Delavón

El delavón o lisu

El delavón [delaˈβ̞õŋ] (nom. cient. Chalcides bedriagai) es lagartu dela familia delos escíncidus, comparanti a una culebrina, cona que populalmenti se confundi.

Sinonimia

Los delavonis se llaman tamién deslavonis i aldavonis, tós tres dimanaus del latín delabi 'esvaral', pola aparencia ala culebra. En angunus puebrus comu Calamonti, Burguillus del Cerru o Feria los conocin comu lisus.

Morfología

Es un lagartu pequeñinu, de cabeça enanchá, peru chica, con el hozicu aguzaínu. El cuerpu es cortu i canchúu i está cubiertu de escamas lisas i brillosas, de colol pardu-azitunau. Los remus son chicus i tien un rabu reondu de seción más chicu que'l cuerpu. Las hembras son más grandis que los machus.

Esparramamientu

Esti lagartinu se halla na península Ibérica, destendíu por quasi que tol territoriu desquitandu las zonas más montañosas del norti.

Comportamientu

Suelin vivil en ambientis frescus, peru de suelu aterrau i con rollus o canchus en que puean enhurelal-si i con partis de ressolana andi cogel temperatura. Con tó i con essu, es una especii mu delicá i sensibli alas muacionis del terrenu i ala presencia del ombri.

Creyencias

Esti animalinu, totalmenti inofensivu, sin embargu pola su horma i colol comparanti ala delas culebras, tradicionalmenti á estau presenti drentu dela creyencia i del reflaneru popularis comu un animal dañinu. Es corrienti entre la genti vieja el reflán:

Si te pica el delavón, cogi picu i açaón.

Con el sentíu de sel la su picaúra mortal, comu la de ciertas culebras.

Mesmu en angunus puebrus esti animal lo relacionan con los culebrus, enfermedá que crein que trasmiti si toca la ropa duranti se verdea o solea.