Ufrati

Dendi Güiquipeya
Sartal a: Güiquipeandu, Landeal

Ufrati (en griegu Εὐφράτης [ewˈphrátɛːs]) hue un emportanti filósofu i moralista del sigru I de la iscuela estoica.

Via[eital | edit source]

Pocas son las enteracionis tocantis a la su via. Los testimoñus que palran a tentu del lugal d’origin desti filósofu son enreosus. Filostratu dis que era de pa Tiru[1] mentris que Estéfanu dis sel de pa Pifania, en Síria.[2]

Los datus mas albondosus procein del epistológrafu Plíniu el Nuevu,[3] en una carta que manda al su amigu Átiu Clementi, ena que lo ahinchona a ascuchal a Ufrati. Pol mó desta carta sabemus que Plíniu conoció a Ufrati en estuviendu en Síria al selvíciu melital.

El su señol era el políticu Pompeyu Julianu. Tuvu tres ijus, dos machus i una hembra, a cuyus dos machus precuró endilgal de la mejol manera.

Ena descrición que hazi, lo retrata comu un ombri altu, barbú, pero arriscau. El su caraiti no era escabriosu, ni rúspiru, tolo contráriu, era duci i respetuosu cona genti.

Era mu nombrau pol sel mu güen habraol i polos sus consejus. Alospués el própiu Plíniu se consejó de Ufrati, comu asseñala enas sus cartas[4]

Hue descípulu del filósofu Musóniu Rufu, tamién estoicu, enque tamién tuvu emfrujus de la filosofía cínica. Anduvu deprendiendu ena su tierra i pa Roma mas tardi, dandi lo avientarun en el 93 pol ordin de Domicianu. Alospués golvió, quandu Nerva. Murió nel 119, viejinu i cansau de la via, quandu otuvu el premissu del emperaol Adrianu pa suicidalsi.[5]

Pensaeru[eital | edit source]

El su pensaeru está atijau al estoicismu que empartia Musóniu Rufu, ena línia dotrus filósofus estoicus comu Rústicu u Epitetu, quien ya cuentavan con cierta emfrujéncia cínica. Pa Ufrati, lo corretu no es aguarreal a los ombris, ni castigal a los que se enquivocan, sino corrigilus, pensamientu tamién desarrollau pol Marcu Uréliu enos sus Revacaerus.

Epitetu lo mientan angunas vezis enos sus escritus, lo mesmu que Plíniu, pola su sabiuria i güena hablatória.

Huentis[eital | edit source]

  1. Philostr., VS, I 7; VA, I 13.
  2. St. Byz, E.
  3. Plin., Ep. I 10
  4. Ibidem, I 10 10.
  5. Dión Cássiu, LXIX 8.


Estoicismu

Vieja Estoa: Zenon de Cítiu · Perseu · Aristó · Esferu · Erilu · Cleanti · Crisipu · Zenón de Tarsu · Crati de Malu · Diógeni de Babilónia · Apolodoru · Antípatru de Tarsu


Estoa Meya: Panéciu · Dárdanu · Nesarcu · Écatu · Posidóniu · Diódotu · Géminu · Antípatru de Tiru · Atenodoru de Caná


Estoa tardia: Séneca · Cornutu · Musóniu Rufu · Ufrati  · Cleomedi · Epitetu · Ierocli · Sestu de Queronea · Rústicu · Marcu Uréliu · Apolóniu de Calcedónia


Guipal mas endirguis al tentu...