Eletricidá

Dendi Güiquipeya
(Rederihiu dendi Eletriciá)
Sartal a: Güiquipeandu, Landeal
La eletricidá nuna de las sus manifestacionis naturalis: el relámpagu.

La eletricidá (del griegu elektron, que senifica ámbal) es un fenómenu físicu cuyu origin son las cargas elétricas i cuya energia se muestra en fenómenus mecánicus, térmicus, luminosus i químicos, entri otros[1] [2][3][4], en otras parabras es el fluju d'electronis. Se puei vél de holma natural en fenómenus amosféricus, por ejemplu los rayus, que son descargas elétricas producias pola transferencia d'energia entri la ionosfera i la superficii terrestri (procesu compleju del que los rayus solu holman una parti). Otrus mecanismus elétricus naturalis los poemus alcontral en procesus biológicus, comu el huncionamientu del sistema nerviosu. Es la basi del huncionamientu d'albondu máquinas, dendi chiquininus eletrodomésticus hata sistemas de gran potencia comu los trenis d'arta velociá, i assina con tolos dispositivus eletrónicus.[5] Amás es esencial pala producion de sustancias químicas comu el aluminiu i el cloru.

Tamien se conoci comu eletricidá a la rama de la física qu'estudia las leis que rigin el fenómenu i a la rama de la tenología que la gasta en aplicacionis práticas. Dendi que, en 1831, Faraday descubriera la holma de proucil corrientis elétricas por enducion —fenómenu que premiti transholmal energia mecánica en energia elétrica— s'á convertiu nuna de las holmas d'energia mas emportantis pal desarrollu tenológicu debiu ala su faciliá de generacion i distribucion i al su gran númiru d'aplicacionis.

La eletricidá es originá polas cargas elétricas, en reposu o en movición, i las enteracionis entri ellas. Quandu varias cargas elétricas están en reposu relativu s'ejercin entri ellas huerças eletrostáticas. Quandu las cargas elétricas están en movicion relativu s'ejercen tamien huerças manéticas. Se conocin dos tipus de cargas elétricas: positivas i negativas. Los átomus que conhorman la materia contienin partículas subatómicas positivas (protonis), negativas (eletronis) i neutras (neutronis). Tamien ain partículas elementalis cargás qu'en condicionis normalis no son establis, polo que se muestran solu en determinaus procesus comu los rayus cósmicus i las desintegracionis radiativas.[6]

La electricidá i el manetismu son dos aspetus deferentis dun mesmu fenómenu físicu, denominau electromanetismu, descritu matemáticamenti polas ecuacionis de Maxwell. La movicion dun campu elétricu i la movicion acelerá de cargas elétricas genera ondas eletromanéticas (comu enas descargas de rayus que puein cuchal-se enos recetoris de radiu AM).[7]

Debiu a las crecientis aplicacionis de la electriciá comu vetol energéticu, comu basi de las telecomunicacionis i pa el procesamientu d'enholmacion, unu de los prencipalis desafíus contemporáneus es generá-la de mó mas eficienti i con el ménimu enpatu ambiental.

Huentis[eital | edit source]

  1. El pequeño Larousse Ilustrado 2006 Editorial Larousse, S. A ISBN 970-22-1233-2
  2. Enciclopedia ilustrada Cumbre 1958 Editorial Cumbre, S. A.
  3. Gran diccionario enciclopédico siglo xxi 2001 Ibalpe Internacional de Ediciones, S. A. DE C.V ISBN 958-615-582-X
  4. http://omega.ilce.edu.mx:3000/sites/ciencia/volumen2/ciencia3/107/htm/sec_16.htm 17 de júliu 2008
  5. Enciclopedia de Ciencia y Técnica Tomo 5. Electricidad 1984 Salvat Editores, S. A. ISBN 84-345-4490-3
  6. http://www.universidadperu.com/electricidad-peru.php
  7. Enciclopedia de Ciencia y Técnica Tomo 5 . Electricidad 1984 Salvat Editores S.A ISBN 84-345-4490-3