Andréi Sájarov
| Andréi Sájarov | ||
|---|---|---|
 | ||
| Información pressonal | ||
| Nombre en ruso | Андрей Дмитриевич Сахаров | |
| Nacencia |
21 de mayu de 1921 Moscú (Rusia Soviética) | |
| Muerti |
14 de diziembri de 1989 (68 años) Moscú (Union Soviética) | |
| Causa de muerti | Infarto agudo de miocardio | |
| Sepoltura | Cementerio de Vostryakovo | |
| Nacionalidá | Soviética (desde 1922) | |
| Familia | ||
| Pairis |
Dmitri Ivanovich Sakharov Yekaterina Sakharova | |
| Cónyugi | Yelena Bónner (1972-1989) | |
| Educación | ||
| Educación | doctor en Ciencias Físico-Matemáticas | |
| Educau en |
| |
| Supervisor doctoral | Ígor Tam | |
| Información prehessional/profissional | ||
| Oficiu | Físico, defensor de derechos humanos, físico nuclear y políticu | |
| Ária | Física | |
| Cargus acupaus | Diputado del Pueblo de la URSS | |
| Empreaol |
| |
| Sitiu web | www.sakharov.space | |
Andréi Dmítrievich Sájarov (en russu, Андре́й Дми́триевич Са́харов; pronunciación: [ɐnˈdrʲej ˈdmʲitrʲɪjɪvʲɪtɕ ˈsaxərəf]; Moscú, 21 de mayu de 1921-14 d’avientu de 1989) fue un destacáu físicu nuclear soviéticu, socialista i ativista en favol delos derechus humanus i las libertais democráticas. Fue galardonáu col Premiu Nobel dela Paz de 1975.
Biografía
[adital | adital cóigu]Fue siju de Dmitri Ivánovich Sájarov, professol de física i pianista aficionáu, i d’Ekaterina Alekséyevna Sajárova, nacía Sofiano, d’ascendencia griega. L’umanismu i la conciencia social dela su familia definun la su personalidá. El su agüelu paternu abía síu un destacáu abogáu ena Rússia çarista, cuna conciencia umanista orientá ala justicia social i l’abolición dela pena de muerti. Inque’l su bisagüelu abía síu sacerdoti ortodoxu i Sájarov fue bautizáu, l’ateísmu del su padri impidió la influencia delas ideas religiosas ena su formación i ena su vida. Malgradu essu, creía que l’universu i la vida humana son goviernaus puna huerça superior que la ciencia nu puei abarcal.[1]
Entró ena Facultá de Física dela Universidá Estatal de Moscú en 1938. Debíu ala Segunda Guerra Mundial se mudó a Asjabad, ogañu en Turkmenistán, ondi se graduó en 1941. Se dedicó ala envestigación científica nun laboratoriu dela ciá d’Uliánovsk.
En 1943 se casó con Klavdia Alekséyevna Víjireva, con quien tuvu dos sijas i un iju dantis de qu'ella muriera en 1969.[2] Tornó a Moscú en 1945 pa estudial nel Departamentu de Física Teórica del Institutu de Física Lébedev dela Academia de Ciencias de Rússia, ondi se dotoró en 1947.
Al rematal la Segunda Guerra Mundial encetó a investigal los rayus cósmicus i los sus efeutus sobri los seris vivus. A meyaus de 1948 participó nel programa soviéticu d’armas nuclearis pa construyil la bomba atómica, baxu la dirección d’Ígor Kurchátov. El primer dispositivu atómicu soviéticu fue ensayáu el 29 d’agostu de 1949.
Endispués de mudal-si a Sarov, nel óblast de Nizhni Nóvgorod, en 1950, Sájarov tuvu un papel destacáu nel desendolcu dela bomba d’hidróxenu o bomba H. El primer despositivu de fusión soviéticu fue ensayáu el 12 d’agostu de 1953, empleandu’l diseñu Sloika. En 1953 fue elegíu miembru de plenu derechu dela Academia de Ciencias de Rússia i recibió la primera delas sus tres medallas d’Héroi del Trabaju Socialista (Герой Социалистического Труда).
Sájarov continuó’l su trabaju en Sarov. La su atividá principal fue desendolcal la primera bomba d’idróxenu soviética d’escala megatón, cun desseñu conocíu en Rússia comu «Tercera Idea de Sájarov» i nelos Estaos Uníus comu diseñu Teller-Ulam. Fue ensayá baxu’l nombri de RDS-37 en 1955. Una varianti de mayor tamañu del desseñu de Sájarov fue la Bomba del Çar, detoná n’otubri de 1961, con una potencia de cincuenta megatonis. Fue l’artefatu nuclear más potentienti det que se tien detonáu.
En 1950 tamién propusu una idea pa un reatol nuclear de fusión controláu, el tokamak, que entá es el diseñu básicu de buena parti delos desendolcus atualis. Sájarov, xuntu con Ígor Tam, propusu confinal un plasma ionizáu a una temperatura estremamenti alta medianti campus magnéticus toroidalis pa controlal la fusión termonuclear.
En 1951 inventó’l primer generaol magnetoimplosivu,[3] que comprimía campus magnéticus medianti esplosivus. Llamó al dispositivu generaol MK, abreviatura de magnetocumulaoris. El MK-1 radial produzía un campu magnéticu pulsáu de 25 megagauss, equivalenti a 2500 tesla. El MK-2 helicoidal generó ata cien millonis d’amperius en 1953.
Sájarov ensayó endispués el «cañón de plasma» empulsáu por generaoris MK. Nel dispositivu, un pequeñu anillu d’aluminiu era vaporizáu por unas corrientis inducías gigantescas, produziendu un plasmoidi toroidal estabri i autoconteníu que era empulsáu a 100 km/s.
Más alanti, Sájarov sugirió sustituyíl la bobina eletromagnética del generaol MK por un gran solenoidi supercondutol pa comprimil magnéticamenti i focalizal esplosionis nuclearis soterráneas, produziendu un efetu semelhanti al delas cargas ocas usadas ena demolición i nelos misilís antiblindaji, nelas que la energía dela esplosión es empobiná i concentrá sobri l’obetivu. Sigún las sus teorías i cálculus, se podrían focalizal 1023 protonis por segundu sobri una superficie d’1 mm² i provocalsi la colisión de dos fazis d’esti tipu. Nu se conoci dengún esperimentu que lo demostrara.
Endispués de 1965, Sájarov tornó ala investigación básica i encetó a trabajal nelos campus dela física de partículas i la cosmología.[4][5][6][7][8][9][10][11]
Se centró ena explicación dela assimetría bariónica del universu i fue’l primer científicu n’introduzil dos universus, o «capas», uníus pol Big Bang. Sájarov consiguió una simetría CPT completa, ya que la segunda capa es enantiomórfica —simetría P—, tien una flecha del tiempu opuesta —simetría T— i está constituía por antimateria —simetría C— debíu a una violación CP opuesta.
Nel su modelu, los dos universus nu interacionan, salvu a traviés dela acumulación local de materia cuya densidá i presión sean tan altas comu pa conectal las dos capas por meyu d’un puenti sin espaciu-tiempu entre ellas, sino con continuidá xeodésica más allá del radiu límiti pal intercambiu de massa. Sájarov llamó a estas singularidais «colapsu» i «anticolapsu». Son una alternativa ala pareja d’buracu negru i buracu blancu dela teoría delos buracus de gusanu. Sájarov tamién propusu la idea dela gravidá inducía comu teoría alternativa ala gravidá cuántica.
Represión polas sus ideas antimilitaristas
[adital | adital cóigu]
Sájarov estaba convencíu dela importancia del su trabaju aplicáu al desendolcu delas armas nuclearis. Peru, pocu a pocu i dendi finais dela década de 1950, fue adquirindu una mayor conciencia delas implicacionis realis delos sus descobrimentus i vislumbró peligus comu una guerra termonuclear o la contaminación pola radiactividá. Assina, cambió la su postura.
Duranti la década de 1960 tuvu un papel ativu contra la proliferación delas armas nuclearis i los ensayus nuclearis ena atmósfera, contribuyendu al Tratau de Prohibición Parcial d’Ensayus Nuclearis, firmáu en Moscú en 1963. Dendi entoncis, pola su propia convición i pola crecienti imposición del goviernu, fue alejándussi dela física nuclear aplicá pa dedicalsi más ala cosmología básica.
Un puntu d’inflexión ena opinión que tenía del goviernu soviéticu fue la su postura contraria ala carrera armamentística basá en misilís balísticus con cabeças nuclearis, ena qu’estaban embueltrus los Estaos Uníus i la Unión Soviética nel apogeu dela Guerra Fría. Nuna carta secreta del 21 de juliu de 1967, empobiná al dirigenti soviéticu dela época, Sájarov defendió la necessidá d’aceutal una propuesta de renuncia bilateral alos misilís nuclearis pol peligru d’una guerra nuclear mundial. Nel manuscritu pidió tamién que la carta fuera publicá ena prensa, peru la petición fue rejeitá i la su propuesta, ignorá.
En mayu de 1968 remató un ensayu tituláu Progressu, coexistencia pacífica i libertá intelectual, nel que desendilgaba las ideas d’aquella carta. El castigu nu tardó: se le prohibió investigal en qualisquier centru o laboratoriu militar dela Unión Soviética i se le quitarun los honoris consiguíus.
En 1970 colaboró ena hundación del Comité polos Derechus Humanus de Moscú. Cola passa del tiempu aumentarun la su atividá i la represión governamental. En 1972, con 51 añus, se casó cola pacifista Yelena Bónner, que supusu un importanti apoyu ena su lucha.
Comu reconocimientu internacional al su esfoutu, en 1973 fue nomináu al Premiu Nobel dela Paz, que recibió en 1975.[12] El Comité Nobel lo llamó «un portavoz dela conciencia dela humanidá». Sigún la declaración del Comité, «Sájarov ha destacáu de manera convincenti que los derechus inviolabris del hombru proporcionan la única basa segura pa una cooperación internacional verdadera i duraora».
Sájarov nu recibió permissu pa salil dela Unión Soviética i recogel el premiu. La su mugel pronunció nel su nombri el discursu dela ceremonia, tituláu Paz, progressu i derechus humanus, de manera semelhanti al ensayu de 1968. Nel discursu consideraba que los tres obetivus dependían unus d’otrus i que dengún d’ellus podía alcançalsi sin los otrus dos.
El discursu nu era namás una condena delas armas nuclearis. Era tamién una denuncia delas causas delas grandis amenaças contra la humanidá —l’aniquilación nuclear, la jambri, la contaminación, l’espoliu delos recursus, la superpuebración i la deshumanización— i una defensa delos adelantus científicus, las libertadis i la dissidencia.[13][14]
Las ideas de Sájarov sobri’l desendolcu social lo llevarun a proponel el principiu delos derechus humanus comu basa de toa política. Ena su obra afirmaba que «el principiu de que lo que nu está prohibíu está permitíu ha entendelsi literalmenti», negandu la importancia i validá delas normas moralis o culturalis que nu estuvieran recogías enas leis.
El 22 d’eneru de 1980 fue arrestáu polas sus protestas públicas contra la presencia militar soviética n’Afganistán i deportáu drentu dela su propia patria. Fue aisláu ena ciá de Gorki, ogañu Nizhni Nóvgorod, una ciá zarrá i inacessibri palos estranjerus, i foi priváu ata de teléfonu.
El control dela KGB duró ata avientu de 1986, añu nel que Mijaíl Gorbachov encetó las sus políticas aperturistas dela perestroika i la glásnost. Gorbachov mandó instalal un teléfonu nel apartamentu de Sájarov pa comunicalsi personalmenti con elli i anuncialsi la su puesta en libertá.[15]
Sájarov pudo tornal a Moscú i impulsal la creación delas primeras organizacionis políticas independentis i legalis. En marçu de 1989 fue elegíu diputáu independienti del nuevu cuerpu legislativu, el Congressu delos Diputaus del Puebru dela Unión Soviética, creáu pa sustituil al antigu Sóviet Supremu dela Unión Soviética unipartidista.
En 1985 se hundarun los Premius Sájarov, llamaus assina n’honol del físicu. Son galardonis anualis concedíus pol Parlamentu Uropeu a personas i organizacionis dedicás ala defensa delos derechus humanus i las libertadis.
En 1989 recibió’l Premiu Humanista Internacional dela Unión Internacional Humanista i Ética.
Pocu endispués murió d’un ataqui cardíacu ala edá de 68 añus. Los sus restus reposan nel cimenteriu de Vostryakóvskoye de Moscú.
En 1990, l’artista russu Dmitri Vrúbel pintó’l mural «Gracias, Andréi Sájarov» sobri los restus del Muru de Berlín, n’homenaji ala su lucha polas libertadis. El mural se conserva ena East Side Gallery.
L’archivu de Sájarov
[adital | adital cóigu]L’archivu delos documentus recoyíus por Sájarov fue creáu ena Nuversidá Brandeis en 1993 i trasladáu endispués ala Nuversidá de Harvard.[16] Los documentus fueron publicaus por Yale University Press en 2005.[17]
Hai una versión en lĩnia[18] n’inglés i russu, con codificación de carateris Windows-1251 i imáginis delas páxinas originalis.
La mayoría delos documentus son cartas del jefi dela KGB al Comité Central del Partíu Comunista dela Unión Soviética, sobri l’atividá delos dissidentis i recomendacionis pa interpretal o silencial determináus feitus enos periódicos. Las cartas cobrin el periodu comprendíu entre 1968 i 1991. Los documentus describin la atividá de Sájarov i la d’otrus dissidentis, assina comu la d’altus dirigentis comunistas i dela propia KGB. Nu se conoci dengún archivu dela KGB disponibri enos servioris russus.
Vel tamién
[adital | adital cóigu]Referencias
[adital | adital cóigu]- ↑ Drell, Sidney D. i Sergei P. Kapitsa, eds.: Sakharov Remembered. Nueva York, Springer, 1991, pp. 3 i 92.
- ↑ Drell, Sidney D. i Sergei P. Kapitsa, eds.: Sakharov Remembered. Nueva York, Springer, 1991, pp. 3 i 92.
- ↑ Sájarov, A. D.: «Magnetoimplosive generators». UFN, vol. 88, núm. 4, 1966, pp. 725-734; Soviet Physics Uspekhi, vol. 9, 1966, pp. 294-299.
- ↑ Sájarov, A. D.: «Expanding Universe and the Appearance of a Nonuniform Distribution of Matter». ZhETF, vol. 49, 1965, pp. 345-358; traducción en JETP Letters, vol. 22, 1966, pp. 241-249.
- ↑ Sájarov, A. D.: «Violation of CP Symmetry, C-Asymmetry and Baryon Asymmetry of the Universe». Pisma Zh. Eksp. Teor. Fiz., vol. 5, 1967, pp. 32-35; traducción en JETP Letters, vol. 5, 1967, pp. 24-27.
- ↑ Sájarov, A. D.: «Quark-Muonic Currents and Violation of CP Invariance». Pisma Zh. Eksp. Teor. Fiz., vol. 5, 1967, pp. 36-39; traducción en JETP Letters, vol. 5, 1967, pp. 27-30.
- ↑ Sájarov, A. D.: «Antiquarks in the Universe», en Problems in Theoretical Physics, dedicáu al trentenu aniversariu de N. N. Bogoliúbov. Naúka, Moscú, 1969, pp. 35-44.
- ↑ Sájarov, A. D. i I. D. Nóvikov: «A multisheet Cosmological model». Publicación preliminal del Institutu de Matemática Aplicá, Moscú, 1970.
- ↑ Sájarov, A. D.: «Topological structure of elementary particles and CPT asymmetry», en Problems in Theoretical Physics, dedicáu ala memoria d’I. E. Tamm. Naúka, Moscú, 1972, pp. 243-247.
- ↑ Sájarov, A. D.: «Baryonic asymmetry of the Universe». ZhETF, vol. 76, 1979, pp. 1172-1181; traducción en JETP Letters, vol. 49, 1979, pp. 594-599.
- ↑ Sájarov, A. D.: «Cosmological model of the Universe with a time vector inversion». ZhETF, vol. 79, 1980, pp. 689-693; traducción en JETP Letters, vol. 52, 1980, pp. 349-351.
- ↑ «Andrei Sakharov – Facts», NobelPrize.org. Consultau el 30 d’agostu de 2025. En inglés.
- ↑ Bónner, Yelena: «Acceptance Speech». Premiu Nobel dela Paz, Oslo, Noruega, 10 d’avientu de 1975.
- ↑ Sájarov, Andréi: «Peace, Progress, Human Rights». Conferencia Nobel, Premiu Nobel dela Paz, Oslo, Noruega, 11 d’avientu de 1975.
- ↑ «Освобождение Сахарова — La liberación de Sájarov». En russu.
- ↑ «Harvard University. KGB file of Sakharov».
- ↑ Rubenstein, Joshua i Alexander Gribanov, eds.: The KGB File of Andrei Sakharov. New Haven, Yale University Press, 2005. ISBN 0300106815. Signatura JC599.S58 K43 2005. Catálogu dela Universidá de Georgetown.
- ↑ «The KGB File of Andrei Sakharov». Versión en lĩnia colos testus originalis i las traduccionis al inglés.