Los Barruecus
 Esti artícalu no tien huentis ni referencias |
 Nesta página se gasta una ortografía destinta ala que normalmenti se gasta ena Güiquipedia. |
El parahi natural de Los Barruecus hue declarau Monumentu Natural pola Hunta d'Estremaura en hebreru e 1996, una nueva figura legal que garantizaba la proteción d'esti espaciu con el ohetivu e preservalu palas heneracionis huturas. Pa hustifical l'aplicación d'esti réhimin de proteción n'esti entornu se dierun numerosas razonis de gran pesu, en relación a l'emportancia de la heolohia, la fauna i la frora de la zona, asín cumu e los restus arqueolóhicus qu'atestiguan una continua presencia umana ena rehión. Esti reconocimientu oficial hue ebiu en gran miía a la repercusión mediática que heneró el proyetu el Museu Vostell Malpartia, que hue promoviu i assitiau en esus terrenus pol el artista alemán afincau en Estremaura Wolf Vostell, una e las figuras mas destacás el movimientu “Fluxus”.
Los Barruecus s'alcuentran a unus 14 kilómetrus de Caçris, nel términu municipal de Malpartia e Caçris, aprosimadamenti 3 kilómetrus al sul el núcleu urbanu. Se acei endi Caçris pola carretera EX-521 hata Malpartia, ondi el desviu a Los Barruecus, ya está señalizau.
Paisahi[Edital | Editá'l códigu]
El perfil i la configuración el paisahi son singularis i evocaoris. Las grandis masas de granitu s'an degradau pogresivamenti a lo largu e millonis d'añus pa dal orihin a unas hormas monolíticas globularis hucheás “bolus”, verdaeras esculturas moldeás pola manu e la naturaleza, qu'an recibiu nombris cumu “la Seta” u “las Peñas del Tesoro” (las Cimerias el tesoru). Riu Salol es la prencipal arteria fluvial, i el su represamientu en deferentis epocas á posibilitau la creación d'una seri e charcas. Entri ellas s'alcuentra la conocia cumu el Barruecu d'Abahu, en cuya orilla s'assitia el antigu “Lavadero de Lanas” (Lavaeru e Lanas), que uguañoti costituyi el Museu Vostell. El Lavaeru es un eificiu costruiu nel sigru XVIII pa contenel l'endustria lanal el lugal. Con esti fin s'aprovechun las estruturas d'unus molinus harinerus predesistentis. En 1988, el conhuntu hue declarau “Bien d'enterés curtural i Sitiu estóricu" pola Junta d'Estremaúra. Sabulugal paradimáticu e la arqueologia preendustrial i citau nel su momentu pol estudiosus comu Pascual Madoz, Antonio Ponz u Juan Agustín Ceán Bermúdez, esperimentó un procesu d'ampliación ebiu al aumentu e l'endustria a la que se eicaba a lo largu el sigru XIX, pa aluspués sufril el abaldonu i la ruina duranti el sigru XX. Estaba hormá pol varius molinus, un batán, el lavaeru, oficinas, ependencias, una ermita chiquenina i la charca, esencial pal procesu e lavancia e la lana. La su arquitetura se organiza a partil de la pares de la charca, endi onda esmienzan una seri e navis u espacius aboveaus que uguañoti conservan los nombris de las antiguas hunciones a las que estaban eicaus, cumu el esquileu, pesahi, calderas... Estus espacius se sostienin medianti arquerias hormás pol paramentus rústicus de ladrillu, preteneciendu tós estus rasgus a la arquitetura populal de la rehión. Cumu curiosiá, izil que los malpartieñus son mu aficionaus a pescal ena charca hucheá el Barruecu d'Abahu, ondi se caturan unus pecis, las tencas, mu apreciaus pol el su sabol i que se gastan cumu ingredienti prencipal d'angunus de los platus mas celebraus de la gastronumia local.
Las tencas nu son la única especi animal destacá de Los Barruecus. Pudrie consieralsi que la mas señalá d'esti ábitat es la cibueña branca, que á estableciu en él una e las colonias sobri roca mas emportantis a nivel Uropeu. Estas avis costruyin los sus nius sobri los bolus graníticus, prouciendu con ellu la imahin mas emblemática d'esti paisahi. Algotrus animalis que puebran la zona son nutrias, liebrus, lagartus ocelaus (el mayol de los lagartus ibéricus), tritonis, galápagus leprosus i varias especis de rapacis cumu el águila carzá i culebrera, milanu rial i negru u aguiluchu cenizu. En cuantu a la frora, en orihin mas arbolá, derivó a otra hormá ena su mayoria pol deferentis especis de matorralis (retamas, codesu) ebiu a las atividais agrarias i ganaeras nel ecosistema. Enas zonas úmeas, se puein visoreal tamién angunas especis de ranúnculus i orquídeas.
Arqueolohia[Edital | Editá'l códigu]
Son abondus los vestihius arqueolóhicus desistentis en Los Barruecus. Enas Peñas el Tesoru s'assitia un emportanti yacimientu preestóricu con varias de las etapas de la Preestoria e la rehión. Es mestel destacal que n'esti lugal s'an atopau las evidencias mas antiguas de proución agrícola d'Estremaura fechás hazi unus 7000 añus, nel Neolíticu. El lugal estuvu puebrau en etapas posterioris cumu el Calcolíticu u la Eá el Bronci. En relación con esti asentamientu, eberiamus cital un conhuntu e pinturas i grabaus rupestris, que se conhorman cumu unu e los núcleus d'arti rupestri postpaleolíticu mas enteresantis d'Esremaura. Pal sul s'assitia una emportanti necrópolis megalítica, la de Ihadilla (Hijadilla en castellanu).
D'epocas mas recientis s'an alcuentrau sillaris con escricionis i tehas, d'epoca romana, i tamién son conocius angunus enterramientus antropomorfus tallaus en roca, el periodu artumeyeval. Sumaus al antigu Lavaeru, el sigru XVIII, i a diversus molinus harinerus, tós estus restus costituyin un enteresanti rustru arqueolóhicu de la presencia i atividais umanas ena rehión.