Manuela Gallardo

Manuela Gallardo Gómez
Información pressonal
Nacencia	1893 ; Villanueva de la Serena (España)
Muerti	1967 ; Madrid (España)
Nacionalidá	Española
Información prehessional/profissional
Oficiu	Educador, pedagogo y escrevienti
	[editar datos en Wikidata]

Manuela Gallardo i Gómez (Villanueva dela Serena, Badajós, 1893–Mairil, 1967) hue una educaora i escrevienti estremeña, destacá pola su lavol pedagógica n'Estremaúra a mediaus del siegru XX.

Biografía

La su nacencia hue en Villanueva dela Serena, en Badajós i hue la otava ija, delos onzi ijus nacíus nel matrimoñu dentri Carmen Gómez Aguilar i el impresariu José Gallardo Rodríguez, hundaol dela su Fábrica de Xabonis pal 1887. La su ermana mayol hue Isabel Gallardo, reconocía foclorista i utora estremeña cona que casava ena su procupación pola educación, pola arrecogía de patrimoñu coltural imaterial i pola letratura mundial i tamién pola d'Estremaúra.^[1]^[2]

Estudió nun conventu de monjas franciscanas, envera de Colonia, en Alemaña, dentri'l 1911 i el 1917 i anduvu infrugenciá polas ennovacionis ena educación de paisis comu Noruega o Paisis Baxus. Bregó pola criación d'escuelas moernas i acessiblis, assina comu pola entrodución de metoulogías d'educación alantás, comu el metou Montessori i el gastu d'escuelas al airi libri pa espachal enas puebracionis roalis d'Estremaúra. El su trebaju s'enfuscó n'acabijal col nalfabetismu ena región i amejoral la calidá ena educación, possimenti enas arias roalis de difici acessu, assina hue alantá n'aprical metous d'educación acompará, por mé delos sus estuyus i esperencias en varius paisis uropeus.^[1]^[3]

Correúra profissional

Tamién es reconocía pol su trebaju comu escreviora i difundiora. Dentri las sus obras más emportantis está Aconteceris del Rhin nel 1923, qu'es una recopilación de cuentus basaus n'estorias popularis alemanas, por mé dela su vivencia educativa nessi país. La su produción letraria abarcó varius génerus, comu la novela, l'ensayu i la difundición centífica. Amás dela su obra prencipal Porqué semus probis?, ena qu'analiza las causas del nalfabetismu n'España i proponi solucionis basás en moelus educativus estrangerus, tamién pubricó la serii Conoci los frutus dela tu tierrina del 1958 al 1959, derigía ala educación infantil i endedicá al estuyu dela botánica, con un vistal enas prantas i frutus d'Estremaúra.^[2]^[3]

Ena su vida, dessalió tamién pol su comprometimientu cona difundición dela conocencia botánica i la educación infantil, trebajandu junta especialistas comu'l botánicu i boticariu Pío Font i Quer ena criación de Colección de láminas silvestres nel 1949, una obra ilustrá que precurava aprendel alos zagalinus i zagalinas sobri las prantas bravías dela región. Endispués de varius ententus de crial una escuela en Villanueva dela Serena, inaguró una casa-escuela mentá comu “San Franciscu d'Asís” en Badajós, cona ayúa delas reverendas mairis de Sehaan en Liechtenstein i el sostribu del cardenal Juan Benlloch i Vivó o Enrique Delgado Gómez, obispu de Pamplona i pallí apricó angunas delas ennovacionis pedagógicas que promovió ena su carrera.^[2]^[4]^[5]

Obra

Aconteceris del Rhin. Mairil, Tip. Del Ospital del Niñu Jesús, nel 1923.
Mochachas en Frol. Mairil, Sociedá dela Educación Atenas, nel 1946.
Porqué semus probis?, Editorial Gómez, nel 1954.
Conoci los frutus dela tu tierrina. El malacatoneru: Prantai mas arvus, nel 1958.

Reconocencias

En reconocencia dela su lavol ena educación i coltura, la su obra acebió críticas derecheras ena presa dela epoca, comu enos pedióricus ABC i La Vanguardia. Enque no es sabíu qu'acebiera premius oficiais emportantis ena su vida, la su infrugencia ena educación n'Estremaúra i possimenti la su contribución ena brega ala contra del nalfabetismu, án síu valoreás comu parti mu hundamental dela estoria dela educación dela región.^[2]

Nel 2020, hue encruía endrentu del proyeutu “Mugeris Vestigaoras enos Archivus Estatais del 1900 al 1970” pa descrevil los archivus i pala criación dun micrositiu específicu nel Portal de Archivos Españoles (PARES), desenroau entri'l 2020 i el 2023. Esti proyeutu á síu apuchau pola Subdirección General de Archivos Estatales, col ojetu de dal un grandi vistal ala lavol de vestigación aviá n'España polas mugeris entri'l 1900 i el 1970 a raís delos registrus decumentais qu'estan conservaus enos Archivus de Gestión delos AAEE del Menisteriu de Coltura,^[6] comu sonin:

L'Archivu Estóricu Nacional.
L'Archivu dela Corona d'Aragón.
L'Archivu dela Real Chancillería de Valladolís.
L'Archivu General dela Almenistración.
L'Archivu General delas Indias.
L'Archivu General de Simancas.
El Centru d'Enteración Decumental d'Archivus.

Referencias

1 2 «Gallardo i Gómez, Manuela». sepuex.unex.es. Consultado el 01 de jullu del 2026.
1 2 3 4 CHDE Trujillu (09 de deziembri del 2016). «Manuela Gallardo Gómez. Refressión i ación pedagógica duna mugel estremeña a mediaus del siegru XX.». Consultado el 01 de jullu del 2026.
1 2 «Pessona - Gallardo i Gómez, Manuela.». PARES. Consultado el 01 de jullu del 2026.
↑ Barrantes Lozano, Antonio (2019). «Correspondencia de Dña. Manuela Gallardo a D. Celedonio Pérez, Alcaldi de Villanueva dela Serena 1957-1961 pala criación dela granja-escuela.». Los tratantis de mulas: chalanis de Campanariu, ISBN 978-84-09-09036-5, páginas. 183-192. (Federación de Asociaciones Culturales de La Siberia, La Serena y las Vegas Altas (SISEVA)). Consultado el 01 de jullu del 2026.
↑ «Gallardo i Gómez, Manuela». datos.bne.es. Archivado desde el original el 2 de julio de 2026. Consultado el 01 de jullu del 2026.
↑ «Mugeris Envestigaoras.». www.cultura.gob.es. Consultado el 01 de jullu del 2026.

Atijus p'ahuera

En Commons ai conteníu multimedia sobre Manuela Gallardo.
CEIP Mtra. Sra. dela Soledá Proyeutu Decumental.
Porqué semus probis? Manuela Gallardo i Gómez.

Datos: Q130336592

[:2-1] 1 2 «Gallardo i Gómez, Manuela». sepuex.unex.es. Consultado el 01 de jullu del 2026.

[:0-2] 1 2 3 4 CHDE Trujillu (09 de deziembri del 2016). «Manuela Gallardo Gómez. Refressión i ación pedagógica duna mugel estremeña a mediaus del siegru XX.». Consultado el 01 de jullu del 2026.

[:1-3] 1 2 «Pessona - Gallardo i Gómez, Manuela.». PARES. Consultado el 01 de jullu del 2026.

[4] Barrantes Lozano, Antonio (2019). «Correspondencia de Dña. Manuela Gallardo a D. Celedonio Pérez, Alcaldi de Villanueva dela Serena 1957-1961 pala criación dela granja-escuela.». Los tratantis de mulas: chalanis de Campanariu, ISBN 978-84-09-09036-5, páginas. 183-192. (Federación de Asociaciones Culturales de La Siberia, La Serena y las Vegas Altas (SISEVA)). Consultado el 01 de jullu del 2026.

[5] «Gallardo i Gómez, Manuela». datos.bne.es. Archivado desde el original el 2 de julio de 2026. Consultado el 01 de jullu del 2026.

[6] «Mugeris Envestigaoras.». www.cultura.gob.es. Consultado el 01 de jullu del 2026.

[1]

[2]

[3]

[4]

[5]

[6]