Parménidi

Dendi Güiquipeya
Sartal a: Güiquipeandu, Landeal
Bustu Parménidi.

Parménidi [parˈmẽniði] (en griegu Παρμενίδης [parmẽnɪ́ːdɛːs]) hue un pensaol griegu, máisimu representanti la escuela eleática.

Via[eital | edit source]

La huerça los datus tocantis a la via desti filósofu se estrain de Diógeni Laérciu, Platón i Apolodoru, anque pol parti Platón seyan bastanti resbalizus, pola imparcialiá i el caraiti literáriu los sus diálogus.

Pola referéncias nel Parménidi platónicu[1], se carcula qu'el filósofu tuviera nacéncia entri los añus 515 i 510 e. C. Las referéncias en Diógeni Laérciu i Apolodoru tamién no son concientis, pos aquel[2] lo pon ena frol la via ena 69a olimpiá, i. e., pal 500.

Diógeni dis que hue iju dun tal Πύρης (Pýrēs). Tuvu nacéncia ena ciá siciliana de Elea, veloí que se le mienti con freqüéncia Παρμενίδης Ἐλεάτης (Parmenídēs Eleátēs) “Parménidi el eleata”.

Tuvu contautu con Jenófani, del que deprendió el su pensamientu, anque no hue siguiol. Se puei esprical assina el hechu de que Parménidi cautivara el essámetru pa la componienda las sus torias. Quien, sigún Diógeni Laérciu, mas l’enfruyó hue Amínia, de la escuela pitagórica, quien lo vruecó a la via pastueña i reflessiva, manque tapocu huerun los sus endirguis de pesu nel su pensaeru, sigún se ve enos sus testus.

Parménidi consiguió la aprebación los sus vizinus eleatas, pos, amás, les didu leis a la ciá, sigún pol enteraciónis de Plutarcu[3], Estrabón[4] i Espeusipu pol boca del própiu Diógeni Laérciu[5].

Platón cuenta de belu oyiu paí nel su diálogu Parménidi que quandu viejinu, a la eá de 75 añus, aballó a las Atenas junta el su discípulu Zenón a vel las Grandis Panateneas. S’inora, no estanti, la eá a la que murió.

Obra[eital | edit source]

Cabiceru el Περὶ φύσεως.

Son muchus los autoris la Antigüeá que confilman que Parménidi namás escrebió una obra. Los restus qu’abemus son en velsu, concretamenti en essámetrus i son relativamenti albundosus. Pol mé de Sestu Empíricu se conselva el cabiceru i pol Simplíciu cachus mas u menus estensus. El nombri es, no en vanu, Περὶ φύσεως (Perì phýseōs) “Al tentu la naturaleza”.

Anque la su filosofia se presenta en velsu, la opinión general l’á atorgau mala fama escrebiol, pol precural cistal nel velsu ideas filosófica sumamenti astratas i enliosas. En realiá se trata nuevamenti de la problemática la puesia didática. A estu s’añii el hechu de belu escritu ena luenga omérica, un jóniu enllenu particulariais, una luenga literária pa hateal de la mijol manera possibri la escurana el su pensaeru.

Polos testus conselvaus se destinguin veloilus dos partis, una que trata sobri la verdá i otra al tentu l’opinión.

Pensaeru[eital | edit source]

Si pol algu es conociu Parménidi es pol bel encetau el caminu la lógica el pensaeru i pol creyel filmimenti qu’el ordin natural, el κόσμος, es unu.

El acelcamientu a la verdá se da ena primel parti los testus conselvaus. Nella s’esprica el mundu dende una almiración simpri: lo que es i lo que no es. Parménidi desarrolla una enteressanti toria al tentu la uniá el univelsu. Sigún él, lo que ai es ἕν (hén) “únicu” i συνεχές (synekhés) “continu” i es quanti que es. No dessisti una conceción de origin, lo que ai es inungendrau i incambiabri. Es impossibri que venga de lo que no dessisti i lo no dessistenti es inimaginabri, impensabri, indezibri[6]: οὐ γὰρ φατὸν οὐδὲ νοητὸν / ἔστιν ὅπως οὐκ ἔστι “pos ni es dezibri ni pensabri / quanti que no es”.

Ena segunda parti los velsus qu’abemus, sigún se crein assina ordenaus, la temática güervi de la esfera la deviniá, de lo astratu, pal ombri. Agora el pensaeru se troca a mera opinión u πίστις (pístis). Se despriega un enteosu razonamientu pol mé el qual Parménidi, comu mortal, asseñala que mal el ombri mienta a dos cosas cuya dessisténcia namás es própia duna dellas (lo que es), al mó los contrárius lus i nochi[7], jeitu esti presenteru ena dotrina eraclítia.

Referéncias[eital | edit source]

  1. Pl., Parm. 127 a
  2. DL, IX 21-3
  3. Plut., Adv. Colot. 32, 1226 a.
  4. Str., VII, 252.
  5. DL, IX 23.
  6. Parm., fr. 8 8-9.
  7. Parm. fr. 8, 53-61; fr. 9.

Bibliografia[eital | edit source]

  • Kirk, G. S., Raven, J. E., Schofield, M., Los filósofos presocráticos, ei. cast. J. García Fernández, Mairil, Gredos, 19872.
  • VV. AA., Los filósofos presocráticos, Mairil, Gredos, 1982.
  • Parménides. Heráclito, Fragmentos, trad. J. A. Miguez, L. Farré, Barcelona, Folio, 2002.


Filósofus pressocráticus

Autoris: Tali de MiletuAnassimandruAnassímeniPitágoraFilolauEraclituJenófaniParménidiZenón de EleaEmpédocliAnasságoraLucipuDemócrituProtágoraGórgiaTrasímacuCaricliCrítiaPródicuÍpiaAntifontiLicofrón

Guipal mas endirguis al tentu...