Manuel Godoy

Dendi Güiquipeya
Sartal a: Güiquipeandu, Landeal
Manuel Godoy por Francisco de Goya.

Manuel Godoy y Álvarez de Faria (Baajós, 12 mayu de 1767 - París, 4 otubri de 1851) hue un nobli i políticu estremeñu, una las figuras mas destacás la estória d'España al escomiençu el sigru XIX.

Hue favoritu i primel menistru de Carlos IV entri 1792 i 1797, i nuevamenti de 1801 a 1808. Hue duqui l'Alcudia i de Sueca i Préncipi la Pas, pola negociacion la Pas de Basilea (1795).

De origin idalgu, hue elevau de holma meteórica al puel por Carlos IV, que le concedió títulus i onoris, le dotó duna gran riqueça i le confió los mas altus cargus el Estau, anti la encapaciá las camarillas cortesanas encabeçás polos condis de Floridablanca i Aranda pa hazel frenti a las turbulencias del momentu.

Estuvu a la cabeça el gobiernu d'España duranti la crisi uropea provocá pola Revolucion Francesa i las anbicionis de Napoleón Bonaparte, que acabó cona envasion francesa de 1808 i la Guerra de Endependencia, unus mesis endespues la caía de Carlos IV i el mesmu Godoy a causa el Motín d'Aranjuez. A lo largu el su valimientu, logró mantenel la situacion d'España anti el pueríu de Fráncia con una política esteriol pragmática -en tantu que algotras poténcias como Áustria, Prusia u Olanda eran derrotás i anessionás-, mentris qu'en el enteriol trató de lleval a cabu un programa reholmista ilustrau que generó una prohunda oposicion en albondu balburdas socialis, en especial entri la nobleça i el cleru.