Diferencia entre revisiones de «Mielra»

Dendi Güiquipeya
Contenido eliminado Contenido añadido
Tiu Fraili (carava | Contribucionis)
Criá página con 'La mielra [ˈmi̯elra] (nom. cient. Turdus merula) es un'avi dela familia delos túrdidus bastanti destensa por Uropa. == Nombri == En estremeñu esta avi se mienta pol feme...'
(Sin diferencias)

Revisión de 18:59 10 Heb 2015

La mielra [ˈmi̯elra] (nom. cient. Turdus merula) es un'avi dela familia delos túrdidus bastanti destensa por Uropa.

Nombri

En estremeñu esta avi se mienta pol femeninu mielra quandu se palra dela especii. Sin embargu, comu es un avi que se destaca por varial muchu el machu dela hembra, pa hazel el destinguimientu se dizi el mielru i la mielra.

Morfología

Esta especii se destaca pol dimorfimu sessual. El mielru es enteramenti negru, desquitandu el picu anaranjau i el reondel al reol delos ojus. La mielra i las crías tienin la espalda negra, la barriga parda escura i moteá i el pechu pardu claruciu.

Esparramamientu

La mielra vivi por quasi que toa Uropa, menus enas partis más frías de Escandinavia, i en Asia i el norti d'África.

Comportamientu

Las mielras vivin en alameas i sotus, monti i jardinis. Son avis mu territorialis sobre tó entrandu la primavera, cosa que has que las hembras, de naturaleza respeleña, s'afrentin entre ellas, tuviendu agarronis bastanti violentus. Los machus, que mantienin el territoriu dendi que son nuevus, riñin más a menúu que las hembras, peru los enganchis son más cortus i efetivus, concediendu la retirá del mielru intrusu.

Los níus están hechus de yerva i fusca i suelin hazé-lus ena horcaja delos árvulis o en sitius resguardaus delos edificius. La puesta es de quatru o cincu uevus de colol azul clarinu con pintinas colorás. Estus uevus son mu golosus pa otrus páxarus comu las pegas i mesmu los gatus.

Enque son avis omnívoras, le gustan de comel miñocas. Tamién comin bagas de destintas matas, bagus comu uvas o azitunas i fruta.

El machu tien un cantu mu señalau al alva i al lubrihoscu. S'acoloca en sitius altus comu árvolis i si es en sitiu urbanu enas entenas o piringutus delos tejaus pa cantal, destraçandu assina la su socampana territorial. Pa caberus dela inverná i enos mesis de primavera es quandu más se sienti cantal.

Suelin vivil de tres a quatru añus, enque en un ambienti sin depredaoris puein alcançal los quinzi añus d'edá.