Bateria

Las baterias son microorganismus procariotas que presentan un tamañu d'unus pocus micrómetrus (polo general entri 0,5 y 5 μm de longol) y diversas formas, incluyendu filamentus, esferas (cocus), barras (bacilus), sacacorchus (vibrius) y hélicis (espirilus). Las baterias son células procariotas, polo que, a diferencia de las células eucariotas (d'animalis, prantas, hongus, etc.), no tién el núcleu definíu ni presentan, en general, orgánulus membranosus internus. Generalmenti posin una pared celulal y esta se componi de peptidoglicanu. Una hartá baterias disponin de flagelus o d'otrus sistemas de desplazamientu y son móvilis. Del estudiu las baterias s'encarga la bacteriología, una rama la microbiología.

Manqui el términu bateria incluía tradicionalmenti a toïtus los procariotas, actualmenti la taxonomía y la nomenclatura centífica los dividi en dos grupus. Estus dominius evolutivus se denominan Bacteria y Archaea (arqueas). La división se justifica en las pazu diferencias que presentan dambus grupus a nivel bioquímicu y genéticu. La presencia frecuenti de pared de peptidoglicanu juntu con la su composición en lípidus de membrana son la prencipal diferencia que presentan frenti a las arqueas.

Las baterias son los organismus más abundantis del praneta. Son ubicuas, s'encuentran en tós los hábitats terrestris y acuáticus; crecin hata en los más extremus com'en los manantialis de'áuguas calientis y ácidas, en desechus radioactivus, en las profundidáis tantu del mar comu de la corteza terrestri. Argunas baterias puein inclusu sobrevivil en las condicionis extremas del espaciu exterior. S'estima que se puein encontral en tornu a 40 millonis de células bacterianas en un gramu de tierra y un millón de células bacterianas en un mililitru d'áugua dulci. En total, se calcula qu'ain aproximadamenti 5×10³⁰ baterias en el mundu.

Las baterias son imprescindiblis pal reciclaji los elementus, pos una hartá pasus importantis los ciclus biogeoquímicus dependin d'estas. Com'ejemplu cabi cital la fijación del nitrógenu atmosféricu. Sin embargu, solamenti la mitad los filus conocíus de bacterias tién especis que se puein cultival en el laboratoriu, polo qu'una pazu parti (se suponi que cerca del 90 %) las especis de baterias existentis entoavía no á síu descrita.

En el cuerpo umanu ain aproximadamenti diez vecis más células baterianas que células umanas, con una pazu cantidá de bacterias en la piel y en el tractu digestivu. Manqui el efectu protector del sistema inmunológicu hazi que la pazu mayoría d'estas baterias sea inofensiva o beneficiosa, argunas baterias patógenas puein causal malotias infeciosas, incluyendu cólera, difteria, escarlatina, lepra, sífilis, tifus, etc. Las malotias baterianas mortalis más comunis son las infeciones respiratorias, con una mortalidá solu pala tuberculosis de cerca de dos millonis de personas al añu. En tó el mundu s'utilizan antibióticus pa tratal las infecionis bacterianas. Los antibióticus son efectivus contra las baterias ya qu'inhibin la formación la pared celular o detienin otrus procesus del su ciclu de vía. Tamién s'usan extensamenti en la agricultura y la ganadería en ausencia de malotia, lo qu'ocasiona que se esté generalizandu la resistencia las baterias a los antibióticus.

En la industria, las baterias son importantis en procesus talis comu'l tratamientu d'áuguas residualis, en la produción de mantequilla, quesu, vinagri, yogur, etc., y en la fabricación de medicamentus y d'otrus productus químicus.

Galería

• 
  Mycobacterium tuberculosis (Actinobacteria)
• 
  Thermus aquaticus (Deinococcus-Thermus)
• 
  Oenococcus oeni (Firmicutes)
• 
  Bacillus cereus (Firmicutes)
• 
  Staphylococcus aureus (Firmicutes)
• 
  Campylobacter jejuni (Proteobacteria)
• 
  Bordetella bronchiseptica (Proteobacteria)
• 
  Vibrio cholerae (Proteobacteria)
• 
  Leptospira (Spirochaetes)
• 
  Treponema pallidum (Spirochaetes)

Guípesi tamién

• Bacteriología
• Extremófilu
• Microbiología
• Microbiota normal

Atijus

• En Commons ai conteníu multimedia sobre Bateria.

• Baterias: Cómu transformun la Tierra.
• agronlin.tripod.com; datus sobri baterias.
• Cria un cultivu de baterias.
• Todar's Online Textbook of Bacteriology.