Ver el código de «Marcu Uréliu»

{{destacau}}
[[File:Marcus Aurelius Glyptothek Munich.jpg|thumb|350px|right|Bustu Marcu Uréliu, ena Glyptothek Munich]]
'''Marcu Uréliu''' [[IPA|[ˈmaɾku uˈɾelju]]] ({{en la|Marcus Annius Verus Catilius Seuerus}}, [[IPA|[ˈmaɾkʊs ˈanːɪʊs ˈweːɾʊs kɶːˈtɪlɪʊs sɛˈweːɾʊs]]]) hue un filósofu estoicu i [[Empériu romanu|emperaol romanu]] el sigru II, el últimu los cincu güenus emperaoris. Hue el prototipu sábiu governanti.

== Via ==
=== Família ===
Marcu tuvu nacéncia endrentu la família los Ánius Verus, de quartus i con agarris políticus. La família el pairi es del monicípiu d'[[Ucubi]] (ogañu [[Espejo]]), al sulesti [[Corduba]] i tenia tradicion política entre los sus miembrus varonis. Su agüelu paternu hue el políticu [[Marcu Ániu Veru (el vieju)|Ániu Veru]], quien trebajó de consu en el 121 i en el 126 i de senaol, por ordin [[Vespasianu]] i anduvu tamien ena pretura. Su pairi, de mesmu nombri [[Marcu Ániu Veru]], trebajó de pretol i se casó con [[Domícia Lucila]], quien recreia duna família la nueva aristocrácia que posseia frábicas ladrillus de los que se bastecia [[Roma]]. La ermana Domícia, [[Faustina la Mayol|Ánia Galéria Faustina]] se casó con el emperaol [[Antoninu Piu]] i hue tamien, amás de tia, suegra Marcu Uréliu.

=== Nacéncia i primerus añus ===
Pocus endilguis essestin tocantis a los primerus añus el filósofu. Se sabi de ciertu que tuvu nacéncia el 26 Abril el 121 quandu era consu su agüelu [[Marcu Ániu Veru (el vieju)]]. Se crió en un cortiju familial en el tesu Céliu, andi vivian las famílias ricas de Roma. Un pal paí d’añus naci su ermana [[Ánia Cornifícia Faustina]], hutura mujel [[Umídiu Quadratu]]. 

Por desgrácia, el pairi dambus a dos zagalinus enfeneció mentris trebajava comu pretol, tuviendu Marcu Uréliu apeninas 3 o 4 añinus. S’acupó la custódia el agüelu [[Marcu Ániu Veru (el vieju)|Ániu Veru]] i des que l’espenó el iju se muarun pa la su mansion, junta el tempru lateranu<ref>''Historia Augusta, uita Marci'', VII.</ref>. 

Allina de mocinu escomiença a recebil los primerus endilguis conos que el bisagüelu costeó sin arreparu<ref>''M. Ant.'' I 4.</ref> i prencipió a deprendel [[luenga griega|griegu]], polo que el pilraeru por esta léngua vinu dende la infáncia. Es anegóticu el hechu de que Marcu Uréliu palrara en [[luenga griega|griegu]] cona mairi, ca i quandu se derigia a ella. Ya de polos sus primerus añus se muestra un zagalinu sériu<ref>''Vita Marci'', II 1.</ref>. Por mó el libru primeru la obra que queó, se tien conocéncia del ambienti en que se crió de muchachu: el portamientu pastueñu el agüelu<ref>''M. Ant.'', I 1.</ref>, la religiosiá la mairi<ref>''M. Ant.'', I 3.</ref>, el espiparru la educáncia el bisagüelu<ref>''M. Ant.'', I 4.</ref> i la nombreria i güena fama que le queó su pairi <ref>''M. Ant.'', I 2.</ref>.

=== Estúdius joventú ===
La família puu pagá-le a Marcu Uréliu los mejoris professoris. S'estilava ena epoca no dil a las escuelas púbricas los moçus cuya família pia pagá-le una enseñança privá en casa<ref>''M. Ant.'' I 4.</ref>. Assinque cuentó conos professionalis mas punterus enas diversas ramas el conocimientu. Por mé el libru I que sirvi de prólogu a los sus ''Revacaerus'' i la biografia ena ''[[Historia Augusta]]'' se conocin la huerça las pressonaliais que endilgarun al moçu Marcu.

[[File:Young Marcus Aurelius Musei Capitolini MC279.jpg|thumb|left|150px|Bustu Marcu Uréliu de quandu nuevu.]] 

En el sabel literáriu lo enició un tal Uforión, seguramenti angún escravu griegu, cosa que conprementaria conos endilguis el cómicu [[Géminu (cómicu)]] ena adolescéncia. Con él deprendió el arti la comédia griega, el entonaeru i tamien el recitaeru. 
Andrón, músicu de profession, le deprendió las artis musicalis i matemáticas, antañu inseparabris, i los primerus escalahansus la geomatria.

Los prencípius la gramática i tamien la conposicion los deprendió de [[Alejandru el Gramáticu]], a quien mandarun a buscal dende [[Frigia]]. De pa esta epoca, quandu tenia unus 11 añus se dis que mençó a revistil de filósofu i a portal-se comu tal.
Ascuchó licionis de representantis las destintas escuelas oratória el empériu, sin canteal-se por denguna en concretu. El oraol d’origin griegu [[Erodi Áticu]] le deprendió oratória. Endispués lo tuvu comu güen amigu. Con quien tamién hizu dispuesinu mu güena gavilla hue con [[Frontón]], maestru retólica. Él quiju enverea-le en el caminu la retólica en paragi el su huturu comu emperaol, pero no hue escapás, pos prefirió la filosofia. Mantuvun professol i alunu albondosa correspondéncia de la qual avemus muchas muestras. A él le agraeci el ve-le enseñau no el entressenu la retólica, sino la alverténcia de cómu el poel i la tirania enputecin a los ombris<ref>''M. Ant.'', I 11.</ref>.

[[Dionetu]] hue el su gran maestru, maestru de cosas utis pa la via de ca dia, comu el ejercíciu corporal i los primerus endilgus filosóficus. Hue quien lo hurgava pal deporti i pa la caça, activiais en tó conparantis a las moernas i cona que las joventuis antíguas se esparigian. Tamien l’enseñó debuju i portamientus el mó via rúspiru, al mó i manera melital, sin grandis regalezas i con reziura<ref>M. Ant., I 6.</ref>. Hue quien lo enició ansimesmu a la filosofia i lo que le resultó mu aparenti: destinguil a los chalratanis de los verdaerus hablaoris.

Ara, quien mas asseñalarun el pensaeru i mó via Marcu Uréliu huerun los sus maestrus filosofia, prencipalmenti [[Rústicu]]. Por mó de [[Rústicu]], Marcu assumió el su huturu comu filósofu enque tuviessi que vivil de continu comu ombri púbricu enas sus briegas comu ejecutivu. Se margulló enas enseñanças el estoicu [[Epictetu]], a quien muchu apreció i al que mienta en várias ocassionis ena su obra. Hue sin dua quien mas le infruyó, lo mesmu en el pensaeru que en el estilu. De [[Rústicu]] deprendió la moral rézia i reta el estoicu, comu él mesmu asseñala: 
{{Almiental|Παρὰ Ῥουστίκου τὸ λαβεῖν φαντασίαν τοῦ χρῃζειν διορθώσεως καὶ θεραπείας τοῦ ἤθους|Revacaerus I 6|Marcu Uréliu}}

<center>"De pa Rústicu, vel cogiu la muestracion el nessecital de la retitú i el cúdiu el caraiti”.</center>
 
En essi mesmu passagi l’agraeci el ve-lo desapartau de la retólica pa abraçal assín la filosofia i tamien el deprendé-le a leel desenreliandu el conteniu i enbebiendu-se d'él, no a passal los ojus por cima las letras. Con Rústicu s’alvierti el trumfu el conteniu sobri la horma, algu que tamién asseñalarava el própiu estilu los sus testus.

Pero tamién uvu d'algotrus filósofus las sus conferéncias. Quandu [[Antoninu Piu]], les precuró a él i a [[Lúziu Veru]] a unus los mas notabris filósofus la epoca: [[Apolóniu de Calcedónia]]. Tamién contarun conas palramentas [[Sestu de Queronea]], filósofu estoicu, sobrinu el celebri [[Plutarcu]]. A dambus a dos agraeci sel ombris de conduta rézia i güenus ejemprus moralis<ref>''M. Ant.'', I 18, 19.</ref>. Tamién oyó las licionis de [[Catulu el estoicu]] i [[Atenódotu]].

=== Via política de nuevu ===
[[File:MarcAurèle.jpg|thumb|right|150px|Marcu enos jardinis Versallis.]]
Marcu Uréliu, enque a un plontu no se le tenia comu el sucessol al mandu emperial, cuentó con una dobri via dende mu chiquinu: una política, comu tó ombri aristocráticu que se terciara, i otra en baju el techu familial, a la sombra los librus i ascucha los mas eminentis espertus la epoca.
 
Des que tuvu seis añus hata el dia la su muerti, Marcu anduvu agateandu gracis políticus i hacinandu un haci títulus. Quandu apeninas tenia 6, [[Adrianu]] nomina a [[Marcu]] a engressal enos ''equites''. Al sotru añu, con 7, eá ena que quiciá enpençara tamien la su educacion, entra en el prestigiosu colégiu sacerdotal los [[salii|sálius]], siendu ''salius palatinus''. 

De que hizu los 15 recebi la [[toga uirilis|toga viril]], lo qual le supón margullil-se ena via política comu un ciaanu mas. El emperaol [[Adrianu]], precurandu atijá-lo cona família el que tendria que vel siu el próssimu emperaol [[Éliu Cesa]], lo prometi cona ija d'ésti. Con tó i con essu, el casóriu no siguió palantri, pos Éliu Cesa mueri de chopetón i [[Adrianu]] acoloca comu el su sucessol a [[Antoninu Piu]], tiu Marcu Uréliu.

=== En baju la protecion Antoninu ===
Dos añus despues, en el 136, [[Antoninu Piu|Antoninu]] adota a Marcu Uréliu i a [[Lúziu Veru]], iju [[Éliu Cesa|Éliu]], endespues de la decision [[Adrianu]] de siguil en el poel. Namás mueri el emperaol, el moçu Marcu Uréliu, ejecutandu el su encargu políticu, organiza los juegus fúnebris i la apoteosi [[Adrianu]], con gran acogia el púbricu, oviamenti. D'essa eá la su carrera política trasciendi de mou espasmosu. Con namás 17 añus, es hechu qüestol, ''seuir turmarum equitum romanorum'', ''princeps iuuentis'' i participa de várius colégius sacerdotalis. Amás tamien es nombrau ''Caesar'' por [[Antoninu Piu|Antoninu]], de los Urélius, quien densiguia vidu en él el próssimu sucessol. Marcu tuvu que mual-se el nombri i adotal el de Uréliu, queandu-se assina Marcu Uréliu Antoninu. Por esta epoca tien que mual-se a las dependéncias [[Adrianu]], algu que no le petó albondu. 

Conos endilguis el emperaol, Marcu escomiença a hazel-se-le familial las activiais el mandu emperial. Por suerti, tuvu güen paradigma, pos [[Antoninu Piu|Antoninu]] tuvu fama de sel güen i justu governanti i de sel religiosu i clementi (vé-le í el moti ''Pius''). A él enos ''Revacaerus'' le dedica una sérii agraecimientus i asseñala rehuertimenti las vertuis que tuvu [[Antoninu Piu|Antoninu]] comu pressona i derigenti. Con tó, Antoninu no le dió potestá trebunícia ni proconsulal ata que no llevó unus nuevi añus de aprendizagi. A los 26 ya via siu consu por dos vezis.

=== Marcu hunda una família ===
[[File:Faustina Minor Louvre Ma1144.jpg|thumb|150px|right|[[Faustina la Menol]].]]
En el añu 145 Marcu se casa cona ija el emperaol, [[Faustina la Menol]]. D'esti jeitu quean bien cierraus los cérculus familiaris sucession. [[Faustina la Menol|Faustina]] era prima carnal Marcu, pos la mairi d'aquella era la su tia [[Faustina la Mayol]], ermana Domícia. Las boas huerun mu sonás en el empériu, pos se llegó hata acuñal una monea comemorativa i se dierun donativus al puebru i al ejércitu.

[[File:Imperador_Cômodo_com_os_atributos_de_Hércules.jpg|thumb|left|150px|[[Cómou]] conparanti a [[Érculi]].]]
Con tó i con essu, la estória trata a la mujel de mou destintu a la que Marcu asseñala, pusiendu-la de mujel fria. Tamien se l’acusó de vel participau ena conjura el general [[Avídiu Cásiu]], enque essu está sujetu a destintas entrepetacionis. A la contra, Marcu agraeci ve-le caiu una mujel tan güena i cenzilla i amorosa. Más, con ella tuvu mas duna dozena ijus, tós arreconocius, pero de los que poquinus sobrevivierun. Quearun [[Ánia Urélia]], [[Víbia Urélia Sabina]] i [[Cornifícia]] entre las hembras i de varón namás [[Cómou]], quien le siguiria a él en el empériu. [[Cómou]] hue mellizu Antoninu, quien murió quandu namás tenia quatru añinus.

De que murió Faustina recebió tolas celebracionis correspondientis a una emperatrís.

=== Marcus Imperator ===
En el añu 161 mueri [[Antoninu Piu|Antoninu]] en [[Lori]], andi tenia un cortiju particulal. Antinu d’espenal, Antoninu le queó dau el mandu i a su ija Faustina. Marcu hue llamau altonci ''Imperator Caesar Marcus Aurelius Antoninus Augustus'' i sigún se hizu con tan altu cargu, lo conpartió con su amigu i quasi ermanu [[Lúziu Veru]], que muó tamien el su nombri Lúciu Cejóniu Cómou por ''Imperator Caesar Lucius Aurelius Verus Augustus''.

Dambus a dos ejercierun el poel de horma equitativa junta el Senau. La inconpatibiliá caraiteris i la destinta naturaleza dambus regentis no enpiyó qu’el empériu apencara conos destintus gabarrus que lo enpataratavan. El própiu Marcu l’entriegó en matrimoñu a su ijina [[Lucila]]. Mala fama governaol tuvu [[Lúziu Veru]] quienm mas que ejercel el su poel, se dedicó a dil en furriona en furriona de que aballó de Roma pa salienti, mentris que Marcu derigia la precupanti situacion el empériu dende Roma, entre estúdiu i estúdiu. 

==== Las guerras contra los partus ====
El cámbiu goviernu prevocó que enos puebrus de la [[Armenia]] se produjieran nuevus entaramaus. [[Vologesu III]], rei [[partus|partu]], enpón en [[Armenia]] un préncipi, [[Pacoru]], enque la zona estuviera manejá por dos legionis pendientis del governaol [[Capadocia]]. Se enlió una batalla que tuvu comu conseqüéncia la perda las terrenus arménius i de parti [[Siria]] i numerosas vias los melitaris que se hallavan pallí. 

Con un pobrema assín, Marcu Uréliu s’atermina por mandal pallá el contingenti qu’andava al cúdiu los arrayus conos [[germanus]] al mandu el general Estáciu Priscu mentris que en Salienti [[Avídiu Cásiu]] precura reorganizal las huerças disponibris i [[Lúziu Veru]] ahila pa [[Siria]] con idea de derigil la custion. La verdá es que Lúziu passó el tiempu de charrangana en [[Antioquia]] sin dil a assomal-se a la guerra enos quatru añus que duró. En el 165, endespues de una sérii vitórias al mandu [[Avídiu Cásiu]], la situacion s’apazígua i [[Lúziu Verru]] güelvi pa [[Roma]]. El Senau le da el títulu de ''Particus'' a Lúziu por ganal a los partus i Marcu es llamau ''Imperator'' por tercel ves.

==== Contautus con China ====
Una de las conseqüéncias que tuvu el vel venciu a los [[partus]] hue el logral un passu seguru a las regionis mas orientalis conocias. S’abrió una ruta pol [[Golfu Pérsicu]] hata topal [[China]] i embajás huerun mandás pallá. Unas corónicas chinas la epoca mientan a Marcu Uréliu con el nombri de ''An-Tum'', anque las rutas abiertas no huerun de mucha freqüéncia, pola alejacion i la poca segurança que avia.

==== Las guerras contra los puebrus el norti ====
[[File:Marcomannia e Sarmatia 178-179 dC.jpg|thumb|left|350px|Mapa las guerras contra los [[marcomanus]] entre el 178-179.]]
Se barruntava el rehileu los puebrus el norti i las fronteras no estavan bien assegurás dende tiempu á. Arrancarun los estaramaus en el 166 i durarun hata el 180 a lo largu los arrayus [[Danúbiu|danubianus]]. Se vidun en el enfrentamientu destintas tribus norteñas, comu los [[quadus]], dende siempri unius a los [[marcomanus]], los [[sármatas]], [[ermundurus]], [[yazigus]], [[vitovalus]] i [[lombardus]]. Más, el libru que sirvi de prólogu a los ''Revacaerus'' acaba cona frasi ''Τὰ ἐν Κουάδοις πρὸς τῶ Γρανούᾳ'' “Pa entre los quadus, junta Gránua”. 

El cagaçu i la precupacion en [[Roma]] huerun tan grandis de que los [[marcomanus]] assitiarun [[Aquilea]] en el 167, que Marcu Uréliu tuvu qu’acuil a un ritu espurechamientu del que no se jechava manu dende el 399 e. C., el ''[[lectisternium]]''. Entre el 169 i el 170, cona muerti [[Lúziu Veru]] i las correspondientis honras fúnebris, Marcu Uréliu tuvu que aballal pa [[Roma]], momentu que aprovecharun los marcomanus pa avançal-se sobre los arruinacaus ejércitus. A ellus s’ajuntarun puebrus romanizaus tiempu á, comu los [[sequanus]] i los [[belgas]] pa pola [[Galia]].

Las vitórias sobre aquellus puebrus en alantri huerun enteosas i rebalizas i ná puun assegural de ciertu, llegandu a arcançal los arrayus [[Macedonia]] i [[Graecia]]. Situacion entrincanti que duró hata el 173, quandu várius ejércitus emperialis tuvun luchis contra los [[marcomanus]] i en 175 contra los [[yazigus]] huendu escapás de hazé-los engajeral-se. D'esti jeitu se firmarun trataus pas por duracion de tres añus (175-178).

==== Golpi dau pol general Avídiu Cássiu ====
[[File:Arch Marcus Aurelius.jpeg|thumb|right|150px|Arcu Marcu Uréliu, [[Trípoli]].]]
El general [[Avídiu Cássiu]] que via hechu una estrordinária lavol enos luchis contra los orientalis, en viendu el perigru que se recechava [[Roma]], s’alevantó cona idea de hazel-se cona parti oriental el empériu. Aquí es andi se cuenta la tradicion por parti la mujel Marcu Uréliu, [[Faustina la Menol|Faustina]], pos se izi ena ''[[Historia Augusta]]'' que conocia las entencionis el general, de mois que no hizu ná pa enpií-lo, entre otras cosas pol ve-le llegau enteracionis de que su mariu via muertu.

Pero los alevantamientus poquinu durarun, pos los própius ombris [[Avídiu Cássiu|Cássiu]] lo matarun i cuertandu-le la cabeça se la llevarun a Marcu Uréliu, quien via aballau pa [[Antioquia]] de que s’enteró del casu. Pero antigual de castigal o achacinal a los que estavan enliaus ena tracamundina, el emperaol se muestró conpassivu, quijiendu entendel las causas de semejanti alevantamientu. Hue indulgenti cona família [[Avídiu Cássiu|Cássiu]] i ordenó que baju concetu dengunu s’ensultara a naidi de los sus miembrus.

=== Últimus añus ===
La pas que firmarun conos [[marcomanus]] i [[quadus]] s’eschangó, quiciá pola incapaciá d'estus puebrus de cumpril conos mandaus los romanus. Los estaramaus atoñarun en el 178 i derivarian en nuevas guerras hata el 180, añu en que murió el emperaol. Una mijinina enantis la su muerti, [[Cómou]] acui al norti con ideas de tajal definitivamenti los pobremas conos [[marcomanus]] i [[quadus]]. Pero el pairi tenia pensau<ref>''Vita Marci'', XXVIII 1.</ref> vel acontinau las guerras ata rendí-los, puyendu acopral nuevus terrenus al empériu i buscal, a la final, la ansiá pas romana, decision que comunicó al su iju enantinu de dal la boqueá i que, a la contra, desobeeció. 

El 17 Marçu el 180, Marcu Uréliu espena endespues duna larga [[malotia]] que l’afetava  al bandul, seguramenti, canci estógamu<ref>Dión Cassiu, 71 33.</ref>. La ''Historia Augusta''<ref>''Vita Marci'', XXVIII 8.</ref> dis que Marcu Uréliu se despii ligeramenti del su iju, no huera sel que le contagiara, polo que puyera vel-se tratau de pesti, malotia que dende las guerras contra los partus se via destendiu por tol empériu. Tenia 58 añus. Por mó el Senau i el puebru romanu, Marcu Uréliu hue devinizau i decretarun tolo correspondienti a tal onol: arcu trumfal, estauta oru en el Senau, tempru, altal i sacerdotis.

[[File:Column.of.marcus.aurelius.complete.arp.jpg|thumb|center|200px|Coluna Marcu Uréliu, [[Roma]].]]

== Obra ==
Marcu Uréliu á passau a la estória las letras pol vel queau una las obras mas ralas de las que la estória s’á dinau a que sobreviviera, los ''Revacaerus''.

=== Títulu ===
El títulu la obra es conpricau, pos enos manuscritus que Guillelmu Silandru d’Asburgu saca dun códici palatinu le da el nombri de ''Tὰ εἰς ἑαυτὸν'' “Las cosas pa sí mesmu”. Dende altonci, las traducionis a las destintas léngas l’án dau títulus comu ''Meditaciones''<ref group=n>Es títulu que le da Gabaudán pa la su traducion i la huerça las traducionis hechas en castellanu.</ref>, ''Soliloquios o Reflexiones morales''<ref group=n>Sigún Díaz de Miranda.</ref>, ''The Meditations''<ref group=n>Títulu la edicion J. Collier.</ref>, ''To Himself''<ref>Pol Rendall.</ref>, ''His conversation with himself'', ''Thoughts…'' En [[luenga estremeña|estremeñu]] acontinandu cona tradicion ispana, lo entitulamus ''Revacaerus''.

=== Estória ===
Dende que Marcu Uréliu queó escrita esta obra, probabrimenti quandu andava de campaña contra los [[marcomanus]] i los [[quadus]] sigún firma en el acaberu el primel libru, l’obra hata tiempus moernus á teniu poca acogia por parti el púbricu i los especialistas. 

Al pocu de moril el emperaol, utoris comu [[Dión Cássiu]] o [[Erodianu]] mientan esta obra enos sus escritus. Un sigru enpues, ya en el IV, [[Temístiu]], refiriendu-se al testu marcurelianu lo llama ''Almonicionis''. Pa essi mesmu sigru ain enteracionis en [[Urelianu Vitu]] i ena ya citá ''[[Historia Augusta]]''. 

No se güelvin a tenel endilguis a tentu los ''Revacaerus'' hata el primeru el sigru X, quandu el obispu [[Cesarea]], Areta, en una carta los mienta.

Ya en el sigru XVI, en el 1558, Andrés Gesneru saca la primel edicion el testu enprentá, con traducion latina, por piticion de Conrau. A esta edicion le siguierun otras renpressionis.

En 1626 aparici una edicion ludunensi qu’umenta los marrus que arrastravan las anterioris edicionis, ata que por fin, en 1643 Mericu Casaubón espubrica una edicion cudiá tamien en el griegu original i cona traducion en [[luenga latina|latín]]. 

En 1652 sal una edicion en Cambridge, enriquecia con variantis, comentárius i testus aljuntus, a cargu de Thomas Gataker, hundamental pal entendieru mas concretu la obra Marcu Uréliu.

En [[Oxford]] hizun una edicion tamien grecolatina en 1680.

Enas edicionis mas moernas, a partil el sigru XX, campean la hecha en [[Belles Letres]] (con traducion francesa) por A. I. Tannoy en 1925 i la ossoniensi en 1944 pol A. S. L. [[Farquharson]], en dos volúmin, una con testu i traducion [[luenga ingresa|ingresa]] i otru con un ricu comentáriu.

=== El testu los ''Revacaerus'' ===
Lo primeru que llama l’atencion es sin dua el hechu de que Marcu Uréliu escreviera una obra entera en griegu, con un conteniu tan íntimu, en un momentu en que el Estau se diva esbarrungandu pol pesu las destintas culturas i pensaerus qu’albarcava i prejisava un ajuntamientu que se precurava por mé la pas. Los motivus son mas simpris: Marcu Uréliu era coscienti de que la luenga la filosofia pol esceléncia era el griegu, enque llevaran dende [[Cicerón]] un caminu bastanti largu andau eno tocanti a la capaciá el [[luenga latina|latín]] pa espressal el pensaeru filosóficu. Pero el filósofu-emperaol no mirava los testus ni de [[Cicerón]] ni de [[Séneca]], sino a los grandis filósofus que mas l’infruyerun por mó el [[estoicismu]] i las enseñanças los sus tantus professoris, que son vé-lo equí [[Eraclitu]], [[Sócrati]] i [[Epictetu]], prencipalmenti.

De [[Sócrati]] apañó al moelu ombri moral i conseqüenti, pero de [[Eraclitu]] i [[Epictetu]] bichó la horma de comunical el pensaeru, la física por parti [[Eraclitu]] i el mas puru estoicismu de [[Epictetu]]. Lo mesmu unu qu’otru eran griegus i en [[luenga griega|griegu]] escrivierun. I el hormatu de [[Eraclitu]] hue el aforismu i el de [[Epictetu]] mas de lo mesmu, prencipalmenti en el ''Enchiridion''. Vé-le í, los estuyosus encasullan la obra el emperaol entre la escritura aforística o bien entre el géneru los ''hypomnemata'' o notas pressonalis.

L’obra se devii en dozi librus, enque no essesti un atiju craru entre unas partis i otras. Namás está crara la destinción entre el libru primeru i el restu l’obra. El primel libru, a mou de prólogu, se conpón de una retahila agraecimientus a las pressonas que mas enfruyerun ena su via, dende familiaris mas allegaus hata maestrus, amigus, el própiu emperaol [[Antoninu Piu]] i a los própius diosis. 

S’inora si los pensaerus qu’espón dessa manera huerun escritus con un propósitu o no. Angunus arreparan ena possibiliá de ve-los escritus comu manual pal su iju [[Cómou]], enque lo mas seguru es que los escreviera aspécii notas cabildaeru própias pa sí própiu, sin idea de espubricacion. Otrus estudiosus opinan que prejisamenti por mistériu de sel notas, tuviera en menti una obra mas organizá i mejol redatá pal púbricu, enque tó essu son conjeturas.

=== Estilu ===
Los ''Revacaerus'' son escritus en un estilu eminentimenti antirretólicu, cosa estrordinária en una epoca andi la horma pulava por cima el conteniu. Marcu Uréliu ahuyia de tó tipu retólicas, algu que le vinu dau pol su professol [[Rústicu]]. Enque essu no senifica que descúdii la espression, tuviendu periodus bellus i gastandu metáforas, que, enque preteneçan al repertóriu tradicional estoicu, son verdaeraementi sugerentis. Las ''uariationes'' son albondosas, pos la repiticion temas l’obriga a la varieá hormas, repiticion, por otra parti, justificá pol valol dotrinal.

== Abreviaturas ==
Sigún el ''Liddell-Scott'', esti autol recebi la abreviatura ''M. Ant.'' del su nombri latinu ''Marcus Antoninus''.

== Anégotas ==
* Cierta ves qu’andavan honrandu al dios [[Marti]] en el colégiu [[salii|sálius]], Marcu Uréliu con 7 o 8 añus namás, hondeandu cona corona comu era costumbri entre los miembrus sálius a la estauta el dios la guerra, la suya hue a cael encimita la cabeça Marti. Esti hechu hue agurau comu que aquel zagalinu averia de sel emperaol.

* El emperaol [[Adrianu]] lo enmotó ''Verissimus'', pola serieá i reziura el jovin Marcu Uréliu, por altoncis de nombri Ániu Veru.

* Con onzi añinus ya escomençó a revistil-se de filósofu.

* En I 14 confiessa vel-se enbahal-se muchas vezis por mó del su maestru [[Rústicu]], pero que grácias a los diosis el assuntu no llegó a las manus.

* Marcu Uréliu hue un prohundu anticristianu, llegandu a hurgal las repressionis contras los prencipalis núclius cristianus el empériu, comu aconteció en [[Lugdunum]] (ogañu [[Lyon]]) en 177.

* Pa cubril conos gastus que suponian engrossal los frentis el ejércitu con un mayol númeru efetivus (entre los que se hallavan escravus i gladiaoris), tuvu que vendel gran parti el mobiliáriu paláciu.

* Comu melital no tuvu mucha fortuna. En diendu de reconocimientu tuvu la mala folla de que le hondearan conas hondas enemigas i un alabán peñuscus vinun sobre él i la escassina escorta que gastava.

* Hormi acabava una batalla diva al campu a assestil a los herius i a conpaecel a los muertus.

* Marcu Uréliu le iju a la su mujel [[Faustina la Menol|Faustina]] que lamentava no vel piu ejercel la su cleméncia pa enpiil la muerti el general [[Avídiu Cássiu]], a quien matarun los sus própius ombris pol repuchal-se al empériu i querel-se queal cona parti oriental.

* Contra la su via escassina en lujus i el su pensaeru, quandu Faustina murió se la honró con tó tipu cerimónias, estautas oru i apoteosi, piticion hecha por él mesmu al Senau.

* Marcu Uréliu rechaçó a la ermana [[Lúziu Veru]] comu esposa de que murió [[Faustina la Menol|Faustina]], no quijiendu da-le madrasta a los sus ijus.

* En atorgandu-le títulus a Cómou, Marcu Uréliu tenia la idea de que dejaria de portal-se de manera desvergonçua. El efetu hue tolo contráriu: Cómou se enpandurró, llegandu a aviental a tol pressonal que le tenia dau el pairi pa la su protecion i conseju.

* Erodianu trasmiti el supuestu discursu parenéticu a Cómou que su pairi le prenunció poquinu enantis de enfenecel.

* Hizun a Marcu Uréliu pressonagi de fición en destintas obras. En literatura, destaca la novela ''Mémoires d’Hadrien'', la escreviora [[Marguerite Yourcenar]]. En el cini es memorabri la penícula ''The fall of the Roman Empire'', andi [[Alec Guinnes]] encarna el pressonagi Marcu Uréliu. Amás aparici ena soná penícula ''Gladiator'', cuyu papel lo representa [[Richard Harris]].

== Huentis ==

=== Referéncias ===
{{listaref}}

=== Notas ===
{{Lista notas}}

=== Bibliografia ===

* Marco Aurelio, ''Meditaciones'', ed. Fco. Cortés Gabaudán i M. J. Rodríguez Gervás, [[Mairil]], Cátedra, 2001.
* Marco Aurelio, ''Soliloquios o Reflexiones a sí mismo'', trad. i not. J. Díaz de Miranda, [[Buenos Aires]], Austral, 1947.
* Liddell H., G., Scott R., ''A Greek-English Lexicon'', Oxford, 1996.
* Marcus Aurelius Antoninus, ''τὰ εἰς ἑαυτόν'', ed. A. S. L. Farquharson, Oxford, Clarendon Press, 1944, vol. I.

== Atijus ==
{{Commonscat|Category:Marcus Aurelius}}
* {{es}} [http://www.proverbia.net/citasautor.asp?autor=631 Frasis Marcu Uréliu]
* {{en}} [http://classics.mit.edu/Antoninus/meditations.html Meditations, tradución G. Long]
* {{en}} [http://www.iep.utm.edu/m/marcus.htm Marcu Uréliu, ena IEP]
* {{endicaol idioma|[[luenga griega|griegu]]}} [https://web.archive.org/web/20110810202354/http://4friends.od.ua/~yury/LL/aurel.html.utf8 ''Τὰ εἰς ἑαυτόν'' (original en griegu).]
* {{endicaol idioma|[[luenga latina|latín]]}} [https://web.archive.org/web/20120204164600/http://www.slu.edu/colleges/AS/languages/classical/latin/tchmat/pedagogy/latinitas/ma/ma-index.htm ''Marci Antonini imperatoris commentarium quos ipse sibi scripsit''].

== Véasi tamién ==
* [[Eraclitu]].
* [[Epictetu]].
* [[Estoicismu]].
* [[Faustina la Menol]].
* [[Faustina la Mayol]].
* [[Marcu Ániu Veru (el vieju)]].
* [[Marcu Ániu Veru]].
* [[Rústicu]].
* [[Sócrati]].

{{Estoicismu}}

[[Categoría:Políticus romanus]]
[[Categoría:Emperaoris romanus]]
[[Categoría:Estoicismu]]
[[Categoría:Filósofus romanus]]