Miliáriu

Dendi Güiquipeya
Sartal a: Güiquipeandu, Landeal

Un Miliariu u piera milial (el latín miliarius) es una coluna cilíndrica, oval u paralelepípea que s'assitiava nel ladu delas carzás romanas pa señalal el longol cá mil pasus, es dizil, cá milla romana, lo que equivali a un longol aprossimau de 1.450 metrus.

Normalmenti eran de granitu, con una basi cúbica u cuadrá, i media entri 2 i 4 metrus d´artu, con un diámetru d´entri 50 i 80 centímetrus.

Los primerus miliarius de que se tiini conocencia son el períodu final de la Repúbrica romana, peru la gran mayoria los conservaus huerun hechus bahu el Artu Imperiu, i, en menol midia, enus sigrus III i IV.

La mayol parti los miliarius llevaban escricionis grabás diretamenti, dependiendu e la emportancia e la carzá u de la cercania u alehamientu e Roma, u de las ciáis d´orihin i destinu. La escrición costaba siempri d´una seri e partis bien definias:

Miliariu e Nerón ena Vía e la Prata nel Municipium Cáparra, al Norti e Cazris

1º.- La titulatura completa el emperaol bahu cuyu mandatu se costruía u modificaba la carzá.

2º.- El longol hata Roma u la localiá mas emportanti e la via.

3º.- El gobernaol u la unidá melital responsabri e las obras ena carzá.

4º.- La espresión refecit u reparavit si se trataba d´una obra e mantenimientu e la via.

Nel sigru IV, los miliarius perdierun huncionaliá endicativa, trashormándusi nun elementu e propaganda política e los emperaoris.

Milliarium Aureum nel Foru Romanu, que servia e puntu d´encetu a las carzás romanas d´Italia.

Nel ocienti el Imperiu, los úrtimus milarius huerun realidaus en nombri e los coemperaoris Teodosio I, Honorio i Arcadio, i, colas invasiones bárbaras i la desintegración el Imperiu, cesarun de tallalsi al desapacel el mantenimientu e las carzás.

Ena parti oriental el Imperiu, acontinarun manteniéndusi las vias hata el sigru VI, inque los miliarius huerun golviéndusi cá vedi mas ralus hata ehal de sel fabricaus, ya que, al estal escrebius en latín, perdierun la su huncionaliá entri una puebración que solu palraba griegu, arameu u cotu.