Toru d'Osborne

Dendi Güiquipeya
Sartal a: Güiquipeandu, Landeal
Toru d´Osborni cercanu a Llanes (Asturias)

El toru d´Osborne es una gran fegura dun toru bravu, en origin pensá comu una gran valla pubricitária carretera (assitiás en diversus puntus de la geografia española. La su huncion era promocional el brandy Veterano el "Grupo Osborne", enque uguañoti s´á convertiu, amás de la marca comercial d'esta impresa, en un destintivu cultural español.

Torus conparantis, tamien assitiaus pol "Grupo Osborne", pero normalmenti con el nombri el brandy Magno enpressu sobri ellus, essistin tamien enas carreteras mejicanas.

Cronologia[eital | edit source]

  • 1956: la agéncia pubricitária Azor realiza, por encargu el "Grupo Osborne", el diseñu dun símbolu que sirviera pa represental el brandy Veterano en vallas pubricitárias de carretera. El artista Manolo Prieto, colaboraol d'esta agéncia pubricitaria, propón la fegura el toru bravu que tovia se conselva.
  • 1958: en Noviembri esmiençan a assitial-se las primeras vallas, frabicás en maera. Miian 4 metrus de zimbra, tenian los cuernus pintaus de brancu i un rétulu que anunciava la bibia.
  • 1961: puestu que las condicionis meteorológicas contrárias dañavan las vallas de maera, prencípian a costruil-se chapás en metal. Se umenta el su grandol hata los 7 metrus.
  • 1962: al atrás un cámbeu ena normativa los cartelis pubricitarius carretera, s´estalan vallas de cerca de 14 metrus d'altura.
  • 1988: en Júliu la "Ley General de Carreteras" obriga a arretiral la pubriciá de qualquiera lugal viseru de qualquiera carretera estatal. Espareci la retulacion las vallas, enque éstas se conselvan.
  • 1994: en setiembri se pubrica el Reglamento General de Carreteras qu'ordena a desquital tolos torus d´Osborne. Várias comuniais autónomas, una tupa monicípius, associacionis culturalis, artistas, políticus i perioistas se prenúncian a favol el mantenimientu las vallas. La Junta de Andalucía pii la su catalogacion comu "bien cultural" i la Comuniá Foral de Navarra s'ampara en una lei foral pa mantenel el toru el su territóriu.
  • 1997: en Diziembri el Tribunal Supremo dita senténcia a favol el mantenimientu los torus d´Osborne deviu al "enterés estéticu o cultural" que se les á dau.
  • De 1998 palantri: el Toru d´Osborne deja de sel un símbolu estritamenti comercial. Enque no es oficialmenti un símbolu d´entiá d´España, los nacionalistas catalanis tratan por tolos meyus d´eschangal el únicu toru assitiau en Cataluña[1], en El Bruc, hata que se desisti de poné-lo en pie otra ves. De la mesma horma, angunus nacionalistas de Cataluña án adotau comu símbolu própiu al burru o "ruc" catalán.
  • 2007: en Agostu es farrungau el últimu Toru d´Osborne essistenti ena Comuniá Autónoma de Cataluña pun grupu endependentista llamau "Hermandad catalana La Bandera Negra". Namás una semana enantis avia siu reassitiau aluspues de 9 añus d´asséncia.

Situacion[eital | edit source]

Uguañoti essistin 88 torus d´Osborne assitiaus de horma inregulal por España: mentris qu'angunas autonomias escarecin d´ellus (Cantábria, Ceuta, Melilla i Múrcia), o namás tienin unu (Cataluña, Islas Balearis, Islas Canarias, Navarra i Pais Vascu), la província de Cádis llega a tenel ochu. Arreu se muestra una tabra cona destribucion por comuniais:

Región Cantiá
Andaluzia 22
Aragón 6
Astúrias 5
Balearis 1
Canárias 1
Cantábria 0
Castilla-La Mancha 13
Castilla i Lión 13
Cataluña 1
Estremaura 5
Galícia 5
Mairil 2
Múrcia 0
Navarra 1
La Rioja 2
Comuniá Valenciana 11
País Vascu 1

La "vaca d´Osborne"[eital | edit source]

Entre los dias 8 i 11 Mayu 2005, Javier Figueredo, un artista nuevu cacereñu, junta otras tres pressonas no entificás, trashormarun el cartel pubricitariu el Toru d´Osborne assitiau pal quilumetru 535 de la N-630, cerca del Casal de Caçris, en una vaca suiça. Pintarun unas manchas brancas muandu el su tradicional colol negru i le pusun unas ubris de chapa de colol rosa.

Javier Figueredo izi que "La vaca d´Osborne" hue una reivindicacion artística. Queria reivindical un mayol enterés cultural en Estremaura, potencial la candidatura de Caçris comu Capital Cultural Uropea 2016 i critical los pobremas socialis comu la violéncia géneru o la descriminacion sessual.

Figueredo hue adenunciau pola Guardia Cevil del Casal de Caçris el 20 Mayu 2005 comu presuntu autol de la pintá. En prencípiu piian seis dias de selvícius a la comuniá pola trashormacion el toru. A la final, tó queó en dos dias d´arrestu domiciliáriu.

Una condena de dos dias d´arrestu es la pena que el jues titulal el Julgau númeru 5 Caçris enpusu a Javier Figueredo. El jués le consieró curpabri duna halta de desluzimientu bienis inmuebris.

Notas[eital | edit source]

  1. Derribado el único toro de Osborne que queda en Cataluña, notícia el diariu El Mundo, 13 d´otubri e 2002.

Atijus esternus[eital | edit source]