Dulce Chacón

Dulce Chacón
Enhormación pressonal
Nombri de nacencia	Dulce Chacón Gutiérrez
Nacencia	3 de junio de 1954 Zafra (España)
Muerti	3 de diciembre de 2003 (49 años) Madrid (España)
Causa de muerti	Cáncer de páncreas
Nacionalidá	Española
Familia
Padre	Antonio Chacón Cuesta
Enhormación profissional
Oficiu	Escrevienti, poeta y novelista
Ária	Poesia
Añus ativu	desde 1992
Género	Poesia y Teatru

Duci Chacón Gutiérrez (Çafra, Badajós, 3 de juñu del 1954 - Brunete, Mairil, 3 de deziembri del 2003) hue una escreviora i puetisa estremeña. Era ermana gemela dela tamién escrevienti Enma Chacón.

Biografía

La su nacencia hue en Çafra, Badajós, nuna familia pudienti i conservaora, siendu una aristócrata, de derechas i del bandu nacional, dichu por ella mesma, enque mas tardi los sus ideais d'isquierdas la llevarun a entental sacal ala lús los archivus delas execucionis duranti'l franquismu o a esponel-si ala guerra d'Iraq. Ella era una pessona ilustrá con azoguis literarius, pos escrevía, possimenti baxu’l nombri de Hachi i leyía puesía ala su familia, lo qu’aballó la su vocación literaria, a una edá mu jovin.

El su pairi Antoniu Chacón Cuesta, hue alcaldi dela ciá de Çafra ena ditaúra de Francu i quandu ella tenía namás qu'onzi añus d’edá, el su pairi espenó i un añu endispués, la su mairi María Gutiérrez, se hue a vivil con tola familia a Mairil, aondi vivió dendi antoncis. Duci i la su ermana gemela Enma, huerun a estuyal a un internau i hue pallí aondi esmençó a escrevil puesía, pa clissal-si delas dificis cercustancias pessonais qu’andava viviendu. Las leturas dela su moceá, huerun de puetas comu Celan, Rilke, César Vallejo i José Ángel Valente, que le dexarun una grandi huélliga nel su estilu puéticu. Otras infrugencias d’endispués huerun Félix Grande, ena puesía, i Julio Llamazares, Luis Landero i José Saramago ena narrativa​. Conos mentaus Luis Landero, José Saramago i la su mugel, Pilar del Río, tenía una mu grandi amistá.

Castañeru enos montis de El Tornu, Caçris.

L’assuntu dela su obra hue la represión franquista i possimenti la sitación delas mugeris ena sociedá. Pol su comprometimientu social, perteneció ala Associación de Mugeris contra la Violencia de Géneru, tamién ala Associación de Mugeris contra la Guerra i al Bandu de Coltura contra la Guerra, dambas dos acaberas en avenecia ala envasión d’Iraq pal 2003. Varias escuelas i estitutus, assina comu premius literarius i callis de varias ciáis, llevan el su nombri comu omenagi ala su figura.

Espenó el tres de deziembri del 2003, vítima dun canci de pancria que l’avían vistu un mes anantis i que s’avía destendíu pol hígau. Las sus zenizas huerun assentás ena su localidá de nacencia, junta los restus mortais del su pairi, Antoniu Chacón, enque parti delas sus zenizas huerun esperriás enos montis de El Tornu, qu'es un puebru chiqueninu del Valli del Xerti en Caçris. Dexó solus al su ombri, dos ijas i un iju. No devemus tracamundeal a Duci con Dulce Chacón, qu’es una ilustraora i artista mexicana.

Correúra literaria

Enque esmençó a escrevil de mu nueva, no pubricó el su primel libru, el poemariu Querrán ponerle nombre, hata’l 1992. Aluspués, pubricó dos obras puéticas, Las palabras de la piedra nel 1993 i Contra el desprestigio de la altura nel 1995, Pola que ganó el premiu Ciá d’Irún, que hue el su primel premiu. ​Alogu, esmençó a escrevil novelas i assina nel 1996 pubricó Algún amor que no mate, sobri una mugel esbreá pol su ombri. José Saramago dixu della qu’era una mugel dura peru precisa. Un añu endispués pubricó la su segundera novela, Blanca vuela mañana. El añu 1998 hue mu intesu, pos pubricó Matadora, qu’es una biografía de Cristina Sánchez, la primel mugel torera española, tamién inaguró la su primel obra teatral, Segunda mano i amás pubricó la su tercel novela, Háblame, musa, de aquel varón. aondi retoma angunu delos assuntus de Algún amor que no mate, comu la violencia doméstica o tamién sobri otras hormas de bruteá, comu la senofobia. Col libru esti, cerró una trilogía sobri la encomunicación ena collera.

Endispuesinu escrevió un nuevu poemariu, Matar al ángel nel 1999 i essi mesmu añu Cielos de barro, qu’era una novela coral ambientá ena Estremaúra dela posguerra i que la presentó ala edición del 2000 del premiu Azorín baxu’l nombri de Hachi. Esta novela ganó el premiu i estava dedicá al su pairi, el que huera alcaldi dela ciá de Çafra, Antoniu Chacón. El títulu hue un hoqui de l’escrevienti Julio Llamazares.

La su siguienti novela hue La voz dormida, pubricá nel 2002 i que tardó quatru añus n’acabijal-la, aviendu esmençau a arrejuntal géneru, mesmu anantis dela pubricación de Matar al ángel i Cielos de barro. Nesta novela acontinó tratandu los difícis añus dela posguerra, novelandu los testimoñus de mugeris vítimas dela represión franquista polos añus quarenta, arrecogíus n’entrevistas por toa España. La novela s’agenció el premiu Libru de l’Añu 2003, atorgau pol Setol de Librerus de Mairil. Nel 2002, s’inaguró l’adatación teatral de Algún amor que no mate, que la hizu ella mesma i amás derigió l’adatación Eduardo Vasco. Tamién​ pal 2003 pubricó sotru poemariu, Cuatro gotas. Ala finiquita, la carrera de Duci Chacón la estroncó la su muerti prematura.

Correúra social i política

Enque era duna familia conservaora de derechas, muó mu prontu pa hazel-si una pessona d’isquierdas, pos sigún dixu, unu delos motivus hue el silenciu dela su familia a tentu dela represión franquista, mu doloría​ ena su ciá de Çafra, aondi enos primel mesis dela Guerra Civil, endispués de sel tomá polos franquistas el ochu d’abostu del 1936, unas dozientas cincuenta pessonas huerun assessinás polas nuevas utoridais. La localidá tenía sieti mil abitantis i dispuesinu l’esmiençu dela guerra i anantis dela entrá delas tropas, nenguna pessona hue assessiná. El motivu delas muertis nel franquismu o hue una delas sus prioridais, siendu’l su parecel qu’el rancol dimanau dela violencia política ena Guerra Civil i nel franquismu sigui atranquijau, pol no avel siu presentau ala lús púbrica. Assina el su lema era "ni rancol, ni olvíu". Tamién dixu que l’arreglu rálidu entavía no á llegau, porque assín i tó no s’á hechu essa convessación. Avemus oyíu la vessión delos venceoris, agora tenemus qu’oyíl alos vencíus.

Assina, s’envinculó a numirosas atividais sociais i políticas de caraiti pogressista i escrevió La voz dormida, obra ena que arrecogi i novela testimoñus de mugeris del lau perdeol dela Guerra Civil de toa España. Eno tocanti ala envasión d’Iraq, hormó parti del bandu Coltura contra la guerra i junta’l premiu Nobel José Saramago, leyó el declarau contra la guerra que afechó la grandi manifestación del quinzi de marçu del 2003 en Mairil. Tamién hue a Bagdad en marçu del mismu añu, comu biembru del bandu Mugeris contra la Guerra, pa conocel la sitación del puebru iraquí i la su esposición al conflitu. Amás, perteneció ala Associación Mugeris contra la Violencia de Géneru i tamién hormó parti del Coletivu Ermanus, Amegus i Apañerus de José Couso, que hue’l retratista assessinau polas tropas estauniensis en Bagdad ena envasión. El su maríu Miguel Ángel Alcántara, la definió comu una bregaora, d’isquierdas, inrálida, reñiora i que la su mejol arma era la su parabra i la su escreviúra.

Reconocencias

La su ciá de nacencia l’atorgó el destinguimientu de Ija Predileta dela Localidá de Çafra, endispués dela su muerti, el dezissieti de hebreru del 2005. Tamién á dau el su nombri a una praça i estituíu un premiu de narrativa española col su nombri. Nel 2003 en Brunete, la localidá mairileña aondi vivía, hizu’l Premiu Literariu de Novela Corta Duci Chacón.

Calli ena ciá de Sevilla.

Nel 2009, Barricada pubricó el libru-CD La tierra está sorda, con deziochu cancionis relacionás cona represión franquista. Sigún dixu Enrique Villarreal «El Drogas», derigiol del grupu, hue la letura de La voz dormida lo que le hizu crial el libru-CD. Angunas delas cancionis s’ispiran derechamenti enos testimoñus arrecogíus i novelaus por ella nesta novela. Barricada presentó el trebaju ena ciá de Çafra el dezinuevi de marçu del 2010.

L’Estitutu d’Educación Segundaria Obrigatoria de La Garrovilla en Badajós, se llama comu ella dendi’l añu 2005, assina es mentau comu IESO Duci Chacón, n’acordança dela escreviora. La salona d’actus de Tocina en Sevilla, lleva’l su nombri i tamién una Escuela Púbrica ena localidá mairileña de Fuenlabrada, sotra ena localidá de Rivas-Vaciamadrid i sotra ena ciá estremeña de Caçris. La biblioteca prencipal dela Nuversidá Uropea de Mairil, tamién lleva’l su nombri, assina comu una tupa de callis en monicipius i ciáis.

Premius

• Premiu Ciá d'Irún de puesia nel 1995, pol libru Contra el Desprestigio de la altura.
• Premiu Azorín de novela nel 2000, pol libru Cielos de Barro.
• Mentación d'Onol atorgau pola Plataforma de Hombres Contra la Violencia Doméstica en Fuenlabrada, nel 2001, pol libru Algún amor que no mate.
• Premiu Ochu de Marçu, en marçu del 2003, pol libru La Voz Dormida atorgau pola Concejalia dela Mugel del Ayuntamientu de Móstoles.
• Premiu dela Federación de Asociaciones de Mujeres Progresistas de Valencia, pol libru La voz Dormida en marçu del 2003.
• Premiu Meridiana, del Estitutu Andalús dela Mugel, ala su trayetoria literaria nel defendimientu delos derechus dela mugel, en marçu del 2003.
• III Edición del Premio del Gremio de Libreros de Mairil al mejol libru del añu 2002, pol libru La Voz Dormida, atorgau n'abril del 2003 i entriegau el sieti de juñu del 2003.
• Premiu Cartelera Turia pol libru La voz Dormida, en jullu del 2003.
• VII Edición del Premiu Ochu de Marçu, en marçu del 2004, atorgau endispués de moril pol Ayuntamientu de Getafe, ala su trayetoria literaria nel defendimientu delos derechus dela mugel.
• Premiu Justicia, en marçu del 2004, atorgau endispués de moril pola Asociación de Derechos Humanos de Extremadura, ala su trayetoria literaria en cata dela recordaera estórica i nel defendimientu delos derechus umanus.
• Premiu Vetonia-Voz Castúa, en marçu del 2004, atorgau endispués de moril pola Asociación Extremeña de Alcorcón, ala su trayetoria literaria.
• Premiu Ana Tutor, en marçu del 2004, atorgau endispués de moril pola Federación Socialista Madrileña, ala su trayetoria literaria.
• Nombrá a Mejol Autol polos premius Max 2004 de Teatru, pol libru Algún amor que no mate.
• Medalla d'Oru de l'Associación Coros y Danzas El Castellar, de Çafra.
• Medalla d'Oru d'Estremaúra, en setiembri del 2004, atorgau pola Junta d'Estremaúra endispués de moril.
• Medalla d'Oru dela Casa Regional Estremeña de Getafe, en novembri del 2004.

Obra

Puesia

• Querrán ponerle nombre, nel 1992.
• Las palabras de la piedra, nel 1993.
• Contra el desprestigio de la altura, nel 1995.
• Matar al ángel, nel 1999.
• Cuatro gotas, nel 2003.

Novelas

• Algún amor que no mate, nel 1996.
• Blanca vuela mañana, nel 1997.
• Háblame, musa, de aquel varón, nel 1998.
• Cielos de barro, nel 2000.
• La voz dormida, nel 2002. Premiu Libru de l'Añu 2003.

Biografías

• Matadora nel 1998.

Teatru

• Segunda mano, nel 1998.
• Algún amor que no mate, nel 2002.

Cuentus

• Te querré hasta la muerte, nel 2003. 61-64.

Atijus p'ahuera

• En Commons ai conteníu multimedia sobre Dulce Chacón.
• web de Çafra
• El Castellar de Çafra Corus i Danças.

• Datos: Q466820
• Multimedia: Dulce Chacón Gutiérrez / Q466820
• Citas célebres: Dulce Chacón