Juvenal

Dendi Güiquipeya
Sartal a: Güiquipeandu, Landeal
Empostura máscara sátiru, debuju la eición J. Dryden las Sátiras.

Juvenal (en latín Decimus Iunius Iuuenalis, [ˈdɛkɪmʊs ˈjuːnɪʊs jʊwɛˈnaːlɪs]) hue un escrebiol latinu los sigrus I-II, autol las Saturae, en cincu librus. Junta Pérsiu, Marcial, Oráciu i Lucíliu, unu los mijoris satíricus la Antigüeá.

Via[eital | edit source]

Poquinas son las enteracionis tocantis a la via Juvenal. Comu muchus autoris la Antigüeá, los endirguis pa puel escrebil la su biografia son espigaus dangunas notas la su própia obra u referéncias posterioris. Apeninas se cuenta con una Vita Iuuenalis tardia i de juru pocu fiel.

Los datus que se conocin de ciertu namás valin pa assitialu nel tiempu i nel espáciu. Nació pa metá la décaa los 50 ed. C. nel monicípiu d’Aquinu. Quiziá tuvu nacéncia nuna família puyenti, lo suficienti comu pa puel costeali la ensiñáncia básica enas escuelas retólica. Las biografias tradicionalis lo atijan a Quintilianu i a Marcial, ijiendu sel discípulu del primeru i colláciu el segundu. Juvenal conoció el final la epoca de mayol decaimientu con el emperaol Nerón i la epoca repressión los Flávius.

Pol mó las letras llegó a mercal un cortijinu pa Tíburi (anguañu Tívoli), de mó que raceaba pa Roma i en ves en quandu se arretiraba al campu en Tíburi.

Angunus datus, no mu certerus, assiguran qu’anduvu pa Egitu, de huitiva u quiziá de viagi. Comentaristas paí se sostriban ena descrición que has nuna las sus sátiras[1], andi relata un chascu canibalismu.

Murió nel 130.

Obra[eital | edit source]

Queó escrita Juvenal una las obras que mijol á tratau la estória la literatura, las Saturae “Sátiras”. La espubricó en cincu librus en destintus añus i ya en periodu tardiu, embaju el empériu Trajanu i Adrianu. Las obras correspondin a un géniru genuinu romanu, que es la sátira, pol mé la qual se esponia en essámetrus un retratu la socieá i los sus pressonagis con el fin de critical los vícius i cebiquis.

El primel libru sátiras lo espubricó nel 110 i albarca las cincu primeras pieças. La primel sátira possei caraiti pogramáticu andi espón los motivus pol mó los qualis escrebi sátira. El prencipal dellus es la indinación que le prevoca la socieá el su tiempu, tó pol tó corruta i emputecia. Pa ellu se sostriba en tradición satírica que encetó Lucíliu en tiempus repubricanus. Las sátiras mas hirientis i endañosas se hallan entri esti libru i el segundu. Es andi trunfa mas el sintimientu rabiñosu que la holma, de mois que se hallan los sus escritus mas vivus i refortius.

El segundu libru lo sacó seis añus mas tardi, nel 116, tovia quandu Trajanu. Nél se halla la su sátira mas conocia, contra las mujeris.

El libru terceru lo sacó enos primerus añus el empériu Adrianu, entri los añus 113 i 121. Abemus tres sátiras desti libru (VII-IX).

La fecha espubricación el quartu los librus se inora, anque no sedria mu tardinu, de que sacó el terceru, quiziá pal 124.

El quintu libru, cuyu úrtimu puema XVI se halla chengu, a lo mijol pol espetalsili la muerti, huendu velequí l’úrtimu velsu:

Cquote1.png ut laeti phaleris omnes et torquibus, omnes[2]

que alegris tós con chapas i recolgantis, tós.

Cquote2.png
'

La su obra queó orviá pol dos sigrus i, pol tantu, el autol tamién. A partil el sigru IV escomençó a cobral enterés i alogu, en tola Eá Meya se gastó comu muelu pa critical los cebiquis el ombri.

Abreviaturas[eital | edit source]

Sigún el dicionáriu Oxford, esti autol tien la abreviatura Juv.

Referéncias[eital | edit source]

  1. XV 27 i deso.
  2. Saturae, XVI 60

Bibliografia[eital | edit source]

  • Juvenal. Persio. Sátiras, entrod. R. Cortés Tovar, trad. M. Balasch, Mairil, Gredos, 1982.
  • VV., Oxford Latin Dictionary, Oxford, Clarendon Press, 1968.

Atijus[eital | edit source]


Sátira latina

Menipu  · Lucíliu  · Oráciu  · Séneca  · Juvenal  · Pérsiu

Guipal mas endirguis al tentu...