Louis Pasteur

Louis Pasteur
Información pressonal
Nacencia	27 de diziembri de 1822 Dole (Restauración borbónica en Francia)
Muerti	28 de setiembri de 1895 (72 años) castillo de villanueva Étang (Fráncia)
Causa de muerti	Paro cardiorrespiratorio
Sepoltura	crypte de l'Institut Pasteur (fr) y Notre-Dame de París
Nacionalidá	Francesa
Familia
Padre	Jean-Joseph Pasteur
Cónyugi	Marie Pasteur (desde 1849)
Educación
Educación	Doctor en Medicina, Doctor of Natural Sciences, honoris causa y doctor en Filosofía
Educau en	Lycée Saint-Louis Universidad de París Conservatorio Nacional de Artes y Oficios Escuela Normal Superior de París (B.S.; 1844-1845)
Supervisor doctoral	Antoine-Jérôme Balard y Jean-Baptiste Biot
Información prehessional/profissional
Oficiu	Microbiólogo, químico, profissol nuversitariu, bioquímico, agrónomo, biólogo, litógrafo, artista y botánico
Ária	Química y microbiología
Cargus acupaus	Sillón 17 de la Academia Francesa (1881-1895)
Empreaol	Ecole Centrale de Lille Instituto Pasteur Universidad de Estrasburgo (desde 1848) Universidad de Lille (1854-1857) Escuela Normal Superior de París (desde 1857)
Abreviatura en botánica	Pasteur
Hirma

Louis Pasteur (Dole, 27 de diciembri de 1822 - Marnes‑la‑Coquette, 28 de setiembri de 1895) fue un químicu i microbiólogu francés, biembru dela Academia Francesa (dendi 1881; sillón n.º 17). Demostrandu la naturaleza microbiológica dela fermentación i de munchas maletias d'animalis i umanus, Pasteur se convirtió n'unu delos hundaoris dela microbiología i el criaol dela basi científica pa la vacunación i las vacunas contra el carbunco, el cólera aviari i la rabia. Los sus laburus nel campu dela estrutura cristalina i el fenómenu dela polarización sentarun las basis dela estereoquímica. Pasteur tamién puso fin al debati secular sobri la generación espontánea de dalgunas holmas de vida, demostrandu esperimentalmenti la su imposibiliá. El su nombri es anchamenti conocíu gracias ala tinalogía dela pasteurización, qu’él crió i que más tardi fue bautizá nel su onol.

Procedía d’una familia de curtioris i recibió una educación variá, qu’incluyía dotis artísticas. Pasteur eligió una carrera científica i se convirtió en professol de física alos 26 años gracias al su destapamientu dela estrutura delos cristalis d’ácidu tartáricu. Passó dalgún tiempu laburandu nel Liceu de Dijon i ena Nuversidá de Estrasburgu, i duranti tres años fue decanu dela Facultá de Ciencias dela Nuversidá de Lille. De 1859 a 1867, fue unu delos líderis dela Escuela Normal Superiol. Tras los ruidus estudiantilis, se dedicó al cumplidu ala Envestigación i, de 1867 a 1888, dirigió el laboratoriu de química fisiológica. Entri 1859 i 1864, Pasteur se centró nel estudiu dela teoría dela generación espontánea de microorganismus i al mesmu tiempu se ocupó delos procesos de fermentación en relación col deterioru massivu del vinu i la cerveza duranti la su preparación i trasporti. A partil de 1865, Louis Pasteur encetó a estudiar las causas dela epidemia de gusanus de seda nel sul de Francia, que causó importantis daños ala sericicultura. A partil dela década de 1870, Pasteur se dedicó ábate pol cumplidu alos prubremas médicus (dendi 1873 era biembru dela Academia Nacional de Medicina) pol mé d’una tragedia pessonal: tres delos sus ijus murierun de fiebre tifoidea. En 1868, la Nuversidá de Bonn concedió a Pasteur el doctorau honoris causa en Medicina, peru tras la guerra franco-prusiana de 1871, lo rechazó pol motivus políticos. En 1888 runchó l'apertura del Enstitutu Pasteur de París, del qu’fue el primel diretol ata la su muerti. Fue aterrau ena crita del enstitutu.

Fue onrau con numerosus premius científicus i estatales de destintus paísis del mundu. El Día Mundial contra la Rabia, una conmemoración añal, coincide col día dela muerti de Louis Pasteur.

Biografía

Iju de Jean-Joseph Pasteur i de Jeanne-Étiennette Roqui, Louis Pasteur nació el 27 de diciembri de 1822 en Dole, localidá del Franco Condado ondi trascurrió la su enfancia. Era iju d’un curtiol, i de hovin no fue un estudianti prometiol en ciencias naturalis; de fechu, si demostraba dalguna doti especial, era ena área artística dela pintura. La su primera ambición fue la de sel professol d’arti. En 1842, tras sel maestru ena Escuela Real de Besanzón, obtuvo el su títulu nuversitariu de Bachelier ès Sciences Mathématiques (el equivalente en inglés a Bachelor of Science in Mathematics) en Dijon, con calificación «mediocre» en química. El su pári lo mandó ala Escuela Normal Superiol de París, peru ellí no duró munchu tiempu ya que regresó ala su tierra natal. Peru al añu siguienti retornó a París. En abostu de 1847 obtuvo el su Doctorau en Ciencias (Docteur ès Sciences) ena Facultá de Ciencias de París, con una tesis de Físico-Química titulá (a) Tesis de Química: "Recherches sur la capacité de saturation de l'acide arsénieux. Etudes des arsénites de potasse, de soude et d'ammoniaque." (b) Tesis de Física: "1. Études des phénomènes relatifs à la polarisation rotatoire des liquides. 2. Application de la polarisation rotatoire des liquides à la solution de diversas questions de chimie." Tras passar pola École Normale Supérieure, se convirtió en professol de física nel Liceo de Dijon, inque el su verdaeru enterés era ya la química. Entri 1847 i 1853, fue professol de química en Dijon i luegu en Estrasburgu, ondi conoció a Marie Laurent, la ija del retol dela Nuversidá, cola que contrajo matrimoniu en 1849. El matrimoniu tuvu cincu ijus, peru solu sobrevivierun ata la vida adulta dos d'ellos: Jean-Baptiste i Marie-Luise. Los otros tres fallecierun tempranamenti, afetáus pol tifus.

En 1854, fue nombrau decanu dela Facultá de Ciencias ena Nuversidá de Lille. En 1857, desempeñó el cargu de diretol d'estudius científicus dela Escuela Normal de París, el que laboratoriu dirigió a partil de 1867. Dendi la su creación en 1888 i ata la su muerti, fue diretol del enstitutu que lleva el su nombri.

El académicu francés Henri Mondor manifestó: "Louis Pasteur no era médicu ni ciruhanu peru naidi á fechu tantu comu él en favol dela medicina i dela ciruhía."

Contribucionis científicas

Isomería óptica

L. Pasteur, 1857.

En 1848, Pasteur resolvió el misteriu del ácidu tartáricu (C4H6O6). Esta sustancia parecía dessistir en dos holmas d'idéntica composición química peru con propieais dendentis, dependiendu del su origen: el ácidu tartáricu provienienti de seris vivos (pol ejemplu, el que dessisti nel vinu) era capaz de polarizar la luz, mentris que el produciu sintéticamenti no lo hazía a pesal de contal cola misma fórmula química.

Pasteur examinó al microscopiu cristalis mininus de salis hormás a partil d'ácidu tartáricu sintetizau nel laboratoriu, i observó argu muy curiosu: había cristalis de dos tipos destintus, dambos dos ábate igualis peru con simetría especulari, comu las nuestras manos. La composición era la misma, peru la holma ena que los átomos se asociaban podía tomal dos holmas dendentis i simétricas: mentris una holma polarizaba la luz ala derecha, la otra la polarizaba ala izquierda, una era dextrógira i otra levógira.

Más curiosu entavía fue que, quandu examinó cristalis hormáus a partil d'ácidu tartáricu natural, solu eran d'unu delos dos tipos —los seris vivos producían el ácidu d'una manera ena que solu se criaba unu d'ellos: el que polarizaba la luz ala derecha—. Esti hallazu le valió al hovin químicu la concesión dela Legión de Onol, alos treinta años d'edá.

Pasteurización

Estudiu de microbiología de Pasteur

Dalgunos delos sus contemporáneos, incluyíu el eminenti químicu alemán Justus von Liebig, insistían en que la fermentación era un procesu químicu i que no requería la intervención de dengún organismu. Cola ayuda d'un microscopiu, Pasteur descubrió que, en realidá, intervenían dos organismus —dos varieais de levaduras— que eran la clavi del procesu. Unu producía alcohol i el otru, ácidu lácticu, que agriaba el vinu.

Gastal un moernu métodu pa eliminar los microorganismus que puein degradal el vinu, la cerveza o la lechi, endispués de cerral el líquidu en cubas bien sellás i elevandu la su temperatura ata los 44 grados centígrados duranti un tiempu cortu. A pesal del rechazu encetal dela endustria anti la idea de calentar vinu, un esperimentu controlau con lotis de vinu calentau i sin calentar demostró la efetiviá del procedimientu. Había nacíu assina la pasteurización, el procesu que ogañu garantiza la seguridá de numerosus produtus alimenticius del mundu.

{{cita|¿Cómo tieni desplicación el procesu del vinu al fermentar-si; la masa dehá crecer; o agriar-si la lechi cortá; o convertir-si en humus las ojas muertas i las prantas aterrás nel suelu? Deber de fechu confessal que las mias envestigacionis han estau imbuías con entensidá pola idea de que la estrutura delas sustancias, dendi el puntu de vista siniestru i diestru (si tol restu es igual), desempeña una parti importanti enas leises más íntimas dela organización delos seris vivos, adentrándu-si enos más oscurus confin d'una su fisiología.|Louis Pasteur

Omne vivum ex vivo

Demostró que tol procesu de fermentación i desconposición orgánica se debi ala acción d'organismus vivos i que el crecimientu delos microorganismus en caldus nutritivos no era pol mé dela generación espontánea. Pa demostral-lu, espuso caldus fervíus en matracis con un filtru qu'evitaba el passu de partículas de polvu ata el caldu de cultivu, al mesmu tiempu espuso otros matracis que no tenían esi filtru, peru que tenían un pescueçu muy largu i curvau qu'atravancaba el passu del airi, i pol ellu delas partículas de polvu, ata el caldu de cultivu. Al cabu d'un tiempu observó que nada crecía enos caldus demostrandu assina que los organismus vivos qu'aparecían enos matracis sin filtru o sin pescueçus largos venían del esterior, seguramenti del polvu o en holma d'esporas. Desta manera Louis Pasteur mostró que los microorganismus no se hormaban espontéunamenti nel enteriol del caldu, refutandu assina la hipótesis dela generación espontánea i demostrandu que tol sel vivo procedi d'otru sel vivo dantis (Omne vivum ex vivo). Esti prencipiu científicu que fue la basi dela teoría germinal delas maletias i la teoría celulari i significó un cámbiu de concetu sobri los seris vivos i el encetu dela microbiología moerna. Anunció los sus resultáus nuna gala dela Sorbona en 1864 i tuvu tol un triunfo.

Teoría germinal delas malotias enfeciosas

Endispués de resolvel el prubrema dela endustria del vinu, Pasteur fue llamau en 1865 pol gobiernu francés pa qu’ayudara a resolvel la causa d’una maletia delos gusanus de seda del sul de Francia, la qual estaba arruinandu la produción. Pasteur, comu él mesmu reconoció, no sabía nada de gusanus de seda, nostanti creía que la su ignorancia le significaba una ventaja, pos le permitiríe afrontal el prubrema sin prejuicius. Tras los éssitus obteníus, confiaba que el métodu científicu sedríe la herramienta qu’esclareceríe el prubrema ayudándu-li a topar una solución.

Encetó una envestigación d'ensayu i faldu duranti 4 años i tras estudiar con cudiau las maletias del gusanu de seda pudo comprendel los mecanismos de contagiu. Pol mé del microscopiu destapó que en realidá no tenían una maletia, sinó dos, venientis de dambos dos parásitus qu'enfetaban alos gusanus ena su etapa encetal i alas ojas de morera de que se alimentaban: el hongu dela pebrina (nosema bombycis) i diversas baterias intestinalis dela flacidez. El su pesqui fue drásticu: los uevos i ojas enfetás tenían que sel destruíus i reempracáus pol otros nuevos. Pol mé d'una rigurosa selección pudo isolal un grupu sanu i cuidó que no se contagiara. Nostanti, no tol resultaba bien pa Pasteur: sufrió una hemorragia cerebral que lo dehu ábate hemipléhicu del lau izquierdu. En quanto convaleció publicó un libru nel que detallaba los sus ensayos i destapamientos, conocimientu qu'otros paísis no tardarun en aprical. Ya antonis la endustria local dela seda o sericicultura recogía los frutos dela su uñidura i rucha ganancias pol primera vezi nuna década, i paísis comu Australia i Italia imitaban anchamenti la su técnica de selección.

El destapamientu dela cura dela maletia delos gusanus de seda aumentó la su fama i atrajo la su atención p'al restu de maletias contagiosas. La idea de que las maletias puein sel trasmitías entri criatutas vivientis era evidenti enas epidemias, comu el brote de cólera de 1854 ena calle Broad, Londris, que cobró la vida de 500 pressonas nun escasu radiu de 200 metros. Pol mé dela interrogación delos enfetáus i el seguimientu epidemiológu del contagiu, John Snow runchó idêntifical l'origi del broti nuna huenti d'augua pública. Snow convenció alas autoridá de que cerraran el poçu i la epidemia paró. Nostanti, la idea d'una maletia contagiosa no resultaba crara pa la puebración, pos chocaba col pensamientu dela época. La pieza que faltaba pa dal coherencia a esta línia de pensamientu i resolvel los sus puntos débiles e inesplicablis era destapal qué era asitau el trasmisol dela maletia.

En estas circunstancias demostró esperimentalmenti i desenvolvió la teoría germinal delas maletias enfeciosas, sigún la qual toa maletia enfeciosa tieni la su causa (etiología) nun enti vivo microscópicu con albeliá pa propagal-si entri las pressonas, amás de sel el causanti de procesos químicus comu la desconposición i la fermentación, i la su causa no venía de drentu del cuerpu pol mé d’un desequilibriu d'humoris comu se creía tradicionalmenti. La su teoría fue mu discutía i poquinu populari: resultaba ridículu pensal que argu insignificantementi chiquinu ata lo envissibli pudiesi causal la muerti de seris munchu más «huertis».

Unu delos más nombraus ciruhanus que siguió los sus consejos fue el británicu Joseph Lister, quien desenvolvió las ideas de Pasteur i las sistematizó en 1865. Lister es considerau ogañu el pári dela antisepsia moerna, i realizó cámbius d'un cabu a otru nel mou nel que se realizaban las operacionis: los dotores debían laval-si las manos i gastal guantis, el estruental quirúrguicu debía esterilizar-si hustu dantis de sel usau, había que limpial las heridas con disolucionis d'ácidu carbólicu (que mataba los microorganismus). Dantis de Lister i Pasteur, passar pol quirófanu era, en munchus casos, una sentencia de gangrena i muerti. El propiu Pasteur, en 1871 sugirió alos médicus delos espitalis militaris que hervieran el estruental i los vendahis. Describió un fornu, llamau «fornu Pasteur», antecesol del autoclave, útil pa esterilizar estruental quirúrguicu i material de laboratoriu i nel tuvierun enteru sostribaeru.

Desenvolvimiento dela vacuna

Busto de Pasteur, Nuversidá Nacional de Colombia, Bogotá

En 1880, Pasteur se hallaba realizandu esperimentus con pollus pa fijal los mecanismos de trasmisión dela bateria responsabli del cólera aviari qu’acababa con munchus d'ellos. Juntu col su ayudanti, Charles Chamberland, inoculaba la bateria (Pasteurella multocida) a pollus i evaluaba el procesu dela maletia.

La estoria cuenta que Pasteur iba a tomal-si unas vacacionis, i encargó a Chamberland qu’inoculase a un grupu de pollus un cultivu dela bateria. Peru Chamberland se olvidó de hazel-lu, i se fue de vacacionis. Quandu dambos dos volvierun al cabu d’un mes, los pollus estaban sin enfetar i el cultivu de baterias acontinaba ondi lo deharun, peru muy debilitau. Chamberland inoculó alos pollus de toas maneras i los animalis no murierun. Desenvolvierun dalgunos síntomas, i una versión levi dela maletia, peru sobrevivierun.

El ayudanti, abochornau, iba a matal alos animalis i empencel de nuevu, quandu Pasteur lo aparó: la idea d’una versión debli dela maletia causanti dela inmunidá al su símil virulenta era conocía dendi 1796 gracias a Edward Jenner i Pasteur estaba al tantu. Espuso alos pollus una vezi más al cólera i nuevamenti sobrevivierun, pos habían desenvolviu una respuesta inmune. Llamó a esta técnica vacunación en onol a Edward Jenner. La diferencia entri la vacuna de Jenner i la de ántrax i cólera aviari, es qu’estas fuerun las primeras vacunas de patógenus artificialmenti debilitáus. A partil de dessi momentu no hazía farta topar baterias adicuás pa las vacunas, las propias baterias dela maletia podían sel debilitás i vacunás.

Vacunación de ganau contra el carbunco en Francia siguiendu el sistema Pasteur

Pasteur puso esti destapamientu en prática ábate al mesmu tiempu nel caso d’otras maletias causás pol agentis baterianus. En 1881, hizo una demostración dramática dela eficiacia dela su vacuna contra el carbunco, inoculandu la metá d’un rabañu d’ovejas mentris inyectaba la maletia (Bacillus anthracis) ala otra metá. Las inoculás cola vacuna sobrevivierun, el restu, murió.

Enos sus estudius contra la rabia, gastaba conejus enfetáus cola maletia, i quandu estos morían secaba el su tehíu nerviosu pa debital el agenti patógenu que la produzi, que ogañu sabemos qu’es un virus. En 1885 un iju, Joseph Meister, fue mordíu pol un perru rabiosu quandu la vacuna de Pasteur solu se había probáu con unos quantos perrus. El iju iba a morrel sin denguna duda quandu desenvolviesi la maletia, peru Pasteur no era médicu, de mou que si lo trataba con una vacuna sin probal bastanti podía acarreal un polvoreu legal. Nostanti, tras consultal colos sus colegas, el químicu se decidió a inocular la vacuna al muchachu. El tratamientu tuvu un éssitu assitau, el iju se recuperó delas heridas i nunca desenvolvió la rabia, Pasteur nuevamenti fue alabau comu éroe.

Algunas publicaciones

Pasteur Vallery-Radot (eds.) Œuvres de Pasteur. Masson, París

Dissymétrie moléculaire

• Fermentations et générations dites spontanées

Études sur le vinaigre et sur le vin

Études sur la maladie des vers à soie.

• Etudes sur la bière

Maladies virulentes, virus-vaccins et prophylaxie de la rage

Mélanges scientifiques et littéraires

Pasteur Vallery-Radot (eds.) Correspondance de Pasteur. Flammarion, París

Vol. 1: Lettres de jeunesse. L’Étape de la cristallographie 1840–1857. 1946

Vol. 2: La seconde étape. Fermentations, générations spontanées, maladies des vins, des vers à soie, de la bière 1857–1877. 1951

Vol. 3: L’Étape des maladies virulentes. Virus-vaccins du choléra des poules, du charbon, du rouget, de la rage 1877–1884. 1951

• Vaccination de l’homme contre la rage.

Quadernus de laboratoriu

En respuesta a esperiencias desagradablis pa Pasteur, le rogó ala su familia, en 1878, nunca muestral los sus quadernus de laboratoriu a naidi. Endispués dela muerti del fisiólogu Claude Bernard, tenía unu publicau con notas d’estudiantis, i Bernard había dudau dela teoría dela fermentación de Pasteur. Dessu obligó a Pasteur a tomal públicamenti una posición contra las posiciones de Bernard. Col fin de no provocal una situación similar a sí mesmu, impuso la prohibición dela publicación delos sus quadernus de laboratoriu.

En 1964, el úrtimu sobrevivienti decendienti varón diretu Pasteur Vallery, entregó los quadernus de laboratoriu ala Biblioteca Nacional de Francia. I quedarun disponiblis cola muerti de Pasteur Vallery-Radot, en 1971, i práticamenti utilizablis solu col catálogo 1985. En general, son 144 quadernus, 42 d'ellos recortis de periódicus, apuntis de crasi, etc. Los 102 quadernus restantuis, son notas de laboratoriu reales, i 40 documentos d'envestigación añal.

Onoris

Películas

The Story of Louis Pasteur. Diretol: William Dieterle. 1936. Obtuvu el Oscar a Paul Muni nel rol de Pasteur.

Eponimia

Astronomía:

• El cráter lunari Pasteur lleva esti nombri ena su memoria.
• En 1973, la Unión Astronómica Enternacional acordó onenajeal la su pressona puniendu el su apellíu al cráter Pasteur del praneta Marti.
• El asteroidi (4804) Pasteur tamién conmemora el su nombri.

Calle Pasteur (Đường Pasteur) en Đà Nẵng, Vietnam.

Toponimia:

• Dessistin 2020 callis «Pasteur» en Francia, siendu unu delos más propuestus comu nombri de calle. Duranti los movimientos de descolonización, que supusierun el cámbiu de nombris d’origi francés de munchas callis, las de Pasteur a menú conservarun munchas vezis la su denominación.
• El Enstitutu de Zoonosis Luis Pasteur, en Buenos Aires, Argentina.

Microbiología:

Ordin Pasteurellales Trevisan 1887

Familia Pasteurellaceae Castellani & Chalmers 1919

Géneru Pasteurella Trevisan 1887

Especies botánicas:

• (Euphorbiaceae) Euphorbia × pasteurii T.Walker
• (Rhamnaceae) Rhamnus pasteurii H.Lév.
• (Rutaceae) Euodia pasteuriana A.Chev. ex Guillaumin

Véasi tamién

Marie Laurent

Antoine Béchamp

Ignaz Semmelweis

Claude Bernard

Día Mundial dela Rabia

Estereoquímica

Milieu intérieur

Bibliografía

Debre, P. i Forster, E. (oct 2000). Louis Pasteur. Johns Hopkins University Press. ISBN 0-8018-6529-8.

de Kruif, P. (2005). Cazadores de microbios. Colombia: Edigrama Ltda.

de Kruif, P. (1973). Cazadores de microbios. Versión dela 64.ª edición alemana.

Martínez Báez, M. (1972). Pasteur: Vida i obra (ogañu Vida de Pasteur). México: Fondo de Cultura Económica. ISBN 968-16-5053-0.

Saltini, A. (1989). Storia delle Scienze Agrarie (vol. IV, L'agricoltura al tornante della scoperta dei microbi). Bolonia: Edagricole. ISBN 88-206-2415-X, pp. 1-97, 387-404.

Tiner, J. H. (1990). Louis Pasteur: Founder of Modern Medicine. Mott Media. ISBN 0-88062-159-1 (paperback) {en}.

Vallery Radot, R. (1937). Vie de Pasteur. Flammarion.

En francés

René Vallery-Radot. M. Pasteur. Histoire d’un savant par un ignorant. J. Hetzel, París, 1883; (traducción al inglés en 1885).

Émile Duclaux: Pasteur. Histoire d’un esprit; (traducíu al inglés 1920, reeditau en 1973).

René Vallery-Radot: La vie de Pasteur. 2 vols. París, Flammarion 1900; (traducción al inglés en 1902, reeditau en 1975; traducción al alemán en 1948).

Émile Roux. L’Œuvre médicale de Pasteur. En: Centième anniversaire de la naissance de Pasteur. 27 de diciembri de 1922. Hachette, París, 1922.

Le laboratoire de Monsíeur Pasteur. En: Centième anniversaire de la naissance de Pasteur. 27 de diciembri de 1922. Hachette, París, 1922.

Iliá Méchnikov. Trois fondateurs de la médecine moderne: Pasteur, Lister, Koch. Alcan, París, 1933; (al inglés en 1939, reeditau en 1971).

Adrien Loir. A l’ombre de Pasteur. Souvenirs personnels. Le Mouvement Sanitaire, París, 1938.

Patrice Debré: Louis Pasteur. Flammarion, París, 1994; (al inglés en 1998).

Françoise Balibar (ed.) Pasteur. Cahiers d’un savant. CNRS, París, 1995.

Pierre-Yves Laurioz. Louis Pasteur. La réalité après la légende. Éditions de Paris, París, 2003.

Antonio Cadeddu. Les vérités de la science. Pratique, récit, histoire: le cas Pasteur. Leo S. Olschki, Florencia 2005.

(Autol italianu) Dal mito alla storia. Biologia e medicina in Pasteur. Franco Angeli, Mailand 1991).

N'inglés

Gerald L. Geison: The Private Science of Louis Pasteur. Princeton University Press, Princeton, 1995.

René Dubos. Louis Pasteur. Free Lance of Science. Little, Brown and Company, Boston 1950; (traducción francesa en 1955, reeditau en 1976).

René J. Dubos. Pasteur and modern science. Doubleday, Garden City (Nueva York) 1960; (reeditau en 1988; traducción al alemán en 1960).

Gerald L. Geison. Louis Pasteur. En: Charles Coulston Gillispie (ed.) Dictionary of Scientific Biography 10, Charles Scribner’s Sons, Nueva York 1981, pp. 350-416.

Bruno Latour. The Pasteurization of France. Cambridge, 1988; (traducción francesa en 1994).

Controversia con Antoine Béchamp. Keith L. Manchester: Antoine Béchamp: père de la biologie. Oui ou non? En: Endeavour 25 (2): 68-73 2001.

Sobri las vacunas de Pasteur. Hervé Bazin. L’Histoire des vaccinations.

Sobri l'origi dela vacunación contra el cólera aviari. Antonio Caddedu. Pasteur et le choléra des poules. Révision critique d’un récit historique. En: History and philosophy of the life sci. 7 (1): 87-104. 1985.

Sobri la teoría delos gérminis. K. Codell Carter. The development of Pasteur’s concept of disease causation and the emergence of specific causes in Nineteenth-Century medicine. En: Bull. of the History of Medicine 65 (4): 528-548. 1991.

Controversia con Robert Koch. K. Codell Carter. The Koch-Pasteur Dispute On Establishing the Cause of Anthrax. En: Bull. of the History of Medicine 62 (1): 42-57. 1988.

Sobri l'origi del carbunco - vacunación. Antonio Caddedu: Pasteur et le vaccination contre le charbon. Une analyse historique et critique. En: History and philosophy of the life sci. 9 (2): 255-276. 1987.

Surgimientu d’una endustria delas vacunas dela vacunación contra el carbunco. Maurice Cassier. Producing, Controlling, and Stabilizing Pasteur’s Anthrax Vaccine. Creating a New Industry and a Health Market.

Sobri el efetu Pasteur. Efraim Racker. History of the Pasteur effect and its pathobiology.

Controversia con Félix-Archimède Pouchet. Nils Roll-Hansen. Experimental Method and Spontaneous Generation. The Controversy between Pasteur and Pouchet, 1859-64.

Atijus esternus

• 1856. El glucógeno. El proceso de pasteurización (Bernard y Pasteur) Prantilla:Wayback