Puenti d'Alcántara

Dendi Güiquipeya
Sartal a: Güiquipeandu, Landeal

La Puenti d'Alcántara es una puenti romana en arcu sobri riu Tahu costruia entri los añus 104 i 106 ena puebración d'Alcántara, assitiá ena província e Caçris (Estremaura).

Bridge Alcantara.JPG

Costrucion[eital | edit source]

La puenti está hormá pol 6 arcus de desigual artura, los cualis descansan en cincu pilaris a la su vezi a deferentis arturas sobri el terrenu e roca achaná e piçarra. Desisti un tempreti conmemorativu con un arcu el trunfu superiol nel centru la puenti con una artura e 10 m, llamau de Trajanu. La puenti está hecha e sillaris almuadillaus de roca granítica d'entri 45 i 50 cm. Amas a los pies la puenti ai un templu romanu chiqueninu eicau al costructol el mesmu, hucheau e Lácer i cristianidau ena Eá Meya con el nombri e San Hulián. Altonci le añió una espadaña i una crús apoyá sobri cuatru calaveras de granitu. N'él está enterrau el enhenieru desta obra: Cayo Julio Lacer.

Estória[eital | edit source]

Una escrición nel centru la puenti endica que hue costruia en onol al emperaol romanu Trahanu, que tuvu nacéncia en Ispania. La escrición izi lo siguienti:

"Imp. Caesari. Divi. Nervae. F.Nervae Traiano. Aug. Ger. Dacio. Pontif. Max. TRIB. POTEST ; VIII Imp. V.Cos V. P.P.".

Ena su entrá meriyonal s'eha costancia en otra escrición de qu'el su enhenieru hue Cayo Julio Lacer. La puenti d'Alcántara hue costruia grácias a los empuestus de sieti villas lusitanas i pretendia uñil la carçá e Norba (Caçris) a Conimbriga (Condeixa-a-Velha) cumu estación de la Via la Prata. El nombri vini d'epoca la envasión musulmana ena Eá Meya, ya que al-Qantara ( القنطرة) senifica "La puenti" en árabi.

Unu los arcus hue varias vezis cortau enas guerras i recostruiu alogu, ebiu a estal ena frontera. Pol primel vezi en 1213, hue parcialmenti estrumpiu polos musulmanis. En 1475, enas runchas entri Castilla i Purtugal, cuandu pensaban estrumpilu pa qu'Alfonso V e Purtugal nu lo cruciara, se salvó gracias al rei purtugués, que mandó izil al su enemigu, el duqui e Villahermosa, qu'él daria un rodeu, pos "nu queria el reinu e Castilla con aquel eificiu menus".

Mas tardi hue recostruiu pol Carlos I en 1543, desfigurandu el perfil el arcu central, coronándulo d'almenas i rehaziendu el primel arcu e ponienti que hue destruiu en 1213, cuandu sitió la villa Alfonso IX p'arramplalsila a los árabis. Pa ehal memória la restauración se labró el escú emperial que corona el arcu el trunfu, i se escrebió:

"Carlos V Emperador, Cesar Augusto y Rey de las Españas, mandó reparar este puente que deteriorado por las guerras y su antigüedad amenazaba ruina, el año del señor 1543, en el 24 de su imperio y 26 de su reinado".

En 1707, quea destruiu el arcu d'entrá e ponienti ebiu a la Guerra e Sucesión, i la restauración sedria mandá pol Carlos III en 1778. El segunderu arcu la puenti hue destruiu en 1809 duranti la Guerra la Endependéncia contra las tropas napoleónicas, i nu es hata 1818 cuandu se reeifica esti arcu con maera pal pasu e carruahis. Nu ostanti, hue incendiau en 1836 polas tropas del Estau para impiil el pasu las tropas carlistas, que mandás pol Miguel Gómez Damas, abian envaiu la província.

Hue recostruiu nuevamenti en 1860, pol Isabel II. Nesta úrtima restauración s'entaparun las huntas las pieras i se escrebió una nueva escrición, que izi:

"Elisabeth Borbonia Hispaniarium regina, norbensem potem antiquae provinciae lusitaniae, opus iterum bello interruptum, temporis vetustate pene prolapsum restituit aditum utrimque amplificavit, viam latn ad vaccaeos fieri iussit anno domine MDCCCLIX".

En Setiembri e 1969, pa costruil el embalsi d'Alcántara, que s'alcuentra 600 metrus áuguas arriba la puenti i que tini una capaciá e 3.300 millonis de m³ d'áugua, s'entaponarun los tunis que chambaban la direción de Tahu, i el lechu el riu queó completamenti secu varius quilómetrus cauci abahu, lo que hizu que la puenti romana queara pol primel vezi ena su estória sin riu.

Atihus[eital | edit source]