Cal

La cal es un ahuntaol holmau prencipalmenti pol carbonatu cálcicu (CaCO₃) derivau de las rocas caliças.

Componentis

Las rocas caliças que holman la cal nu son totalmenti puras, amás de carbonatu cálcicu, s’alcuentran compuestas pol carbonatu manéssicu, sílici, alumina i óssidu férricu.

Sigún seya el su continiu en sílici, las rocas que holman la cal sedrán:

• Caliças margosas: con menus del 15% en sílici.
• Margas: 15-30% en sílici.
• Margas arcillosas: 30-75% en sílici.
• Arcillas: compuestas pol más del 75% en sílici.

Crassis

Dessistin dos tipus de calis, sigún contengan más u menus óssidu cálcicu ena su composición.

Cal aérea u viva

La cal aérea u viva es mu rica en CaO: en su mayol parti son óssidu cálcicu u óssidu cálcicu i óssidu de manésiu.

Tiini la propieá d’idratalsi al entral en contatu con el áugua, i d’endurecel (solu nel airi) pol carbonatación (al entral en contatu el óssidu cálcicu con el CO₂ del airi se holma CaCO₃).

Al mesturalsi la cal viva con cierta cantiá d’áugua, la cal viva passará a sel cal apagá.

Cal idráulica

La cal idráulica tiini una menol concentración de CaO que la cal viva (puein consideralsi cumu sustáncias entrimeyas entri la cal pura i el cementu).

Cabi destacal que la cal idráulica tiini una tupa sustáncias ena su composición (cal, sílici, alumina...), i son estas sustáncias las que le dan caratel idráulicu. Estas calis possein un fraguau mas liheru que la cal viva, i pa endurecel un les es mestel CO₂ (son escapacis d’endurecel tantu en airi cumu en áugua).

Dessistin dos crassis de calis idráulicas, sigún estén holmás pol más u menus manéssia:

• Grassas: holmás pol menus de un 5% de manéssia.
• Magras: holmás pol más de un 5% de manéssia.

Ússius

La cal tiini albondus ússius:

• Ena costrución, cumu ahuntaol.
• Ena endústria.
• Ena naturaleza, pa limpial áuguas negras, dessinfetal, eliminal malus oloris...