Estoria de Prasencia

Puerta de Trugillu, una delas sieti puertas prencipalis dela muralla de Prasencia.

L'estoria de Prasencia, un monicipiu d’España ena provincia de Caçris, comunidá utónoma d’Estremaúra, s’esmiença a cuental pal 1186, de que la ciá hue hundá del rei Alfonso VIII de Castilla endispués de conquistal el lugal alos almoadis, enque se sabi que l’aria anduvu huendu abitá dendi la preestoria. En llegandu los romanus, las sus legionis pusun velallí un campamentu melital. En tiempus delos mosulmanis uvu una alcaçava aína ondi ogañu está la ciá.

Prasencia puló dentri los siegrus XII i XVII, huendu la epoca de fuga pal XVI comu se puei vel pol su centru estóricu i la calapachá d’edificius civilis, melitaris i religiosus. La ciá prencipió a escaecel dendi caberus del siegru XVII i no esmençó a arrecuperal-si asta la metá segunda del siegru XX.

Prestoria i Antigüedá

Cerquina dela ciá ai un assentamientu arquiológicu del Nolíticu o la Edá de Bronzi conocíu dela Cueva el Boquiqui, que s’atopa nunus canchalis. El su mentaeru más essatu devi de sel el de socairi o covanchera rocosa qu’aprovecha un rocagi que por mó dun escarrachamientu antañu, queó un güecu gastau de lugal p’abital. Alos sus amoraoris se les a atijau de pertenecientis ala epoca del Bronzi Caberu, enque endispués d’estuyus acaberus i portacionis de materialis que no se conocían, s’acreci l’antigüedá asta’l Bronzi Meyu. Cerca d’aí s’estuvun a estuyal angunas tumbas prestóricas ena parti de necrópolis d’esti puebramientu ala guarda del rocagi de Valcorcheru. Cona huerça d’ellas dierun ala manta, peru por suerti n’anguna s’an hallau cachus de calambucus chicus d’estilu campanihormi, i sotrus con una variança grandi de santus d’adornu.

Endrentu delos conjuntus cerámicus prestóricus ena Península Ibérica i las islas Balearis, está la cerámica de Boquiqui.

Por estal ena Vía dela Prata, andil ancestral qu’atija’l sul i’l norti ibéricu i que vieni essestiendu i gastándu-si alo menus dendi la epoca de Tartessos enos siegrus X a VI a.C., i nuna parti de passu delas montañas del Sistema Central, el Valli d'Ambrós, hue corría i abitá de puebrus prerromanus varius comu velaí vetonis i lusitanus dentri otrus, atestigau por exempru polas posás dun castru asitiau cerca delo qu’ogañu es la ciá. Pol imperiu romanu uvu un campamentu melital delas legionis romanas, atijau ala Vía dela Prata, envertía en calçá romana.

Edá Meya

Ermita de Santu Tomé, mesquita meyeval Antigua.

Muralla de Prasencia, costruía a caberus del siegru XII.

Época musulmana i conquista cristiana

Se sabi de costrucionis mosulmanas d’antis dela hundación dela ciá. Dentri estas, avía una torri del siegru VIII assitiá en juntu ala puenti de Trugillu, mentá de Torri del Ambroz, i al lau se hizu un casal chiquinu.

Nun decumentu emitiu en Burgus nel 1181 nel reinau d’Alfonsu VIII de Castilla s’avallava –por contra col Tratau de Medina i cona frontera dela Prata dentri los reinus de León i Castilla- que una güena parti del norti delo qu’ogañu es provincia de Caçris i noroesti dela provincia de Toleu hazian parti del alfós del conceju d’Ávila. Estu muó nel 1186, col escachamientu concejil dela ciá de Prasencia, hundá nessi añu d’Alfonsu VIII; el rei conseñó las lindis de territorius del conceju nuevu nel 1189. El lema dela ciá acabijá de hundal hue “Ut placeat Deo et Hominibus”, que’n latín quieri izil “Pa cumpril a Dios i alos ombris”.

Aviá dendi lo primeru comu fortaleça, entovía se puei vel ogañu un jeitu melital mu polo craru ena parti antigua dela ciá, que se reparti alreol dela Praça Mayol, dondi salin callis qu’aportan alas puertas dela ciá. Vendeoris i artesanus s’arrejuntavan por ramus d’oficius, ca qual acupandu una calli o parti d’ella.

La criación dela ciá hazía parti duna estrategia del rei castillanu de refortamientu dela liña del Taju, en hiziendu de lugal de sostribu pala reconquista del sul dela Península Ibérica i atajandu la desestensión del Reinu de León al salienti dela Vía dela Prata, tantu de horma melital comu eclesiástica. En estandu la región más o menus cerca de Toleu, d’aquellas capital de Castilla, entra-la ena archidiócesis de Toleu empricava una infrugencia de León menol, cosa que muó en entrandu a Prasencia ena archidiócesis de Santiagu de Compostela.

Pal 1189 Prasencia hue sé dun obispau nuevu por mé de Bula del papa Clemente III i se l’atorgava jurición de Trugillu, Medellín, Monfragüi i Santa Crus dela Sierra, ala par que se l’atorgavan unus términus pa repuebral que divan dendi las sierras de Bexa asta Trugillu.

Nel 1195, por mó dela Batalla d’Alarcos, Prasencia hue reconquistá delos almoadis, de parti de Abén Jucef, xefi melital de Yusuf II, o de Yusuf mesmu. Ná más que unu o dos añus endispués repiti alas manus d’Alfonso VIII de Castilla. Pa segural l’afiamientu, el rei mandó d’arrematal las murallas, que s’acabijarun nel 1201. Huerun costruías comu un sistema de defensa dupli, con un muru dun canchol grandi i una barbacana, con un fosu dentri ellus. La defensa estava refortía de setenta torris de meyu reondel, quatru torris defensivas linderas ala alcaçava, sieti puertas prencipalis i dos postigus o puertas más chicas.

Nel 1188 el papa Clemente III estuvu a crial la diócesis de Prasencia i un añu endispués hue nombrau l’obispu primeru, Bricio. La diócesis tenia jurición de Bexa, Medellín i Trugillu. Nel 1446 i por delantera del obispu i cardenal Juan de Carvajal, hizu la diócesis unus Estuyus d’Umanidais, que hormarun la primel escuela d’andal nuversitariu d’Estremaúra.

Siegru XV

Praça Mayol de Prasencia.

Prasencia hue ciá de realengu dendi lo primeru asta’l 1442. Estu quería izil qu’estava d’ahechu cona jurición del rei, que no dun señoríu. El fueru dela ciá enseñalava aziamenti los poeris que’l monicipiu devin governal, repartíus dentri un corregiol i regioris varius, comu mandiletis del rei, i’l canóligu dela diócesis.

Pola Edá Meya Baxa la ciá vivió un tiempu d’envernecimientu nel que’l conceju i los nobris laicus i religiosus promovicionarun costrucionis varias. D’essi tiempu son conventus, ilesias, ospitalis i casas-fortaleças a más del acabamientu dela catreal, mentá endispués de Catreal Vieja. D’aquellas la ciá tenia derechu a votu enas Cortis de Castilla, preva d’ellu el mandal a dos precuraoris alas cortis de Mairil nel 1391. Hundamental hue’l siegru XV pala estoria dela ciá, da que las costumbris feudalis dela Edá Meya acabijarun col estatutu de realengu i assentarun una jurición de señoríu. Nel 1442 el rei Juan II de Castilla entregó la ciá ala família delos Estúñigas o Zúñigas, en atorgal el títulu de condi de Prasencia a Pedro de Zúñiga i Leiva. En envertil-si en señoríu, el derechu de votu de la ciá enas Cortis se hue ala perda.

Juana de Trastámara, la Beltraneja.

El 27 d’abril del 1465 hue destituíu en Prasencia el rei Enrique IV de Castilla. Unas semanas adispués, Álvaro de Zúñiga i Guzmán, condi de Prasencia, hizu parti dela Farsa d’Ávila, en quitandu-li la espá, símbolu dela justícia, ala estauta de maera que representava’l rei castillanu i apregonandu rei anigual d’él al infanti Alfonso. Endispués dela muerti d’Enrique IV nel 1475, el condi de Prasencia hizu gavilla col partíu de Juana de Trastámara, mentá dela Beltraneja polos sus contrarius que izían qu’era ija de Beltrán dela Cueva que no d’Enrique, pala erencia del tronu de Castilla, contra’l partiu d’Isabel, la meyu ermana d’Enrique, qu’endispués diva a sel mentá dela Católica. Esti títari acabijo ena Guerra d’Erencia de Castilla, dela que tamién hizun parti Francia i Portugal.

Juana tuvu casamientu en Prasencia col su tíu Alfonso V de Portugal, peru’l papa no dió premissu arreglu al grau de parentela d’ellus, assinque no uvu reconocencia. Unus días adispués dela boa, la ciá púu vel la coronación de dambus dos comu reyis de Castilla. Juana endilgó un escritu a tolas villas i ciais del reinu nel que hazía sabel del su casamientu i justificava’l su derechu al tronu. Más tardi, en ahilal el polvoreu, Álvaro de Zúñiga se muó al partiu d’Isabel, i hue recompensau d’ella col títulu de Duqui de Prasencia nel 1476. Endispués dela vitoria delos Reyis Católicus nel 1479, el duqui s’envertió nunu delos nobris prencipalis del reinu.

Pa juñu del 1488, espenó’l duqui i ereó’l su nietu Álvaro de Zúñiga i Pérez de Guzmán. La nobreza pracentina aprovechó la cassión p’alevantal-si n’armas contra los Zúñiga de mou i manera que puyeran arrecuperal el poel que tenían enantis dela ciá i delas rentas delas tierras que dependin d’ella. Los nobris tuvun el sostribu delos Reyis Católicus, qu’envalidarun el damientu hechu de Juan II iziendu qu’avía síu de más i contra la su voluntá. Trunfó’l levanti i se remuó l’estatutu de realengu, huendu confirmau el 20 d’otubri del 1488 enas puertas dela catreal, estandu presenti Fernandu el Católicu, que hizu juramentu d’afial siempri los fuerus i la libertá de Prasencia.

Edá moerna

Ermita dela Virgin del Puertu, del siegru XV.

Retabru mayol dela Catreal Nueva de Prasencia, una obra hundamental del barrocu español del siegru XVII.

Siegru XVI

De que tuvun nacencia las 18 provincias primeras de Castilla nel 1502, huerun avallás arreglu alas ciais que tenían votu en Cortis. D’aquellas, ciá denguna d’Estremaúra tenia essi votu, assinque la huerça dela región hazía parti dela provincia de Salamanca. Por essu, nel 1653, Prasencia hizu acordança con Alcántara, Badajós, Caçris, Méria i Trugillu pa compral el votu en Cortis qu’antañu avía teníu. Esti hue el naceru dela Antigua provincia d’Estremaúra talmenti, que queó hormá pol partiu de Trugillu i’l territoriu de León dela Ordin de Santiagu, alos que s’añaierun las tierras de Coria i Granailla.

La pula de Prasencia acontinó pol siegru XVI i parti del XVII, queandu-si rustríu un acrecimientu dela puebración emportanti. D’esta epoca l’edificiu renacenteru del Palaciu Monicipal es, proyetau de Juan d’Álava nel 1523, i l’acabiju dela Catreal Nueva, esmençá nel 1498 i acabijá nel 1578, a más d’otrus muchus menumentus comu velaí l’aguadutu i’l Palaciu del Marqués de Mirabel. La ciá tuvu asta las sus escuelas nuversitarias dependientis delos dominicus i jesuitas.

Nel 1515 Fernando el Católicu hue a vivil en Prasencia consejau delos sus meicus. Espenó en Madrigaleju, quandu andava a viajal dendi Prasencia a Gualupi, p’assistil a un capítulu delas órdinis melitaris de Calatrava i Alcántara. En Prasencia hue ondi Bartolomé de las Casas encaravizó por ves primera col rei Fernando pa dal el su parecel a tentu la sitación delos endígenas d’América.

Dentri 1520 i 1522, pola Guerra delas Comunidais de Castilla, Prasencia hizu parti del bandu comuneru, mesmu concedierun d’estituíl una comunidá en Prasencia, peru le hizu mella el que uvieran cerca lugaris realistas comu velaí Ciá Rodrigu o Caçris. Prasencia tamién tuvu la su emportancia pola conquista americana. Un viagi con financiamientu del obispu Gutierre de Vargas Carvajal hue al estrechu de Magallanis nel 1539. Unu d’essus barcus mandau de Alonso de Camargo concedió d’atravessal l’estrechu.

La bibloteca del palaciu real del Monesteriu d’El Escorial hue criá en parti con librus veníus del palaciu episcopal, porteaus velallí d’ordin del rei Felipe II. Adispués l’obispu Pedro Ponce de León hizu damientu de parti dela su bibloteca al monesteriu, i dentri las sus obras estava el códici Glosas Emilianensis, hecha obra de caberus del siegru X o primerus del siegru XI venía del Monesteriu de San Millán dela Cogolla, que asta ai pocu estava considerau el decumentu más antiguu ondi se puein encuentral parabras escrevías en castillanu.

Siegrus XVII i XVIII

Catreal Nueva de Prasencia, caberus del siegru XV al siegru XVIII.

Polos siegrus XVII i XVIII la ciá esmençó a escaecel abondu, comu la huerça d’España, en baxandu’l númiru d’abitantis de prossimámenti dies mil ena epoca de más pulaeru a malas penas 4852 nel censu del 1786.

Dentri las causas del escaecimientu púu avel síu una l’escardechamientu delos moriscus, decretá de Felipe III nel 1609, que hizu qu’anguna genti, sobri tou abitantis d’ahuera delos murus, se huera de Prasencia. Peru más que ná huerun las guerras delos siegrus XVII i XVIII las que tuvun un golpi más malu pala ciá, sobri tou el levanti de Portugal en contra del rei español dela que vinu la mentá de guerra de Restauramientu de Portugal dentri’l 1640 i’l 1668, i la guerra d’Erencia Española dentri’l 1702 i’l 1714. Nesta última, la ciá tuvu de vel comu s’enfrontilavan los dos pretendientis al tronu español, Felipe V de Borbón i l’archiduqui d’Austria qu’acabijó nel tronu imperial austriacu comu Carlos IV del Sacru Imperiu Romanu Germánicu. L’exércitu de Carlos d’Austria tenía Prasencia acupá pal 1706. L’eshuerçu p’atendel las nesseciais del exércitu comu velaí l’agüespedagi, repuestu i reparu delos soldaus i delos animalis de carga, dentri otras cosas, un golpi mu malu hue pala economia mu escacharrá del lugal.

Los margullus d’abastimientus i los andancius ayuarun a l’escaecimientu dela ciá. Polos siegrus XVII i XVIII avía mucha mortandá por mó delas precisionis d’alimentus i las dolencias. El goviernu dela ciá se vió que no era escapás d’aparal l’escaecimientu. La participación delos ciadanus quassi que no essestía, en estal el poel concentrau ena aristocracia duna horma nunca vista, en uviendu un acrecimientu grandi de cargus, comu resultancia dela venta de cargus prepetus encetá nel siegru XVI i acontiná adispués. Al frenti del goviernu avía un corregiol qu’ajuntava las enhuncionis políticas, económicas, juizialis i melitaris. Con él estava l'Alcaldi Mayol, que consejava, soponía i tratava las custionis juizialis. A más d’estus, avían comu más de quarenta regioris prepetus barajeaus dun grupu reduzíu qu’estava encabeçau del marqués de Mirabel, dueñu de títulus varius.

Aguadutu de Prasencia, siegru XVI.

Palaciu del marqués de Mirabel, siegru XVI.

En pesal de tou uvun angunas delanteras que hizun algu d’acrecimientu económicu, enque no huerun bastanti pala ciá sacal del estancamientu. Se senificarun mostracionis artísticas, hundacionis religiosas i movimientus pa más poel políticu ganal nun andal nacional. Del siegru XVII es el retabru mayol dela Catreal Nueva, una obra prencipal del barrocu español. Tamién uvun obras menoris, qu’ogañu están en graus deferentis de conservancia, comu la ermita de Santa Teresa ena Hesa delos Cavallus, la ermita de Santa Elena, huera delas murallas tamién, la Casa del Deán i l’edificiu dela Carci Real, gastau del ayuntamientu ogañu. Se hundarun los conventus delas Carmelitas Descalças i las Capuchinas i una escuela pa maestrus cantoris o del coru enos templus prencipalis assisnal.

Nel siegru XVIII uvun sotras delanteras p’amejoral la sitación i acabijal col penaeru económicu, estandu a aprovechal los preparus entraus dela Casa de Borbón ena metá segunda del siegru, peru los proyeutus huerun pocu horrucherus i quearun pal acrecimientu delos bienis de propius, la costrución de puentis, el reparamientu de caminus i pocu más. Un proyeutu emportanti hue la hundación dela utarquía, dela Sociedá Económica d’Amigus del País ena dezena de 1770, la primel dela su crassi n’Estremaúra, peru la su essestencia hue corta i los sus hechus pocus.

Se hizun trebajus tamién pola delantera de José González Laso, obispu de Prasencia, qu’estuvu al frenti dela diócesis dendi’l 1766 asta’l su espenaeru nel 1803. La su obra hue grandi i se destendía por unus pocus de campus. Ena beneficencia i ena salú se senificó la criación dun espiciu ena escuela antigua delos jesuitas, a más d’amprial l’Ospital de Santa María; nel enseñaeru se senificó’l preparu delos Estuyus d’Umanidais, escuela dun jeitu nuversitariu. Enque la cara más anombrá dela obra de José González Laso i la que más hizu sensación entoncis, hue’l su empeñu cona costrución, en uviendu hechu abrición i reparamientu de caminus numirosus i muchas puentis, cosa qu’ala finitiva ayuó a avadal el poblema corónicu de vías de comunicación. Assínmenti, las acionis del obispu se centrarun abondu nel urbanismu, estandu a arreglal el Palaciu Episcopal i a costruil rúas nuevas, palo que hue precisu farrungal parti dela muralla.

Edá contemporánea

Guerra d’Endependencia (1808-1812)

Casa del Deán, siegru XVII.

Prasencia hue una praça melital d’emportancia pola Guerra d’Endependencia Española por mó dela su sitación lindera. La ciá hue gastá de quartel general i lugal de conduchu pa exércitus, tantu francesis comu españolis i aliaus angru-portuguesis, peru batalla emportanti paí cerquina no la uvu. Enos quatru añus de guerra, la ciá hue envadía i acupá delos francesis dozi vezis, hiziendu dañá malamenti ena economia i n’edificius púbricus abondu, civilis i dela ilesia. L’ochu de juñu del 1808 uvu’n levanti ena ciá qu’acabijó cona detención i justiciamientu d’angunus abitantis por avel síu acusaus de dal sostribu alos envasoris. Pa deziembri, aportó ala ciá por ves primera l’exércitu francés col mariscal Lefebvre de comendanti, i allí s’estuvu dos mesis antis de dil-si pa Castilla. Enque lo peol hue de que passó’l mariscal Soult, qu’anduvu a aterral la ciá i a quemal unus pocus de puebrus de pallí. Pa juliu del 1811 aconteció la envasión cabera de exércitus napoleónicus, una división de francesis comandá del general Buñiré i sotra de portuguesis al mandu del general Auguste de Marmont. Asta que se huerun pa deziembri, aquellu hue un abusaeru contra la puebración, obrigá a hazel entriega de tolos alimentus. Ena su retirá quearun desgalaçás las cosechas i impusun un pagamientu de noventa mil realis, a más de tolas perras que robarun i tol ganau que púun lleval-si.

Entangu dela provincia de Caçris (1833)

Patiu del Palaciu Episcopal.

Estremaúra, el mercau, pintura de Joaquín Sorolla del 1917 ena que racea Prasencia.

Prasencia tentó de sel la capital dela provincia, enque acabijó huendu Caçris nel 1833. De a poquinu a pocu, alo longu del siegru, se l’estuvun a arretiral servicius púbricus abondu que se llevarun pala capital, lo que hizu qu’ena ciá uviera más descaimientu nun andal social i económicu. De que s’acabijó l’Antiguu Régimi, Prasencia s’enhormó comu monecipiu constitucional. Dendi’l 1834 es sé de partiu juizial. Pola Repúbrica Primera Española se hizu declaramientu del Cantón de Prasencia duranti la revolución cantonal, queriendu revindical la su capitaliá ena provincia de Caçris.

Restauramientu (1874-1931)

El Restauramientu Borbónicu hue’l pedioru estóricu que va dendi’l prenunciamientu del general Arsenio Martinez-Campos nel 1874, qu’aballó cona Repúbrica Primera, asta la procramación dela Repúbrica Segunda nel 1931. Nessi tiempu la vida política en Prasencia tuvu más tiraeru pal’aburrición, enque uvu un desenreoamientu más emportanti eno tocanti ala vida social, ala economia, l’urbanismu, la educación, la coltura i assín. Se hizun obras nuevas pa más tiempu comu velaí vías, praças i espacius verdis. P’amejoral l’ambienti montúu endrentu delos murus, s’abrió la muralla nunus pocus de sitius. Huerun costruías las Escuelas de San Calisto pa güérfanus varonis i la de San José pa güérfanas, un seminariu nuevu en juntu ala Praça dela Catreal i la praça de torus qu’ai ogañu, inagurá nel 1882. Peru la obra cimera nun andal sociueconómicu hue la llegá dela liña herreña, conas liñas Lisboa-Mairil i Prasencia-Astorga, qu’acabijó col repunteu estóricu dela región, acreció’l númiru de viajantis, el cambioteu comercial i el porteu de produtus i ganau. Alreol dela estación de tren nueva hue costruíu un barriu endustrial.

Nel 1901 la reina María Cristina atorgó a Prasencia el títulu de La Mu Benéfica comu reconocencia pola ayua umanitaria alos soldaus repatriaus nel 1898 delas guerras de Cuba i las Filipinas. En prencipial el siegru XX la tierra estava en propiedá dunus pocus, lo que acreció’l númiru de jornalerus, de ca ves más, que se veían obrigaus al emigraeru más allá delos maris. Nel 1911 hue hundá la Caxa d’Ahorrus de Prasencia, estitución bancaria p’acorpal la economia dela ciá.

Enestabilidá i entallaeru d’endispués (1931-1950)

De que se procramó la Repúbrica Segunda Española matarun dos guardas noturnus ena Praça Mayol, enque enteracionis d’otrus hechus violentus no ai, asta la Guerra Civil. Las elecionis que se hizun pol pedioru repubricanu huerun ganás tantu polas isquierdas comu polas derechas, en uviendu alcaldis varius en pocu tiempu. El primel alcaldi de isquierdas, el socialista Modesto Durán hue, que s’estuvu quatru mesis nel 1931 i unus pocus más nel 1936. D’aquellas huerun las obras pal aprovechamientu delas aguas delos rius Xerti, Alagón i Tietar, la costrución de pantanus i la criación del mercau d’abastus i l’Estitutu Nacional de Bachilleratu Gabriel i Galán. Las esperanças qu’avía a tentu la reforma agraria palas injusticias cona propiedá dela tierra acabijal, quearun en ná por mó de políticus repubricanus reñius i terretenientis retusus.

Endispués del golpi d’estau col qu’esmençó la guerra civil española, l’alcaldi democráticu Miguel Cermeño hue sopuestu pol comendanti rebeldi José Puente que impusu ena ciá la lei marcial. Denseguía los biembrus del Frenti Populal d’aquella parti huerun repremíus delos franquistas aziamenti por mé de matacionis nuna cantidá qu’entovía no se sabi en no queal rustría la causa dela muerti nel registru civil. Arreglu alo ichu de Sánchez-Marín Enciso se cuentan 48 mataus nel 1936 i los cuerpus huerun passeaus polas callis. Uvun setencias de pena de muerti por tribunalis melitaris d’esceción, en uviendu 101 matacionis decumentás, dentri las qu’estavan el cenetista Nicolás Benavente, los antiguus alcaldis socialistas Pedro Rabazo i Joaquín Rosado, i Teodora Velasco, moça de 14 añus matá por lleval comía a un familial presu. La ciá no hue lugal de batallas, peru uvun ochu muertus en bombardeus i estrumpíus, hueraparti delos muchus pracentinus qu’espenarun enos frentis. L’ospital hue lugal de saneza de retaguardia i otrus edificius s’envertierun n’ospitalis provisionalis. La falta de manu d’obra i las dessigencias de pagamientus melitaris hizun un emprobecimientu gravi dela economia.

En acabal la guerra la hambrina i’l penaeru predominavan ena ciá polos añus 40, aconduchándu-si los produtus primerus d’alimentación i igieni. D’aquellas la endustria más emportanti era hazel la harina enos molinos en juntu al ríu Xerti i’l pan enas taonas. Tamién xabonis i ladrillus. La recostrución d’edificius no hue mucha en no uviendu-si destruíu de más pola guerra. Por mé de trebajus horçosus, los presus repubricanus prepararun los palacius del marqués dela Costancia i del marqués de Mirabel, la praça de torus, i tamién hizun el Parqui delos Pinus. Nel 1941 queó ena ciá un regimientu d’infantería que pareci qu’algu acreció la economia polas nessecidais de soldaus forasterus numirosus, i que huerun más de que nel 1969 llegó sotru regimientu d’operacionis especialis.

Renacencia i destensión dela ciá (1950-ogañu)

La demografia cambió pocu enos añus de franquismu, nuna Estremaúra que perdía puebración abondu. Dendi los añus sessenta esmençó a avel algu d’acrecimientu dela puebración por mó del creceéru dela natalidá i el desenreoamientu generau del políganu endustrial nel sul dela ciá, al que vinun emigrantis delos puebrus vezinus. Assinmenti los pantanus que se hizun no mu largu dela ciá dierun trebaju a genti bastanti mentris s’anduvun a costruil.

Esti desenreoamientu acontinó de que llegó la democracia, possimenti nel setol delos servicius púbricus comu velaí la saneza i la educación. Tamién se hizun regadíus nuevus en juntu alos rius Alagón i Tiétar. La vida ena ciá prencipió a cargal-si d’ánimus envertiedu-si’n lugal d’encontrança delas puebracionis vezinas. Col tiempu se huerun desenreoandu delanteras turísticas, colturalis i de desoficiu qu’ayuan a que Prasencia sea lugal de referencia n’Estremaúra. Enos cinqüenta añus que van dendi’l 1960 asta’l 2010, la puebración dela ciá s’acreció dendi los 21.297 alos 41.447 abitantis.

Vea-si tamién

• Prasencia

Bibliografia

• Colmeiro Penido, Manuel (1883). Cortes de los antiguos reinos de León y de Castilla. Orden de La Real Academia de La Historia, Biblioteca Virtual Miguel Cervantes. 
• Chaves Palacios, Julián (2001). «El poeta Luis Chamizo y su época». Norba, revista de historia (15): 217-226. ISSN 0213-375X. 
• Diago Hernando, Máximo (2006). «Las luchas de bandos nobiliarios como factor determinante del conflicto comunero en Plasencia (1520-1522)». Cuadernos de historia moderna (31): 63-89. ISSN 0214-4018. 
• Flores del Manzano, Fernando (2008). La Guerra de la Independencia en Plasencia y su tierra. Badajoz. Caja de Extremadura, obra social. Prantilla:OCLC. 
• Flores del Manzano, Fernando (2007). Plasencia y su comarca: historia y sociedad (1840-1902), reinado de Isabel II, sexenio revolucionario, restauración. Brenes: Múñoz Moya Editores Extremeños. Prantilla:OCLC. 
• Flores del Manzano, Fernando (2004). Plasencia y su entorno durante el reinado de Fernando VII y la regencia de María Cristina (1808-1840). Ayuntamiento de Plasencia (Cáceres). Prantilla:OCLC. 
• Linares Luján, Antonio Miguel (1991). El Mercado Franco de Plasencia. Cáceres: Cámara Oficial de Comercio e Industria. ISBN 84-87600-11-5. Archivado desde el original el 14 de julio de 2013. Consultado el 8 de marzo de 2014. 
• Lora Serrano, Gloria (1999). «El proceso de señorialización de la tierra de Plasencia (1252-1312)». Miscelánea medieval murciana (23-24): 51-73. ISSN 0210-4903. 
• López Monteagudo, Guadalupe (1979). «Consideraciones sobre la cerámica de Boquique». Archivo español de arqueología (139-140): 21-26. ISSN 1988-3110. 
• Luis López, Carmelo (2002). «Las comarcas meridionales de la Tierra abulense medieval: precisiones a una problemática delimitación y repoblación». Studia histórica. Historia medieval (20-21): 11-45. ISSN 0213-2060. 
• Martínez Díez, Gonzalo (1983). «Extremadura: origen del nombre y formación de las dos provincias». Anuario de la Facultad de Derecho (2): 59-119. ISSN 0213-988X. 
• Martínez Martínez, Julio Gerardo (1993). «Plasencia y su Fuero en el contexto de la Extremadura castellana». Anuario de la Facultad de Derecho (11): 321-334. ISSN 0213-988X. 
• de la Montaña Conchiña, Juan Luis; Clemente Ramos, Julián (1994). «La Extremadura cristiana (1142-1230): ocupación del espacio y transformaciones socioeconómicas». Historia, instituciones, documentos (21): 83-124. ISSN 0210-7716. 
• Monterde García, Juan Carlos (2002). «El sentido de la honra en los Fueros de Cáceres y Plasencia». Revista de Estudios Extremeños (58): 685-722. ISSN 0210-2854. 
• Morales, Ernesto (2006). Exploradores y piratas en la América del Sur. Renacimiento. ISBN 9788484726906. 
• Ohara, Shima (2004). Tesis doctoral: La propaganda política en torno al conflicto sucesorio de Enrique IV (1457-1474). Alicante: Biblioteca Virtual Miguel de Cervantes. ISBN 84-688-7203-2. 
• Postigo Aldeamil, María Josefa (1984). «El Fuero de Plasencia». Revista de filología románica (2): 175-214. ISSN 0212-999X. 
• Sánchez Alzás, Carlos J. (2004). «La presencia francesa en Plasencia durante la guerra de la Independencia (1808-1812)». Alcántara: revista del Seminario de Estudios Cacereños (59-60): 25-44. ISSN 0210-9859. 
• Sánchez de la Calle, José Antonio (1993). «El crecimiento de la población placentina en el siglo XIX». Revista de Demografía Histórica (11): 75-116. ISSN 1696-702X. 
• Sánchez de la Calle, José Antonio (2009). «Historia de la educación en Plasencia desde la segunda mitad del siglo XIX a mediados del siglo XX». Coloquios Históricos de Extremadura (2): 761-798. ISBN 978-84-692-4898-0. 
• Sánchez Loro, Domingo (1959). El Parecer de un Deán (Don Diego de Jerez, Consejero de los Reyes Católicos, Servidor de los Duques de Plasencia, Deán y Protonotario de su Iglesia Catedral). Biblioteca Extremeña, Publicaciones del Movimiento edición, Tipografía, El Noticiero. 
• Sánchez-Marín Enciso, Antonio (2009). Plasencia en llamas. Raíces. ISBN 978-84-86115-685. 
• Soria Mesa, Enrique (2008). Farsa de Ávila: los nobles contra el rey de Castilla. Ayuntamiento de Plasencia (Cáceres). ISSN:1696-7755D. 
• Tirado García, Laura (2006). «El Alcázar de Plasencia: historia y destrucción». Norba-Arte (XXVI): 167-175. ISSN 0213-2214. 
• Vilar y Pascual, Luis (1864). Diccionario Histórico Genealógico y Heráldico de las Familias Ilustres de la Monarquía Española. Tomo VII.