Diego de San Pedro

Esti artícalu no tien huentis ni referencias Los conteníus duosus debin sel corretamenti atijaus pa demuestral que no se trata de vestigacionis primarias.

Diego de San Pedro
Enhormación pressonal
Nacencia	1437
Muerti	1498
Nacionalidá	Española
Enhormación profissional
Oficiu	Escrevienti, poeta y prosista

Diego de San Pedro [ˈdjeɣo ðe sam ˈpeð̪ɾo] (en castellanu antíguu Diego de Sant Pedro) hue un poeta i escreviol español del sigru XV.

Biografía

No se tienen muchas enteracionis a tentu la via d’esti autol i las poquinas que essistin están abarullás, por mol d’otrus Diegos de Sant Pedro de pa las mesmas fechas. Las enteracionis palran de vel siu Diego hialgu que vivió ena segunda metá el sigru XV i que las sus obras son de denpues de 1470 (enque se espubricarun ena última décaa sigru). Los demás datus se puein destrael de los prólogus las sus obras, enque comu aconteci siempri enos datus autobiográficus endrentu la ficion, tienin que entendel-se con cudiau. Assín pareci que sirvió an cá el condi d’Urueña, que gozava de agarris ena corti isabelina, que conocia i tratava con Marina Manuel, bisnieta de don Juan Manuel i que puu vel participau ena guerra Graná. En unas décimas que escrevió nel Desprecio de la Fortuna, pieça maura, s’arrepienti de los sus anterioris escritus.

Obra

L’obra Diego de San Pedro s’encasulla endrentu el relatu sentimental que mestura várias hormas (prosimetria, carta, sermón). Sus testus huerun de los mas traduzius i leius nel sigru XVI. Escrevió várias obras:

• Tractado de amores de Arnalte y Lucenda. Hue de las sus obras mas conocias en toa Uropa i tien hondón palaciegu.
• Cárcel de amor (espubricâ en 1492). Obra amol bella por usu la alegoria i destintus procedimientus estilísticus i narrativus que la llevarun a sel un auténticu best-seller entre los sigru XVI i XVII.
• Sermón. Sermoninu adotrinaol pa cural las cutas los namoraus.
• Pasión trovada.
• Desprecio de la fortuna. Poema que apareci nel Cancionero General de Hernando del Castillo.

Biblografía

• Diego de San Pedro, Cárcel de amor. Arnalte y Lucenda. Sermón, ed. J. F. Ruiz Casanova, Mairil, Cátedra, 2004^3.

• Datos: Q982956
• Multimedia: Diego de San Pedro / Q982956