Carmen de Burgos

Carmen de Burgos
Información pressonal
Nombri de nacencia	María del Carmen Ramona Loreta de Burgos y Seguí
Nacencia	10 de diziembri de 1867 Almería (España)
Muerti	9 d'otubri de 1932 Madrid (España)
Sepoltura	Cementerio Civil de Madrid
Nacionalidá	Española
Lengua materna	Castellanu
Familia
Collera	Ramón Gómez de la Serna
Información prehessional/profissional
Oficiu	Pediorista, novelista, escrevienti, tradutol, activista por los derechos de las mujeres, editor y sufragista
Ária	Literatura
Seudónimu	Colombine, Gabriel Luna, Perico el de los Palotes, Raquel, Honorine y Marianela

Carmen de Burgos Seguí (Almería, 10 de deziembri del 1867-Mairil, 9 d'otubri del 1932) hue una pediorista, escreviora, tradutora española i tamién ativista delos derechus dela mugel. Anombrá comu Colombine, tamién enfirmó con otrus nombris comu Gabriel Luna, Perico el de los Palotes, Raquel, Honorine o Marianela. Perteneció ala generación del 98, ala Edá de Prata i amás se le valorea comu la primel pediorista profissional n'España i tamién comu una delas primel corresponsais dela guerra.

Biografía

Tuvu la su nacencia el 10 de deziembri del 1867 ena ciá andaluza d'Almería i hue la primel ija delos diés ermanus del matrimoñu hormau por l'almeriensi José de Burgos Cañizares i la nijareña Nicasia Seguí Nieto. Se crió en Rodalquilar, en Níjar, aondi'l su pairi tenía tierras, minas i el cortiju mentau La Unión. Tuvu la mesma educación i coltura que los sus ermanus varonis. Nel 1872, el su pairi hue nombrau viciconsu de Portugal n'España, dependienti del consulau de Cai.

Nel 1883, con dezisseis añus i ena contra del consejamientu del su pairi, s'aconyugó con Arturo Álvarez y Bustos, un pintol i pediorista descabrijau, dozi añus mas vieju qu'ella. Era iju de Mariano Álvarez y Robles, governaol civil d'Almería, que amás tenía la impresa tipugráfica que emprentava el prencipal diariu dela capital. Estu le hizu a ella familiarizal-si col mundu dela impresa dendi mu nueva, calavorandu en muchus jeitus dela emprisión i assina pubricó los sus primel artícalus ena revista socochona Almería Bufa, que derigía'l su ombri. En juñu del 1895 s'agenció el títulu de maestra dEnseñanza Elemental Primaria y nel 1898 el dEnseñanza Superior, en Mairil. Endispués nel 1901 s'agenció una praça por esposicionis ena Escuela Normal de Maestras de Guadalajara.

Dendi la primel ora, el matrimoñu hue una desilusión pa ella, pos su ombri la zurzeava, la engañava i los sus tres primel ijus espenarun con mu poquinu tiempu. Dendi'l 1898 esmençó a passal ca vés mas ratinus ena casa del su pairi i alexá del su ombri. En abostu del 1901 i endispués dela muerti del su iju Arturu, que tuvu nacencia nel 1893, decedió de dexal al su ombri pa esmençal una nueva vida sina su compaña en Mairil i cona única ija viva que le queava, qu'era María de los Dolores Ramona Isabel Álvarez de Burgos, que tuvu la su nacencia nel 1895. Primeramenti, s'aposentó col su titu, el senaol Agustín de Burgos y Cañizares, peru aluspués que ententara de sobripassal-si con ella, tuvu que dexal la su casa.

Nel 1905 recabó una beca del Menisteriu d'Estrución Púbrica pa estuyal los sistemas d'enseñaeru d'otrus paisis i viajó quasi qu'un añu por Francia, Italia i Mónacu. Alos acaberus del 1906 golvió ala su lavol de maestra i pediorista, amás hizu una campania nel Heraldo de Mairil en favol del sufragiu femeninu con una coluna titulá El votu dela mugel. Quandu hundó la carava moernista, conoció a Ramón Gómez de la Serna que p'antoncis era un desconocíu estuyanti de dezinuevi añus, venti añus mas chiquinu qu'ella i que ala finiquita hue'l su almiraol. Ca día diba a vesitá-la ala su casa alas cincu a puntu i ora dela tardi, escrevían juntus i alogu passeavan polos cafés dela Puerta'l Sol hata meyanochi, assina pal 1909 esmençaron una larga relación amorosa i literaria. Nel 1909 espenó el su maríu i se queó viúda i nel 1911 hue nombrá professora dela Escuela d'Artis i Oficius de Mairil, trebaju que compaginava col de dal crassis alas pessonas ciegas i sordumúas.

Tumba de Carmen de Burgos nel cimenteriu civil de Mairil.

No s'aconyugó con Ramón Gómez de la Serna, peru compartierun la su vida i la su passión pola literatura por unus venti añus, viviendu en varius paisis, peru ala finiquita golviendu sempri pa Mairil. Escrevían enas revistas i los pedióricus, sostribavan proyeutus d'escrevientis nuevus i viajarun a Purtugal i a Italia, ruqueandu el su interés polos assuntus sociais. Asperava que la su ija María siguiera los sus passus comu escreviora, peru enque sacó anguna pubricación, preferió dedicá-si ala entrepetación i nel 1917, la su ija s'aconyugó col tamién atol Guillermo Mancha i endispués se huerun p'Almérica. Nel 1929 i aluspués del frascassu del matrimoñu dela su ija, qu'era una atrís sin déssitu i con poblemas d'encivicaeru, golvió pa Mairil, aondi le consiguió un papel chiqueninu ena obra de Ramón Gómez de la Serna mentau comu Los medios seres, que hue un grandi frascassu. Antoncis él i la su ija esmençarun un amoriju duranti los ensayus, que tardó menus dun mes i acabijó con una huitiva a París. La larga relación de Carmen i Ramón hue escacharrá inremediablimenti i enque se despaciarun, ella no dexó de considerá-li comu un amegu.

El ochu d'otubri del 1932, mentris participava nuna mesa reonda, esmençó a ponel-si mal i hue trasladá ala su casa, aondi la assestió dentri otrus meicus el su amegu Gregorio Marañón, peru no tuvu déssitu i espenó alos sessenta i quatru añus d'edá, alas dos dela mairugá del día nuevi. Hue enterrá nel cimenteriu civil de Mairil ena presencia delos prencipais políticus i enteletuais d'antoncis. La su ija espenó nel 1939, quandu tenía quarenta i un añus, siendu enterrá junta ella.

Correúra Profissional

Retratu de Carmen de Burgos en Feminal nel 1907, pubricación dela qu'era corresponsal en Mairil.

Dendi'l 1902 calavoró col pedióricu El Globo, nel que escrevía una coluna titulá Notas femeninas, ena que analizava assuntus comu La mujer y el sufragio o La inspección de las fábricas obreras. Nel 1903, Augusto Suárez de Figueroa hundó el Diario Universal i l'acomoó pa tenel una coluna diaria titulá Lecturas para la mujer, embaxu'l nombri de Colombine, ispirau pol mesmu editol. Era la primel vés n'España, qu'una mugel tuvu reconocencia comu pediorista profissional i ena luenga castillana, pos hue la redatora d'esti diariu mairileñu. Ena su coluna, tratava de moas i moalis, peru entroduzía ideas que ya s'andavan popularizandu en angunus paisis uropeus. Tamién hizu campania paque se lealizara el descasamientu, algu que le hizu tenel la almiración de Giner de los Ríos i Blasco Ibáñez, peru que le hizu acebil arremetías pola ilesia i polos mas conservaoris que precurarun de desacredital-la.

Colombine, afotugrafiá nel branu del 1909 en Melilla, por Goñi ena Guerra de Melilla.

Nel 1907 hue almitía ena Associación dela Impresa de Mairil, junta Consuelo Álvarez Pool, mentá tamién comu Violeta. Quandu golvió de Francia hundó una juntiña de semana mentá La carava moernista, ala que acuían escrevientis, pedioristas, músicus, artistas prásticus, puetas i artistas estrangerus de passu por Mairil. Amás, n'aquella carava qu'anduvu por angunus añus, hue l'origi dela Revista Crítica dendi'l 1908 al 1909, dela que llegarun a pubrical-si seis númirus, enos que calavorarun Eduardo Zamacois, Salvador Rueda, Enrique Díez Canedo, Juan Ramón Jiménez, Antonio de Hoyos y Vinent, Rafael Cansinos-Assens, Ramón Gómez de la Serna i Tomás Morales, dentri otrus, enque tamién raceavan ala carava Eduardo Barriobero i José Francés. Nel 1907, cona llegá al goviernu del conservaol Antonio Maura, el menistru d'Estrución Púbrica Rodríguez-San Pedro la destinó a la ciá de Toleu pa alexá-la de Mairil, sigún la su biógrafa Concepción Núñez, peru ella siguía golviendu ala su casa de Mairil tolos fin-des p'apopal la carava literaria qu'avía hundau.

Tamién alternó con Benito Pérez Galdós, Vicente Blasco Ibáñez, Rafael Cansinos Assens, Juan Ramón Jiménez, Tomás Morales, Alonso Quesada, Julio Antonio, Julio Romero de Torres, Juaquin Sorolla, dentri otrus i amás tuvu una grandi amistá cona escreviora purtuguesa Ana de Castro Osório. Nel añu 1908, hundó la Alianza Hispano-Israelí nel defendimientu dela comunidá sefardí entrenacional, por mé dela Revista Crítica. Endispués del Desastre del barranco del Lobo ena Guerra de Melilla nel 1909, decedió aparal-si ala trupi española que lucheavan al reol de Melilla i pallí exerció de corresponsal dela guerra nel pedióricu El Heraldo de Mairil. Quandu golvió pa Mairil pubricó el artícalu ¡Guerra a la guerra! nel qu'afiava alos alantaus al su tiempu eno dela ojeción de concencia.

Correúra femenista i política

Carmen de Burgos pal 1913.

Nel 1921 derigió la primel manifestación sufragista n'España que hue en Mairil. Cona procramación dela Segunda Repúbrica nel 1931, la nueva costitución reconoció el matrimoñu civil, el divorciu i el votu femeninu, acolmandu assina los sus aspiramientus. S'apontó al Partíu Repubricanu Radical Socialista i hue nombrá presienta dela Cruzá de Mugeris Españolas i dela Liga Entrenacional de Mugeris Ibéricas i Hispanualmericanas, tamién hue escogía vicepresienta primera dela Isquierda Repubricana Anticlerical i amás en novembri del 1931 engressó ena maçonería, aondi hundó La Logia Amor, dela qu'era grandi maestri.

Nel 1932, mentris participava nuna mesa reonda sobri la educación sessual pal Círculo Radical Socialista, esmençó a ponel-si mal i hue trasladá ala su casa, aondi la assestierun tres meicus, peru sin déssitu. Las sus parabras acaberas huerun:

Mueru felís porque mueru repubricana. Grital amegus, con megu: Viva la Repúbrica!

Clara Campoamor, junta angunus delos políticus i enteletuais mas emportantis dela epoca, piió ponel el su nombri a una calli de Mairil, peru endispués dela Guerra Civil i la vitoria de Francu, el su nombri hue encruíu ena lista d'escrevientis prebíus i los sus librus desparecierun delas bibliotecas i de tolos venduarius.

La su Obra

Retratá por Tito en La Libertad nel 1923.

Retratá pol pintol Julio Romero de Torres nel 1917.

Trebajó nel Diario Universal, El Globo, La Correspondencia de España, El Heraldo de Madrid i ABC, pedióricu del que hue la primel redatora. Estruyó deferentis epissodius dela Guerra de Melilla nel 1909, siendu assina una delas primel mugeris corresponsais dela guerra ena estoria d'España. Enfirmó, amás de comu Colombine, con nombris comu Perico el de los Palotes, Gabriel Luna, Raquel, Honorine i Marianela.

Amás dela su intesa obra pediorística sonin destacás las sus conferencias nel ambienti del movimientu femenista, comu pol exempru en La misión social de la mujer nel 1911 i La mujer en España. Dentri las sus novelas mas popularis están Puñal de claveles, escrevía al acaberu dela su vida i basá nel percanci mentau comu'l Crimen de Níjar, que passó el ventidós de jullu del 1928 nel Cortijo del Fraile, enos Campos de Níjar i que hue una delas ispiracionis, conas que contó Federico García Lorca palas sus Bodas de sangre.

Está considerá una delas primel defendeoras del papel social i coltural dela mugel, assina, defendió la libertá i el regorçal d'essestil. Decediamenti endependienti, pensó a mantenienti ena nessecidá d'educal i hormal ala mugel pa poel alcançal duna ves por toas, la emancipación económica. Tamién está considerá una templana femenista, enque ella odiava essi ditau. Ena su obra La mugel moerna i los sus derechus nel 1927, definía la su ponencia comu un femenismu reconciliaol al esprical que no es el luchi de sessus, ni la enemistá col ombri, sinu que la mugel desea calavoral con él i trebajal al su lau. No hue mu bien considerá por muchus delos críticus i escrevientis dela epoca, qu'en ocassionis abondu pusierun la su lavol i la su obra relegá i reduzía ala condición de quería de Ramón Gómez de la Serna.

Obras

Ensayus i otrus escritus

• Ensayus literarius nel 1900.
• Albu artísticu literariu del siegru XX nel 1901.
• Notas de l'alma nel 1901. Una coleción de copras populais.
• Moernu tratau de lavoris. Barcelona. Antonio Bastinos edición nel 1904.
• El divorciu n'España nel 1904.
• La mugel n'España. Valencia. Sempere i Cía nel 1906.
• L'arti de sabel vivil. Pláticas sociais. Valencia. Sempere i Cia nel 1906.
• Viagis por Uropa. (Impresiones). Francia, Italia i Mónacu. Ilustrá con dozientus trenta i quatru gravaus. Barcelona, Casa Editorial Maucci nel 1906 i nel 1923.
• Cartas sin destinatariu. Bélgica, Paisis Baxus i Lussemburgu. Valencia. Sempere.
• Confidencias de artistas. Prólogo de Ramón Gómez de la Serna. Mairil. Sociedad Española de Librería nel 1916.
• Quieri Vusté conocel los secretus del tocaol? Barcelona. Ramón Sopena nel 1917 i nel 1934.
• Quieri Vusté comel bien? Manual pláticu de cozina. Barcelona. Ramón Sopena. Ain redicionis del 1931 i del 1936.
• Nuevus moelus de cartas. Barcelona. Ramón Sopena nel 1914 i nel 1932.
• La mugel ena casa: Aconomía doméstica. Guía dela güena ama de casa. Valencia. Prometeo.
• Salú i belleza. Secretus d'igieni i tocaol. Valencia. Prometeo.
• El tocaol pláticu. Valencia. Sempere nel 1910.
• La mugel moerna i los sus derechus. Valencia. Sempere pol 1920. Mairil. Ayuntamientu nel 2007.
• La mugel jardinera. Valencia. Sempere.
• La vos delos muertus, Valencia. Sempere nel 1911. Ena Biblioteca Digital Hispánica.
• Giacomo Leopardi. La su vida i las sus obras. Dos volumis. Valencia. Sempere nel 1911.
• El votu, las escuelas i los oficius dela mugel.
• Missión social dela mugel nel 1911.
• Cartas sin destinatariu nel 1912.
• L'arti de sel aleganti. Valencia. Sempere.
• Arti de sabel vivil. Valencia. Sempere.
• Tesoru dela belleza. L'arti de seduzil. Tomu I dela segunda serii pala Mugel. Valencia. Sempere.
• L'arti de sel amá. Tien tou lo que pué emportal ala mugel p'alcançal la felizidá, encopetal el su cuerpu i el su espíritu, llegandu a sel sedutora, atrativa i hazel-si cona eterna joventú.Valencia. Sempere.
• La cozina moerna. Prólogu i arregliju de Carmen de Burgos Segui, professora d'esta assisnatura ena Escuela d'Artis i endustrias de Mairil. Valencia. Sempere.
• Nueva cozina plática. Valencia. Sempere.
• Sensacionis d'Argentina nel 1914.
• Confessionis d'artistas. Prólogu de Ramón Gómez de la Serna. Mairil. V. H. de Sanz Calleja Ediciones nel 1916.
• Confessionis d'artistas. tomu II. Mairil. V. H. de Sanz Calleja Ediciones nel 1916.
• Los mis viagis por Uropa. Suiça, Dinamarca, Suecia Noruega. Mairil. V. H. de Sanz Calleja nel 1916.
• Los mis viagis por Uropa. volumi II. Alemaña, Ingalaterra i Purtugal. Mairil. V. H. de Sanz Calleja nel 1916.
• Pelegrineacionis. Los mis viagis por Uropa. Suiça, Dinamarca, Suecia, Noruega, Alemaña, Ingalaterra, Purtugal. Epílogu de Ramón Gómez de la Serna. Mairil. Emprenta Al reol del Mundu nel 1917. 2.ª edición de V. H. Sanz Calleja.
• Fígaro. Revelaciones, "Ella", descubierta, epistolario inédito. Epílogu por Ramón Gómez de la Serna. Emprenta Al reol del Mundu nel 1919.
• Vademécum femenino. Valencia. Sempere nel 1920.
• L'arti de sel mugel. Belleza i perfeción. Mairil. Sociedad General Española de Librería nel 1922.
• La Emperatriz Eugenia nel 1920.
• Moelus de cartas (tien tolas reglas tocati al estilu epistolal). Valencia. Sempere nel 1924.
• Amadís. Libro de Caballerías compuesto sobre el Amadís de Gaula de Garci-Ordúñez de Montalvo, por Carmen de Burgos. Valencia Sempere nel 1924.
• Las ensaladillas. Mairil, La Novela Corta nel 1924.
• La emperatriz Eugenia. La su vida. Mairil. La Novela Corta nel 1925.
• L'arti de sel mugel. Belleza i perfeción: astética i la sicología dela moa. Los grandis maestrus. El luxu i las sus produzionis. Mairil. Juan Pueyo, SA.
• Habrandu conos descendientis. Mairil. Editorial Renacimiento nel 1929.
• Gloriosa vida y desdichada muerte de D. Rafael del Riego. Un crimen de los Borbones. Mairil. Biblioteca Nueva nel 1931. Sevilla. Editorial Renacimiento nel 2013.

Novelas

• Alucinación. Santus de Sánchez Gerona. Mairil. Viuda de Rodríguez Sierra nel 1905. Colección Mignon XLII.
• Los inadaptados nel 1909.
• El balcón. Valencia, Sempere nel 1909.
• La rampa (Cuentus). Mairil. Renacimiento nel 1917.
• Ellas y ellos ó ellos y ellas. Mairil. Imprenta Alrededor del Mundo nel 1917.
• El último contrabandista. Barcelona. Sopena nel 1918.
• El retorno. Novela espiritista (Basá en hechus reais). Lisboa. Lusitania nel 1922.
• La hora del amor. Mairil. V. H. Sanz Calleja nel 1923.
• La malcasada nel 1923.
• La malcasada. Entrodución de Emilio Sales. Sevilla. Renacimiento nel 2016.
• Los espirituados. Mairil. Rivadeneyra nel 1923.
• La mujer fantástica. Valencia. Sempere nel 1924.
• El tío de todos nel 1925.
• Los anticuarios. Mairil. Biblioteca Nueva nel 1925.
• Quiero vivir mi vida. Col prólogu del Dr. Marañón sobri'l sentíu delos celus. Mairil. Biblioteca Nueva nel 1931.
• Puñal de claveles nel 1931. Sotras edicionis. USA. Stockcero nel 2009. Mairil. Descrito Ediciones nel 2018.

Novela corta

• Alucinación. Viuda de Rodríguez Serra. Biblioteca Mignon nel 1905.
• El Novenario. Santus d'Ernesto Durias. Publicaciones Nuevo Mundo, S.A.
• El tesoro del castillo. Santus de Pedrero. El Cuentu Semanal nel 1907.
• Senderos de vida. Santus de Posada. El Cuentu Semanal nel 1908.
• El veneno del arte. Santus de Fernández-Mota. Los Contemporáneos nel 1910.
• La indecisa. El Libru Populal nel 1912.
• La justicia del mar. El Libru Populal nel 1912.
• Frasca la tonta. El Libru Populal. Santus de Luis Blesa nel 1914.
• Malos amores. El Libru Populal. Santus de Bartolozzi nel 1914.
• Villa María. La Novela Corta nel 1916.
• El hombre negro. La Novela Corta nel 1916.
• Los usureros. Santus de Bartolozzi. Los Contemporáneos nel 1916.
• Lo inesperado. La Novela con Hoqui nel 1916.
• El perseguidor. La Novela Corta nel 1917
• Pasiones. La Novela Corta nel 1917.
• La mejor film, La Novela Corta, 1918.
• Venganza, La Novela Corta, 1918. (Es Frasca la tonta con nuevo título).
• ¡Todos menos ese! La Novela Corta nel 1918.
• Los negociantes de la Puerta del Sol. La Novela Corta nel 1919.
• Dos amores. La Novela Corta nel 1919.
• El fin de la guerra, Portá de Y. Durán. Los Contemporáneos nel 1919.
• Confidencias. Los Contemporáneos nel 1920.
• La flor de la playa. La Novela Corta nel 1920.
• Los amores de Faustino. La Novela Corta nel 1920.
• Luna de miel. La Novela Corta nel 1921.
• La ciudad encantada. La Novela Corta nel 1921.
• La entrometida. La Novela Corta nel 1921.
• El artículo 438. Santus de Bartolozzi. Los Contemporáneos nel 1921.
• La princesa rusa. La Novela Corta nel 1922.
• El suicida asesinado. La Novela Corta nel 1922.
• La mujer fría. La Novela Corta nel 1922.
• Los huesos del abuelo. Los Contemporáneos nel 1922.
• La prueba. Santus de Yzquierdo Durán. Los Contemporáneos nel 1922.
• El anhelo. Santus de Manchón. La Novela Semanal nel 1923.
• El extranjero. La Novela Semanal nel 1923.
• La pensión Ideal. La Novela Corta nel 1923.
• El hastío del amor. La Novela Corta nel 1923.
• La que se casó muy niña. Santus de Bradley. La Novela Corta nel 1923.
• La miniatura. Santus de Esplandiú. La Novela Corta nel 1924.
• La melena de la discordia. La Novela Semanal nel 1925.
• La nostálgica. La Novela Semanal nel 1925.
• El misericordia. La Novela Mundial nel 1927.
• La misionera de Teotihuacán. La Novela Mundial nel 1926.
• Se quedó sin ella. La Novela d'Oi nel 1929.
• Los endemoniados de Jaca (Novela misteriosa). Novelas i Cuentus nel 1932.
• La que quiso ser maja. Santus de Loygorri, La Novela Passional. Reed. Sevilla, Renacimiento nel 2000.
• Hasta renacer, Presa Populal.
• El abogado.
• En la guerra.
• Honor de familia.
• Cuentos de Colombine. Valencia. F. Sempere y Compañía nel 1908.
• Mis mejores cuentos. Sevilla. Editoriales Andaluzas Unidas nel 1986.
• La flor de la playa y otras novelas cortas. Mairil, Castalia nel 1989.
• La mujer fría y otros relatos. Nota preliminar por Eduardo Mendoza. Prólogu de Amparo Hurtado. Barcelona. Círculo de lectores nel 1996.
• La mujer fría (i otras relatiñas). Mairil, Ediciones Torremozas nel 2012.
• Ellas y ellos o Ellos y ellas: Novelas cortas de Carmen de Burgos, Colombine. Huso editorial nel 2016.
• Three Novellas: Confidencias, La mujer fría y Puñal de claveles. Manchester University Press, Reinu Uniu nel 2016.

Traducionis

• Helen Keller. La historia de mi vida (muda, sorda y ciega) nel 1904. 2.ª edición, Sevilla. Renacimiento nel 2012.
• Leo Tolstoy. La guerra ruso-japonesa, Valencia. Prometeo nel 1909.
• Paul Julius Moebius. La inferioridad mental de la mujer. Sempere y Cía. nel 1909.
• Conde Gera Mattachich. Loca por razón de Estado (La princesa Luisa de Bélgica). Mairil. Viuda de Rodríguez Serra nel 1904.
• Ernesto Renan. Los Evangelios y la segunda generación cristiana. Valencia. Sempere y Cía. nel 1904.
• Ernesto Renan. La Iglesia cristiana. Valencia. Sempere y Cía. nel 1904.
• León Deutsch. Diez y seis años en Siberia. Dos volumis. Valencia. Sempere y Cía. nel 1906.
• Roberto Bracco. En el mundo de las mujeres (Conversaciones feministas). Mairil. Viuda de Rodríguez Serra nel 1906.
• Georges de Bouhelier. El rey sin corona nel 1908.
• Longo, Dafnis y Cloe (de la versión francesa de Santiago Amyot). Valencia. Prometeo nel 1910.
• Emilio Salgari. La conquista de un imperio (en «viagis i aventuras» dela Biblioteca Arti i Literatura). Casa Editorial Maucci nel 1911.
• Emilio Salgari. Los misterios de la India. Casa Editorial Maucci nel 1911.
• Emilio Salgari. Los últimos filibusteros. Casa Editorial Maucci nel 1911.
• Pablo Mantegazza. Fisiología del placer (a raís dela quinta edición italiana). Dos volumis. Casa Editorial Maucci nel 1913.
• John Ruskin. La corona de olivo silvestre, El trabajo, El tráfico, La guerra, Los jardines de las reinas. Valencia. Prometeo del 1911 al 1913.
• John Ruskin. Las mañanas en Florencia. Valencia. Prometeo nel 1913.
• John Ruskin. Las piedras de Venecia. Valencia. Prometeo nel 1913.
• John Ruskin. Las siete lámparas de la arquitectura. Valencia. Prometeo nel 1913.
• John Ruskin. Los pintores modernos. El paisaje. Valencia. Prometeo nel 1913.
• Max Nordau. Fábulas. Cuentos a Mimí (Cuentos a Maxa). Barcelona. Casa Editorial Araluce nel 1914.
• John Ruskin. El reposo de San Marcos. Historia de Venecia. Valencia. Prometeo nel 1915.
• John Ruskin. La Biblia de Amiens. Valencia. Prometeo nel 1916.
• John Ruskin. Los recuerdos de mi juventud. Valencia. Prometeo nel 1913.
• John Ruskin. El valle del Arno. Valencia. Prometeo nel 1913.
• La decisión nel 1917.
• Rose Nicolle. Una idea de parisiense por página nel 1917.
• H. Besser. La perseverancia. Ediciones Españolas nel 1919.
• Madame de La Fayette. La princesa de Clèves.
• Marcelle Tynaire. Mi grande.
• Marcelle Tynaire. La dulzura de vivir (en «La novela literaria»). Valencia. Prometeo nel 1920.
• J. H. Rosni. La indomada.
• Anatole France. El tío Geromo (Crainqueville).
• Cuentistas italianos.
• Gerardo de Nerval. Las hijas del fuego. Prólogu de Ramón Gómez de la Serna. Mairil. Biblioteca Nueva nel 1931.
• Rachilde. El ratoncito japonés. Nota d'Alberto Insúa. Mairil. Rivadeneyra nel 1923.

Omenagis

Passeu marítimu col su nombri, ena su ciá.

Sonin muchus los omenagis que l'án hechu dandoli'l su nombri a callis o edificius púbricus d'Almería, ena su provincia de nacencia i en otrus laus. Dentri ellus están:

• Muchas ciais tien una calli col su nombri comu: Málaga, Mairil, Cuenca, Atarfe, La Carolina, Guadalajara, Montilla, Lebrija, Roquetas de Mar, Chiclana de la Frontera, Graná, Albacete, Andújar i Miranda d'Ebru.
• Ena capital d'Almería se dió el su nombri al Passeu Marítimu dela ciá.
• Ena capital de Málaga i en Cabra ain escuelas púbricas col su nombri.
• L'estitutu d'Educación Segundaria d'Alovera i el de Huércal d'Almería, llevan el su nombri.

Nel 2017 la Bibloteca Nacional d'España comemoró el cientu cincuenta cumpriañus dela su nacencia con una mostración biblográfica i una mesa reonda. En jullu del 2018 la Associación Herstóricas. Estoria, Mugeris i Géneru i el Coletivu Autoras de Cómic, hizu un proyeutu de caraiti coltural i educativu pa visibilizal la portación estórica delas mugeris ena sociedá i refressional sobri la su assencia con un juegu de cartas, aondi una d'estas cartas estava dedicá a Carmen de Burgos.

Guipal tamién

• Femenismu
• María Lejárraga

Biblografía

• Arroyo Almaraz, Antonio nel 2010. Crítica y difusión literarias por Perico el de los Palotes. ARBOR Cencia, Pensaeru i Coltura, Velumi 186. Númiru Estrordinariu de juñu. ISSN 0210-1963.
• Caballé, A nel 2003. La vida escrevía polas mugeris: Contandu estrellas. Siegru XX 3. Barcelona. Círculo de lectores.
• Gómez-Martín, María. Copena, Damián nel 2022. Sedrá dueña dela su suerti. L'apuesta pol espaciu agrariu nel discussu contra–endustrial de Carmen de Burgos del 1903 al 1915. Estoria i Comunicación Social. doi:10.5209/hics.84398. Consultau el 31 de deziembri del 2023.
• Núñez Rey, Concepción nel 2014. Una puenti dentri España i Purtugal: Carmen de Burgos i la su amistá con Ana de Castro Osório. ARBOR Cencia, Pensaeru i Coltura, Velumi 190 (766). ISSN 0210-1963.
• Utrera, Federico. Majadahonda: Hijos de Muley-Rubio nel 1998. Memorias de Colombine, la primera periodista. ISBN 84-923433-1-1.
• Bravo Cela, Blanca. Carmen de Burgos, Colombine. ISBN 84-670-1266-8.
• Concepción Núñez Rey nel 1992. Carmen de Burgos, Colombine del 1867 al 1932. Biografía i obra literaria. Tessi dotoral. Nuversidá Complutensi de Mairil.
• Ramírez Gómez, Carmen nel 2000. Mugeris escrevientis ena impresa andaluza del siegru XX, dendi'l 1900 al 1950. Sevilla. Velumi 41 dela Nuversidá de Sevilla. Serii: Literatura. ISBN 9788447205608.

Atijus p'ahuera

• En Commons ai conteníu multimedia sobre Carmen de Burgos.
• Obras digitalizadas de Carmen de Burgos Ena Biblioteca Degital Hispánica dela Biblioteca Nacional d'España.
• Perfil en autores de la BNE Carmen de Burgos.
• Mujeres en la historia - Carmen de Burgos 'Colombine' RTVE.
• Carmen de Burgos Seguí, Por qué firmé con nombre de hombre Associación Crássicas i Moernas.

• Datos: Q5752699
• Multimedia: Carmen de Burgos / Q5752699
• Citas célebres: Carmen de Burgos
• Textos: Autor:Carmen de Burgos