Diferencia entre revisiones de «Barrau»

Barrau es un monicípiu la província e Caçris, assitiau nel Valli el Herti, enas estribacionis la Sierra e Greus, concretamenti ena Sierra e San Bernabé. Luenga 24 qm de Praséncia, 108 qm de Caçris, 171 qm de Méria i 251 qm de Mairil.

Assitiamientu

Barrau s'alcuentra assitiau enas estribacionis la Sierra e Greus, concretamenti ena Sierra e San Bernabé, que preteneci a la Sierra e Tormantus, ena parti e la montaña conocia cumu lombu La Vetún.

El términu monicipal es chiqueninu, alreol los 20 qm² i con emportantis desnivelis i huertis pendientis, que varian dendi los 657m d'artitú enas prosimidais de Gargüera, hata los 1115m el lombu la Porrilla i los 1113m de Huentimoral, las sus cimerias.

La redi idrugráfica la conhorman varias gargantas cumu la Garganta el Obispu, i regachus cumu los Cañus i Gargolesnas, tós ellus pretenecientis a la cuenca e riu Tiétal.

Los suelus están hundamentalmenti sobri granitus el Paleoçoicu, de composición mineralóhica mu unihormi, peru e testura variá. Son, en heneral, de granudiuritas i cuarçumonçonitas leucócratas, frecuentementi porfiroidis de tonus azulis cuandu son frescas i con albondus gabarrus.

Los bagus están costituius pol una tupa cuarçu, micruclina pertítica, oliguclasa-andesina, biutita i moscuvita. Entri los mineralis acesórius, los mas frecuentis son el apatitu i el circón.

Climatulohia

Barrau tini vranus frescus i ibielnus nu ecesivamenti durus. La precipitación es abundanti i oscila entri los 800 i 1500 mm, mentris que la temperatura meya las ménimas varia entri los 1-3ºC en ibielnu i los 15-20ºC en vranu.

Vehetación

Las especis mas abundantis son el robri melohu (Quercus pyrenaica) que horma densus bosquis i el castañu (Castanea sativa), que da lugal a espesas hormacionis, gastaus prencipalmenti pa usu maereru. Puein alcuentralsi tamién abondus fresnus, chopus, azebus, arraclanis, saucis, madroñus, enebrus, pinus, almecis, higueras, mahuelus, pergüétanerus, mançanus, saúcus, zerezus silvestris, i alisus, estus úrtimus hormandu bosquis de ribera.

En cuantu al matorral está hormau ena su mayol parti pol escobas, çarças, jaras, cantuesus, torviscus, ruscus, esparragueras, espinus albaris, henistas frorias, durillus, madreselvas, bereçus, tomillus, labiérnagus, mirtus, peonias, rosas silvestris, ec.

Demugrafia

Puebración de Barrau (1877 – 2005)
1877	1887	1897	1900	1910	1920	1930	1940	1950	1960	1970	1981	1991	2001	2005
619	520	587	613	629	708	748	873	915	937	828	660	583	524	507

Economia

Se basa hundamentalmenti ena agricurtura, siendu los prencipalis curtivus las zerezas, azetunas, castañas i higus (albundandu en mayol cantiá el curtivu las primeras, sobri tó endi los añus 60, cuandu se cria la "Cooperativa del Campo de Nuestra Señora del Viso", la cual sirvió pa dal un emportanti esarrollu económicu i evital la migración de presonas huera el puebru).

Tamién tinin una gran emportáncia el setol servícius i la costrución. La ativiá ganaera se centra enos setoris vacunu i caprinu. El númeru e cabeças de ganau vacunu (destinás a la endútria cárnica i en réhimin estensivu) á manteniu tantu el su númeru cumu la su proución a lo largu el tiempu, nu pasa lo mesmu con el ganau caprinu, qu'á vistu cael la su emportáncia económica i social dendi meyaus el sigru XX.

Estória

El lugal estuvu puebruau endi mu antigu, ya que nel términu monicipal ai una tupa restus romanus, cumu tumbas i aras votivas. S'á alcuentrau tamién aquí una tabrina d'esa epoca, ena que se mos palra e caminus entovia desistentis i que uñian la puebración de Tehea el Tiétal con el valli el Herti.

Naci cumu núcliu pastoril. Cabrerus de Piornal s'asiahan definitivamenti pa aprovechal los pastus que proucin estus vallis chiqueninus. En decumentus la ciá e Praséncia, Barrau apaici anombrau nel añu 1464 cumu un bárriu i los sus abitantis cumu vizinus de Piornal, peru nel añu 1498 ya se palra d'él cumu entiá endependienti, cuentandu nesi momentu con 55 vizinus pecherus, colo que se puei cifral aprosimadamenti la puebración nunas 250 presonas nesi momentu.

Logra el entítulu e Villa e Señoriu i el 12 e Hebreru e 1753 apaici vinculá a Don Antonio Díaz de Vargas Coronel Tamayo y Rosa, vecinu e Badahó. Siendu la única puebración serrana el valli el Herti con esa destinción.

Dendi la restauración de la democrácia, i aluspués las primeras elicionis monicipalis libris, el "Partido Socialista" ganó tolas elicionis celebrás, hata las elicionis monicipalis de 2007, enas que se dió un empati ténicu entri los dos partius que se presentarun a las elicionis, lograndu dambus los dos el mesmu númeru e votus, siendu esti un hechu mu ralu. Tras un sorteu (cumu izi la lei pa estus chascus) celebrau en Praséncia i tras marral al entelpretal la lei, se dió la alcardia al "Partido Popular", siendu la primel vezi qu'ai un alcardi nu socialista nel monicipiu.

Monumentus i lugaris d'enterés

El prencipal monumentu dela puebración es la eglésia parroquial de San Sebastián. Se trata dun eificiu d'estilu románicu, con dos puertas. La e la Epístola es la mas ornamental, con arcu e meyu puntu mordurau i pometeau, tal i cumu es abitual enos templus serranus costruius duranti el sigru XVI. Cabi destacal la cúpula e meya naranha, el sigru XVIII, asín cumu el retablu mayol, d'estilu barrocu i con una profusa decoración, tal i cumu correspondi al su estilu. Es de fatura local, puestu qu'es obra e los entallaoris barraeñus: los ermanus de la Inzera Velasco, a quienis s'ebin otrus numerosus retablus enas comarcas el valli el Herti i e La Vera. La elésia tini un campanáriu e pranta cuairá, notabri artitú i con un capitel piramial ena su cimera.

Posei tamién algotru pequeñu templu católicu d'enterés: l'ermita e Santa Maria, siendu ésta el lugal ondi s'alcuentra la imahin patronal la localiá, la Vilhin el Visu. Es una eificación dieciuchesca, cuya arquitetura tini un acesu en arcu i navi deviia pol tres arcus con estribus esterioris, bóvea e cañón i cúpula semiesférica ena capilla mayol. S'embelleci el testeru pol un retablu barrocu, fechau nel sigru XVIII. Siendu, pol tantu, d'ornamentación barroca, d'áticu curvu i cuerpu deseparau pol dos colunas qu'escoltan la ornacina ondi s'adora la imahin de "Nuestra Señora del Viso", siendu ésta una talla meritória la Vilhin con el Niñu, dondi la traición local hazi lleval a las noyas los sus ramus.