Fábrica de diplomas

Una fábrica de diplomas (tamién conocía cumu fábrica de títulus) es una compañía u organisación que afirma sel una estitución d'enseñaeru altu, peru que ofereci títulus académicus i diplomas ilegítimus por una tarifa. Estus graus puein pretendel dal créitu pola esperiencia de vía pertinenti, peru nu debin amogañal-si con programus lexítimus de evaluación de aprendiçaji prevíu. Tamién puein pretendel evalual la estoria de labaju u esigil la presentación duna tesis u disertación pa su evaluación pa dal una apariencia de autenticidá. Las fábricas de diplomas son sostribás con frecuenzia por «fábricas de acreditacionis», organisacionis que pretendi otorgal la acreditación educativa a institucionis d'enseñaeru superiol sin tenel autoridá gubernamental ni reconocimientu pa operal cumu un acreditadol, col propósitu de proporcional una apariencia dela autenticidá. El términu tamién puei gastal-si peyorativamenti pa descrebil a una institución acreditá con baxus estándaris de almisión académica i una baxa tasa de colocación laboral. Un endivíduu puei nu sel concienti de que el títulu qu'a obteníu nu es totalmenti lexítimu. En qualisquiel casu, se plantean cuestionis legalis si la qualificación se gasta en currículums.

Terminología

El términu «fábrica de diplomas» denota originalmenti una institución que proporciona diplomas de forma intensiva i lucrativa, cumu una fábrica. En términus más generalis, descrebi qualisquiel institución que ofreci cualificacionis que nu están acreditás i/u que nu se basan nuna evaluación académica adecuá.

Mientris que los términus «fábrica de títulus» i «fábrica de diplomas» se gastan de manera intercambiabli, dentru dela comuniá académica a vezis se hazi una destinción. Una «fábrica de títulus» emiti diplomas de institucionis nu acreditás que puein sel legalis nalgunus estaus, peru son generalmenti ilegítimas, mientris qu'una «fábrica de diplomas» emiti diplomas falsificaus con los nombris delas nuversidais realis.

Los diplomas académicus puein sel concedíus lexítimamenti sin ningún estudiu cumu reconocimientu de autoridá u esperiencia. Quandu son daus estraordinariamenti, talis títulus se llaman títulus onorarius u títulus doctor honoris causa. Tamién, nalgunas nuversidais, los titularis dun grau inferiol (cumu un títulu de grau) puein sel rutinariamenti otorgaus graus onorarius más altus (cumu un títulu de maestría) sin estudiu.

El términu «fábrica de diplomas» tamién puei gastal-si peyorativamenti pa descrebil una institución lexítima con baxus estándaris de almisión académica i una baxa tasa de colocación laboral, cumu las escuelas con finis de lucru.

Práuticas conessas son la falsificación direta de documentus de certificaus i la compra corrupta de títulus de nuversidais lexítimas, inque nu requierin una «fábrica» separá.

Caraterísticas

Las fábricas de diplomas compartin una serii de caraterísticas que las diferenciun delas institucionis respetás, inque algunas institucionis lexítimas puean essibil argunas delas mesmas caraterísticas.

Acreditación i autenticidá

La caraterística más notabri delas fábricas de diplomas es que carecin de acreditación puna agencia de acreditación reconocía a nivel nacional. (Se debi tenel en quenta, sin embargu, que nu toas las institucionis nu acreditás de educación superiol son fábricas de diplomas). Las fábricas de diplomas, polo tantu, emplean diversas tácticas nun intentu de parecel más lexítimas alos estudiantis potencialis.

Argunas fábricas de diplomas reclaman acreditación a su vezi por un «fábrica de acreditación» mientris que se refierin a sí mesmas cumu «completamenti acreditás». Las fábricas de acreditacionis con sedi en los Estaus Uníus puein modelal sus sítius web sobri la basi de agencias de acreditación realis, por exemplu, las fábricas de acreditacionis con sedi en los Estaus Uníus modelan sus sítius web sobri la basi de agencias de acreditación realis supervisás pol Conseju de Acreditación de Educación Superiol (Council for Higher Education Accreditation, CHEA). Otra táctica típica es que las fábricas afirmin sel reconocíus enternacionalmenti por organisacionis cumu la Unesco. La Unesco nu tien autoridá pa reconocel u acredital institucionis u organismus de educación superiol i a publicau advertencias contra organisacionis educativas que reclaman el reconocimientu u la afiliación dela Unesco.

Argunas fábricas de diplomas i títulus án desempeñau un papel ena creación d’organismus de acreditación nu reconocíus tamién. Estus fábricas de diplomas i títulus puein amogañal entavía más las cosas alegal andu consideral la estoria laboral, la educación profesional i el aprendiçaji prevíu, i enclúsu puein requiril la presentación duna tesis de titulación pa dal una apariencia adicional de legitimidad.

Cumu las fábricas de diplomas típicamenti posein licencia pa hazel negocius, es prática común dentru dela endustria deturpal su licencia de negocius cumu endicación de aprobación por parti del gobiernu dela institución. Los materialis promocionalis puein utilizal parabras que denotan un estatus legal talis cumu «con licencia», «autorizá pol Estau» u «aprobá pol Estau» pa suxiril una equivalencia ala acreditación.

Argunas anunciun otrus endicadoris de autenticidá que nu son relevantis pa las credencialis académicas. Pol exemplu, la Nuversidá del Norti de Washington anuncia que sus títulus son «atestaus i sellaus pa autenticidá por un notariu nombrau pol gobiernu». En realidá, la notarisación solu certifica que el documentu hue firmau pola pressona nombrá.

Las fábricas del diploma se nombran a menú sonar confusamenti similaris a esus d’institucionis académicas acreditás prestitxiosas. A pesal de que el derechu de marcas está destinau a evital esta situación, las fábricas de diplomas siguin empleandu diversus métodus pa evital el recursu legal. Varias fábricas de diplomas adoptan nombris británicus, parecíus peru nu idénticus alos nombris de nuversidais lexítimas, aparentementi pa aprovechal la reputación del Réinu Uníu de calidá educativa en otras partis del mundu. Argunus exemplus de nombris británicus gastaus polas fábricas de diplomas son «Nuversidá Shaftesbury», «Nuversidá de Dunham», «Nuversidá Redding» i «Nuversidá Suffield».

Es posibri que el sítiu web dela escuela nu tenga un dominiu .edu u otru equivalenti específicu del país, ya que normalmenti se restrinxi el registru de dichus nombris. Nostanti, la aplicación a síu a vezis menus restrintiva, i un dominiu .edu nu puei tomal-si cumu una verificación dela calidá u reputación dela escuela. Argunas fábricas de diplomas gastan un nombri de dominiu de primel nivél .ac, que se asemexa a nombris de dominiu académicus de segundu nivél cumu ac.uk, peru que de hechu es el dominiu de nivel superiol geográficu de Isla Ascensión. Pa evital el gastu indebíu de sus nombris desta manera, argunas institucionis académicas legítimas án registrau los dominius .ac.

Enseñaeru

En comparación con las institucionis legítimas, las fábricas de diplomas tiendin a tenel drásticamenti baxus requisitus académicus, si es que los ai. Dependiendu dela institución, los estudiantis puein sel obligaus a compral librus de testu, tomal pruevas, i presental la tarea, peru los títulus se confierin comúnmenti endispués de pocu u ningún estudiu.

En lugal delas «ciencias duras», andi la competenzia es más fácil de verifical, los temas ofrecíus por una fábrica de diplomas son a menú esotéricus i puein basal-si nuna pseudociencia cumu la astrología u naturopatía. Tális temas son vagamenti definius, dificultandu la verificación esterna delas normas educativas.

Las fábricas de diplomas suelin ofrecel poca u ninguna enteración con los profesoris. Enclúsu si los comentarius i correccionis alos cursus se dan, puein nu tenel relación col títulu que s'otorga. Notrus casus los profesoris puein servil so pa escrebil los elogius al estudianti que se puein dal cumu referencias.

Enstalacionis

Dau que las fábricas de diplomas proporcionan pocu nel caminu dela enseña, pol xeneral nu ai necesidá d’enstalacionis de enseña. La escuela tiendi a nu tenel bibliotéca, personal, publicacionis u envestigación. En resumin, mu pocu que sea tangibri se puei encontral sobri la institución. Si s’ofreci enseña, los profesoris puein poseel títulus avanzáus dela propia fábrica de diplomas u d’otras institucionis nu acreditás. Tamién puein tenel cualificacionis lexítimas que nu guardan relación con el tema que enseñan.

Las tesis doctoralis i las disertacionis dela institución nu estarán disponiblis ena propia bibliotéca dela institución, si la tien, u nel casu delos Estaus Uníus, en ProQuest, un repositoriu nacional. La direción dá pola institución falsa a menú es un buzón postal, serviciu de reenvíu de correu u númiru de serii. Ai institucionis lexítimas de educación a distanzia con enstalacionis limitás, peru las nuversidais lexítimas hacin su autoridá clara. Palos académicus, las publicacionis en revistas científicas revisás por paris son emportantis pa establecel credencialis científicas. Sin embargu, en las fábricas de diplomas, la envestigación es ausenti, falsa u puramenti autopublicá sin ninguna revisión esterna. Estu puei sel dificultosu de detectal, ya que las revistas falsas tamién dessistin. Las páxinas web dela facultad con bios i la envestigación puein enclúsu sel robás de nuversidais lexítimas.

Promoción i tarifas

Los compradoris utilizun a menú los diplomas pa reclamal credencialis académicas pa su gastu ena obtención de emplegu. Pol exemplu, un maestru de escuela podría compral un grau duna fábrica de diploma pa avanzal a superintendenti. Los títulus duna fábrica de diploma se puein obtenel dentru dunus días, semanas u mesis dendi el momentu dela enscripción. El créitu académicu se puei ofrecil pala «esperiencia dela vía», un puntu presentau de manera particulal en los puntus de venta dela institución. Estu nu debi amogañal-si con los programus lexítimus que ofrecin evaluación de aprendiçaji prevíu, que permitin alos estudiantis obtenel créitu académicu basau ena formación pasá, la esperiencia u el estudiu endependienti. Estu usualmenti requieri una prueba que el estudianti puei marral; una fábrica de diplomas otorgará el grau endependientementi delos resultaus.

Las matrículas i los onorarius se cobran por ca títulu, más que por términu u por cursu. Las fábricas del diplomas se anuncian a menú gastandu correu basura en correu electrónicu u otrus métodus cuestionabris. Las institucionis lexítimas utilizun la publicidá tradicional i el reclutamientu dela escuela secundaria. Se anima alos estudiantis potencialis a «enscribil-si agora» antis de que la matrícula u los onorarius sean aumentaus. Se les puei dizil que cualifican pa una beca, u se ofrecin acuerdus pa escribil-si en múltiplis títulus al mesmu tiempu. La literatura promocional puei contenel erroris gramaticalis i de ortografía, parabras en latín, lenguaji estravaganti u pretenciosu i diplomas de muestra. El sítiu web dela escuela puei parecel aficionau u nu profesional.

Consideracionis legalis

Los diplomas i títulus emitíus polas fábricas de diplomas se án gastau pa obtenel emplegus, aumentus u clientis. Enclúsu si la emisión u la obtención duna cualificación de fábrica de diplomas es legal, pasala cumu acreditá pa beneficiu personal es un crimi en muchas xurisdicionis. En argunus casus, la fábrica de diplomas puei sel culpabri dun delitu, si supiera u debiera sabél que las cualificacionis que emiti se gastan con finis fraudulentus. Las fábricas de diplomas tamién podrían sel culpabris de fraudi si engañan alos clientis pa que crean que las cualificacionis que emitin son acreditás u reconocías, u hacin afirmacionis falsas de que conducirán al ascensu profesional i aceptan dineru sobri la basi destas reclamacionis.

Al igual que los paraísus fiscalis, las fábricas de diplomas suelin empleal arbitraji jurisdicional, operandu notru país u jurisdición legal andi lleval a cabu fábricas de diplomas es legal, las normas son laxas u la acusación es pocu probabri. La división del negociu a través delas xurisdicionis puei sel una manera de evital las autoridais. Una escuela puei operal nuna xurisdición, peru gastal una direción de correu nuna xurisdición diferenti, pol exemplu. Quandu se sitúa nun país propiciu pa las fábricas de diplomas, la escuela a menú nu tien estudiantis d’essi país i/u es dirigía enteramenti por personal nu nativu.

Argunas institucionis nu acreditás encruin renuncias en quantu ala acreditación ena letra chica de sus contratus.

El utol John Bear, un expertu n'enseñaeru a distanzia i fábricas de diplomas, a escrebiu que los títulus falsus son riesgosus palos compraoris i consumioris:

«Es cumu ponel una bomba de tiempu en su currículum. Podría esplotal en qualisquiel momentu, con consecuencias nefastas. Las pressonas que vendin graus falsus probabilmenti nunca sufrin en absolutu, peru las pressonas que los compran a menú sufrin muchu. Si su «títulu» es relacionau con la salú, sus clientis puein sel gravimenti dañaus».

Atijus p'ahuera

• Verificadol de datus de Educación Superiol del Réinu Uníu