Tosi (pálpagu)

Dendi Güiquipeya
Retrataura un ombri con tosi, pol William Bell.

La tosi palpebral (del griegu πτῶσις [ptɔ́ːsis] “caia”) es la caia anolmal el pálpagu darriba. La tosi palpebral puei prevocal, de no tratalsi, afeicionis a la vista, comu ambliopia u astimatismu.

Causas[Edital | Editá'l códigu]

La caia el pálpagu se produzi de que los músculus que s’encargan d’alevantal el pálpagu no son lo suficientimenti huertis pa hazelu. El chascu puei afetal a un oju u a dambus a dos.

La tosi se puei dal de nacimientu, anque tamién se puei original pol destintus motivus. Quandu mayol, pol mó la debilitú los músculus, puei general tosi.

Motivus ajenus puein sel el dañu el niervu oculomotol —que es el que controla el músculu elevaol—, la diabeti, un tumol celebral u una miastenia.

Crassificaeru[Edital | Editá'l códigu]

En sigún la causa qu’origini la caia el pálpagu, se puei crassifical la tosi en:

  • Tosi nurogénica. Afeta al niervu.
  • Tosi miogénica. Motivá pol angún tipu miastenia u distrófia.
  • Tosi aponurótica.
  • Tosi mecánica. Pol mó dangún edema u tumol.
  • Tosi nurotóssica. Síntoma envenenamientu.
  • Seudotosi.

Trataeru[Edital | Editá'l códigu]

La tosi aponurótica i congénita requiel entriveción quirúlgica de que empatarata la visión. Otrus tipus tosis que no afetin gravimenti a la vista, puein tratalsi con unus lentis especialis.