Mou dóricu

Dendi Güiquipeya
Sartal a: Güiquipeandu, Landeal
Canadian Aboriginal Syllabics Example.svg Nesta páhina se gasta una ortografia destinta a la que normalmenti se gasta ena Güiquipeya.

Pol me una confusión hestórica, el mou dóricu pue tratalsi de dos diferentis mous musicalis u escalas diatónicas.

Mou Dóricu Griegu[eital | edit source]

El mou dóricu acibi el su nombri polos griegus dorius. En teoría musical griega estaba basáu nel tetracordu dóricu (sigún la telminología griega): una seri descendenti 'e dos intervalus dun tonu siguíus pol unu dun semitonu. Apricáu a una octava entera, el mou dóricu se costruía con dos tetracordus dóricus separáus pol un intervalu dun tonu. Estu es lo mesmu que tocal las tecras brancas del pianu (ascendiendu, cumu se cuentan uguañoti las escalas) de mi a mi: Mi-Fa-Sol-La-|-Si-Do-Re-Mi. Ponel el tonu que separa ambus tetracordus abaju la escala y ejal los dos tetracordus juntus produði el mou hipodóricu ("pol baju el dóricu"): La-|-Si-Do-Re-Mi-|-(Mi)-Fa-Sol-La. Ponel los dos tetracordus juntus y el tonu que los separa riba la escala produði el mou hiperdóricu ("pol cima el dóricu"), que es el mesmu qu'el mou locriu moelnu u meyeval.

Pa lial más las cosas, el mou dóricu griegu es el mesmu qu'el mou frigiu meyeval u el moelnu.

Mou dóricu medieval i moernu[eital | edit source]

La ilesia cristiana enos sus primerus tiempus crió un sistema con ochu mous musicalis que juerun relacionáus conos mous griegus antigus. En malinterpretandu los testus latinus de Boeciu, los mous meyevalis acibierun nombris de los antigus mous griegus de jolma incorrecta. Assina qu'ena música meyeval u moelna el mou dóricu es una escala diatónica que se correspondi conas tecras brancas del pianu tocás de Re a Re. Anque paji una escala mayol tocá a partil del segundu grau, el risurtáu tínu un sabol a escala menol, ya qu'el centru tonal passa al Re y el intervalu 'e tercera menol entre el primel grau Re y el tercel grau Fa mos jaði sentil argu autáu al tonu menol. Si se constrúi un acordi cona tónica, la tercera y la quinta, ésti es un acordi menol.

El móu dóricu siguiría esti patrón d'intervalus:

Tonu-semitonu-tonu-tonu-tonu-semitonu-tonu... Y güerta a empienzal.

Ejemprus:

  • El mou dóricu en Re contendría tolas mesmas notas de la escala mayol en Do esmienzandu pol Re.
  • El mou dóricu en Sol contendría tolas mesmas notas de la escala mayol en Fa esmienzandu pol Sol.
  • El mou dóricu en La contendría tolas mesmas notas de la escala mayol en Sol esmienzandu pol La.

El mou dóricu es simétricu, quijiendu estu iðil qu'el patrón de tonus y semitonus es el mesmu en descendiendu y en ascendiendu. La diferencia entri la escala menol natural moelna quea bien ejemprificá ena relativa dureða nel sextu grau la escala. Ena escala menol moelna, esta nota quearía un semitonu más pabaju.

Efectivamenti, el mou dóricu es autáu a la escala menol natural (u el mou eólicu) pero con el sextu gráu subíu un semitonu. Pa lial más las cosas, el mou dóricu meyeval u moelnu es el mesmu qu'el mou frigiu de los antigus griegus.