Estitutu Ramón Llull

Estitutu Ramón Llull
	Entrá ala sedi del Estitutu Ramón Llull ena Avenida Diagonal en Barcelona
Organisación
Natura xurídica	Institutu públicu
Misión	Promovel la proyeción esteriol dela luenga i dela coltura catalanas.
Dependencia	Generalidá de Cataluña; Ayuntamientu de Barcelona; Gobielnu Baleal
Xefía	Iolanda Batallé i Prats, presidenta
Presupuestu añal	8 395 234 euros (2017)
Documentus instituzionális	[[1](https://llull.cat/IMAGES_22/estatuts.pdf) Estatutus del Estitutu Ramón Llull]
Localización
Xurisdizión territorial	Cataluña i Islas Balearis
Sedi	Barcelona
Estoria
Creación	5 d'abril de 2002
Sitiu n'internet
	[[2](https://www.llull.cat) Sitiu del Estitutu Ramón Llull]

Palaciu del Barón de Quadras, sedi del Institutu Ramon Llull.

L'Institutu Ramon Llull (en catalán Institut Ramon Llull, IRL) es una institución dependienti dela Generalidá de Cataluña, del Ayuntamientu de Barcelona i del Gobielnu Baleal col pesqui de promovel la proyeción esteriol dela luenga i la coltura catalanas. Tien el su nombri n'onol a Ramon Llull, filósofu i escrivienti mallorquín en luenga catalana delos sigru XIII-sigru XIV. Dendi otubri de 2018 la diretora del Institutu es Iolanda Batallé.

L'IRL es unu delos entegrantis, juntu col Gobielnu d'Andorra, el Conseju General delos Pirineus Orientalis, la ciá d'Alguer i la Ré de Ciais Valencianas, dela Fundación Ramon Llull, con sedi n'Andorra.

Estoria

L'Institutu fue creau pola Generalidá de Cataluña i l'Gobielnu delas Islas Balearis, por mé de la firma dun conveniu el 5 d'abril de 2002. La creación del Institutu aconteció nun momentu políticu nel que gobelnaban Convergència i Unió en Cataluña i un gobielnu plural de gachas en Balearis formau pol PSOE-PSIB, PSM, EUIB, Els Verds i UM). Nostanti, enas elecionis autonómicas del 25 de mayu de 2003, el PP arecuperó el gobielnu dela comuniá baleal i las relacionis entri dambos dos patronis del institutu se fuerun deteriorandu, ata que finalmenti el gobielnu baleal deciyó separal-si del mesmu el 25 de júniu de 2004. El 26 d'abril de 2005, ya col gobielnu catalán comu únicu responsabli del institutu, i colos mesmus pesquis, s'aprobarun unus nuevus estatutus. Col nuevu cambeu d'alministración en Balearis en diciembri de 2008, l'institutu gorvió a tenel comu entegrantis alas alministracionis autonómicas de Cataluña i Balearis.^[1]

Seis i delegacionis

La atual sei central del Enstitutu Ramon Llull es, dendi 2013, nel Paláciu del Baró de Quadras, un dificiu moernista construíu pol Josep Puig i Cadafalch rentri 1904 i 1906. Está situau ena avinguda Diagonal, 373 de Barcelona i es propieá del Ayuntamientu de Barcelona, quien cedió l'usu una ves qu'entró enos órganus de gobiernu dela enstitución.^[2]

El Baró de Quadras encargó a Puig i Cadafalch nel añu 1900 la costrución dela su nueva casa de Barcelona endispués d'abel acabau el su paláciu en Massanes. El dificiu está ubicau nun terrenu estrechu con fachá ala avinía Diagonal i ala calli de Rosselló, con dos fachás completamenti diferentis. Es frutu dela reforma duna antigua casa d'alquilel con fachá ala calli Rosselló, ondi entavía son visiblis algunus elementus dela estrutura preesistenti. La residencia del Barón de Quadras s'enstaló enas plantas baja i primera, destinándu-se el restu a viviendas d'alquilel. Assin, los elementus más importantis del dificiu son la fachá ala Diagonal i alos espacius i decoración interiol dela residencia de barón.

Ogañu, el dificiu está abiertu a visitas guiás los miércolis i los sábadus.

El dificiu á síu sei de diversas enstitucionis comu el Museu de la Música de Barcelona o la Casa Àsia. El Enstitutu Ramon Llull s'enstaló en 2013. Anteriormenti estaba ubicau enos bajus dela calli Diputació, 279, tamién en Barcelona.^[3] Quandu á teníu representación el Gobiernu Balear, el Enstitutu á teníu sei en Palma, primeru ena calli Capità Salom, 29 i posteriormenti ena Calli la Protectora, 10. Ogañu (2018) no tieni sei representativa en Palma.

Amás el Enstitutu Ramon Llull cuenta con oficinas en Berlín, Londri, Nova York i París.^[4]

Pesquis

El Enstitutu Ramon Llull es un organismu púbricu creau col pesqui de promovel nel esteriol los estudius de luenga i coltura catalanas nel ámbitu académicu, la tradución de literatura i pensaeru escribíus en catalán, i la produción coltural catalana en otrus ámbitus comu el teatri, el cini, el circu, la dança, la música, las artis visualis, el diseñu o l'arquitetura.

Con esta finaliá, el Enstitutu suscribi alcuerdus con nuversiais del esteriol pa promovel la docencia d'estudius catalanis i coordina i ofreci apoyu a centrus con presencia delos estudius catalanis en tol mundu. En paralelu, secunda las asociacionis enternacionalis de catalanística i estumula los estudius avançaus i la envestigación lingüística en nuversiais de prestigiu. Comu organismu oficial de certificación delos conocimientus de catalán nel esteriol, organiza prebas pa acredital los diferentis nivelis, d'alcuerdu col Marcu uropeu común de referencia pa las luengas.

Nun otru ámbitu d'atuación, el Enstitutu Ramon Llull empulsa la traducció d'obras literarias i de pensaeru escribías en catalán, ayudandu alos editoris en otras luengas que las pubrican i alos tradutoris. Se facilita el diálogu i el entercambiu rentri ensayistas i envestigadoris en luenga catalana con los sus enterlocutoris d'otras luengas, dela mesma manera qu'se favoreci la proyeción delas revistas de pensaeru i coltura en catalán, promoviendu el entercambiu colas d'otrus paísis.

Finalmenti, el Enstitutu Ramon Llull se preocupa de difundil el conjuntu dela literatura catalana en ferias del libru i d'asegural la presencia d'artistas de Cataluña en programas destacaus dela creación contemporánea enternacional, trabaja pa que la coltura catalana sea presenti en festivalis i ferias de ecu mundial; participa en eventus colturalis en ciais estratégicas i líderis en diferentis ámbitus dela creación; i promuevi entercambius rentri el setol creativu local i el enternacional con visitas de comisarius, críticus, programadoris, editoris i agentis estrangerus p'asistil a festivalis, esposicionis, estrenus, conciertus o conferencias en Cataluña.^[5]

Atividais

L'Institutu Ramon Llull desenvolvi una política de colaboración con diversas institucionis colturais, entri ellas l'Estitutu Cervantes, pa promovel la luenga i coltura catalanas. L'IRL desenvolvi las sus atividais a travis delas árias de Luenga i Nuversiais, Creación i Literatura i Pensaeru.

Creación: El Enstitutu promuevi la proyeción enternacional delas artis visualis, l'arquitetura, las artis escénicas, la música i el cini catalán. Difundi al mundu la coltura catalana d'escelencia diseñandu i organizandu eventus artísticus en ciais estratégicas i líderis enos diversus ámbitus dela creación. Empulsa la presencia d'artistas catalanis en programacionis destacás dela creación contemporánea enternacional medianti alcuerdus específicus de colavoración con festivalis, enstitucionis, muestras enternacionalis, centrus d'artis i museus. Promuevi el entercambiu rentri el setol creativu local i enternacional medianti l'organización de visitas de comisarius, críticus i programadoris estrangerus i estatalis pa qu'asistan a festivalis, ferias, esposicionis, estrenus, conciertus, etc. Enforma sobri la creación contemporánea pol meyu dela pubricación de materialis específicus de promoción (artis visualis;^[6] música;^[7] teatri:^[8] i Catalan Performing Arts) i dela asistencia a ferias i mercaus setorialis. Favoreci la moviliá enternacional delos artistas a travis d'ayúas al desplaçamientu pa atuacionis dentru del circuitu profissional.

Ária de Literatura i Pensaeru: El Enstitutu empulsa la pubricación en otras luengas d'obras de literatura i de pensaeru originalis en catalán, poniendu una atención especial alos clásicus, a travis del apoyu alos editoris que pubrican obras traducías. Fomenta la difusión esteriol delos autoris i las obras pa encremental la su visibiliá nel contestu literariu enternacional i la participación en entercambius literarius i colturalis, i organiza la presencia dela literatura catalana en ferias del libru. Da apoyu ala tarea delos tradutoris literarius del catalán pa contribuil ala caliá delas traducionis, ala su formación acontiná i al reconocimientu dela su faena. Facilita el diálogu i el entercambiu rentri ensayistas i envestigadoris en luenga catalana i los sus enterlocutoris estrangerus, pa fomental la enternacionalización del pensaeru i dela envestigación. Favoreci la proyeción enternacional delas revistas de pensaeru i coltura en catalán a travis del entercambiu colas revistas omólogas d'otrus paísis.

Ária de Luenga i Nuversiais: El Enstitutu promuevi los estudius de luenga i coltura catalanas enas nuversiais del esteriol, rentri los qualis ái estudius de catalán enos EUA, en Uropa o en Ásia. Suscribi alcuerdus colas nuversiais del esteriol pa la enplantación o la consolidación d'estudius catalanis, i da apoyu alas nuversiais, el professorau i los estudiantis pol meyu de diversus programas i línias d'ayúas. Fomenta los estudius avançaus i la envestigación sobri la luenga i la coltura catalanas a travis de centrus d'estudiu i cátedras de professoris visitantis en nuversiais de prestigiu reconocíu, i da apoyu alas iniciativas delas asociacionis enternacionalis de catalanística. Comu organismu oficial de certificación delos conocimientus de catalán nel esteriol, organiza convocatorias de prebas que permitin acredital los diferentis nivelis, d'alcuerdu col Marcu uropeu común de referencia pa las luengas. Col pesqui de garantizal la caliá dela docencia, ofreci formación permanenti al professorau i promuevi acionis dirigías alos estudiantis del esteriol pa que completin la su formación lingüística. Empulsa la realización d'atividais académicas i colturalis enas nuversiais del esteriol pa favorecel la difusión dela luenga i la coltura catalanas.^[9]

Diretoris

Joan Maria Pujals i Vallvé (2002 – 2004)^[10]^[11]

Xavier Folch i Recasens (2004 – febreru de 2006)^[12]

Emili Manzano i Mulet (marçu de 2006 – 13 de diciembri de 2006)^[13]

Josep Bargalló i Valls (13 de diciembri de 2006 – 31 de eneru de 2011)^[14]

Vicenç Villatoro i Lamolla (31 de eneru de 2011 – 3 d'otubri de 2013)^[15]^[16]

Àlex Susanna i Nadal (3 d'otubri de 2013 – marçu 2016)^[16]

Manel Forcano i Aparicio (marçu 2016-setiembri 2018)^[17]

Iolanda Batallé i Prats (setiembri 2018 - juniu de 2021)

Francesc Serés Guillén (juniu 2021 - noviembri de 2021)^[18]

Pere Almeda Samaranch (noviembri de 2021 - atualiá)

Premiu Enternacional Ramon Llull

La estitución creó en 2004 el Premiu Enternacional Ramon Llull, col pesqui de reconocel la faena de pressonas i enstitucionis qu'án contribuíu ala difusión dela luenga catalana i dela realiá estorico-coltural catalanas o ala defensa delas colturas i nacionis sin estau. Ganaoris:

2004 — Giuseppe Tavani

2005 — Paul Preston

2006 — Tilbert Stegmann

2007 — Alan Yates

2008 — Michael van Walt van Praag

2009 — Denise Boyer

2010 — Malika Ahmed

2011 — Associazione Italiana di Studi Catalani

2012 — Georg Kremnitz

2013 — Max Wheeler

2014 — Juan Carlos Moreno Cabrera

2015 — Philip D. Rasico