, lana, cachinus corteza, restus de tejíu etc.) en arrecolgajaeru d'una rama con un buraquinu, pa rejuyil al másimu posibris ataquis de depredaóris. Suelin jadel una poniúra de tres a cincu güevus, de mayu a juñu, incubáus po-la jembra. Los pollinus premanecin n'el ñíu una mijina más d' un pal de semanas. Son monógamus, territorialis y migratorius. Destaca pol el su esquisitu cantu. Emprecipia con un arruyíu rúsperu, apaecíu al ruíu el arrendaju p'acontinal con silbíus tan melodiosus asina la mesma frauta. Suelin consideralsi, enas culturas de diversus puebrus, comu pajarus que train ventura y suerti.
Características[Edital | Editá'l códigu]
Machu. Característicu con cuerpu de prumaji amarillu doráu, con ala y cola colol negru.
Jembra. Apaecía al machu. Las partis superioris son colol verdi amarillosu, y las partis ventralis colol branquecinu con rayinas escuras. Solamenti tieni colol amarillu brillanti renti el anu. Tieni patas colol gris azuláu, picu coloráu escuru y el iris coloráu brillanti. El picu y el iris de las jembras mas nuevinas son colol tirandu a pardu.
Alimentación[Edital | Editá'l códigu]
El su alimentu, es prencipalmenti a basi d'invertebráus (cocus, mariposas, molgañus, moluscus etc.) y frutus.
Referencias[Edital | Editá'l códigu]
- ↑ Bernis, F; De Juana, E; Del Hoyo, J; Fernández-Cruz, M; Ferrer, X; Sáez-Royuela, R; Sargatal, J (2009).