Ir al contenido

Sajonis de Transilvania

Dendi Güiquipeya
Agricultoris sajonis de Hermannstadt (en 1900)
Cartel bilingüe en Hermannstadt
Ilesia en Frauendorf

Los sajonis de Transilvania (en alemán: Siebenbürger Sachsen u Siebenbürgensachsen; en úngaru: Erdélyi szászok; en rumanu: Saşi) son alemanis étnicus que s’assentun en Transilvania (en alemán: Siebenbürgen) dendi el sigru XII p’alanti.

La colonización alemana de Transilvania encetó col rei Géza II d'Ungría (1141-1162). Duranti muchas décaas, la tarea prencepal delos poblaoris alemanis fue defendel la lindi sudesti del Reino de Ungría. La colonización acontinó ata el final del XIII. Inque los colonus ena su mayol parti vinun dendi el Sacro Imperio Romano Germánico ociental, i generalmenti palraban dialectus francus (alemán), fuerun conocíus cumu sajonis ena chancillería úngara. Duranti la mayol parti dela su estoria, estus alemanis goçun duna condición privilegiá con respetu a los úngarus i los székely de Transilvania.

La puebración delos sajonis de Transilvania a descendíu dendi la Segunda Guerra Mundial. A pessar dela emigración en massa —prencipalmenti a Alemaña— entavía componin una minoría notabri n'Ungria i Rumania. El processu d’emigración acontinó duranti el régimen comunista en Rumania, i inclusu ena caía del régimen de Ceausescu en 1989, quandu aprosimadamenti meyu millon ahorrun pala su tierra ancestral n'Alemaña.[1]

Asentamientus medievalis

[Edital | Editá'l códigu]
En verdi, prencipal área d’orihin delos colonus. En amarillu, regionis secundarias d’orihin.
Hosman - un puebru sajón típicu i la su iglesia fortificá.
Asentamientus sajonis en Transilvania.

La fassi enicial delos assentamientus germánicus en Transilvania tuvu lugal a meyaus del XII cola aportá de colonus que s’assentun eno que sería conocíu cumu Altland u Hermannstadt Provinz (provincia de Sibiu, distritu de Sibiu), assitua en tornu a la ciá de Sibiu. Inque la prencipal razón que llevó al rei Géza II d'Ungría a convidal a los colonus germánicus a puebral la çona fue ayual a los szeklérs a defendel la raya oriental del su reinu contra los invasoris, tamién se requirían las sus albeliás mineras pa desenvolvel la conomía dela región. La mayol parti delos colonus aportaus duranti esta época procedían de Lussemburgu i dela región en tornu al ríu Mosela.

La segunda fasi dela colonización germánica s’encetó a prencipius del XIII, con colonus recreius ena su mayol parti dela cuenca del Rin, el sul delos atualis Paísis Baxus i la çona del Mosela, huntu con otrus aportalus de Turingia, Baviera i encrussu de Francia. Unu delos prencipalis asentamientus s’encontraba alreol dela ciá de Nösen, endispués rebautizá cumu Bistriţa, nel nordesti de Transilvania a orillas del ríu Bistrita. La çona circundanti sería conocía cumu Nösnerland. La aportal de nuevus colonus procedentis delos territorius del Sacro Imperio Romano Germánico estendió los assentamientus sajonis hazia el esti i el sul. Dendi la región de Hermannstadt, los colonus se destendun al valli del ríu Hârtibaciu (Harbachtal) ata los montis Cibin (Zibin) i de Sebeş (Mühlbacher). Esta región, centrá ena ciá de Sebeş), fue conocía cumu Unterwald. Al norti de Hermannstadt se desenvolvió Weinland enas prosimiais dela ciá de (Mediaș).

Nel añu 1211 el rei Andrés II d'Ungría convidó alos Caballeros Teutónicos al su reinu pa que s’assentassin i defendiessin el Burzenland ena esquina sudoriental de Transilvania, controlandu los passus montañosus delos Cárpatus i evitandu las incursionis delos cumanos. Los caballerus construyun abondus castillus i ciais, encruindu la gran ciá de Braşov. La colonización dela región de Burzenland corrió a cargu sobri to de colonus transilvanus del Altland. Nostanti, alarmau pol crecienti podel delos caballerus, Andrés II espulsó nel añu 1225 a la Ordin Teutónica del su reinu. Los caballerus se reasentun enos sus dominius en tornu al mari Bálticu, inque los colonus germánicus permaneçun nel Burzenland.

Desta forma, la raya oriental del reinu medieval d'Ungría estaba protegia al nordesti polos sajones de Nösnerland, al esti polos szeklers, al sudesti polos castillus i fortaleças construíus polos Caballerus Teutónicus i los sajones del Burzenland i al sul polos sajonis del Altland.

Organización medieval

[Edital | Editá'l códigu]
La catedral luterana de Sibiu (Hermannstadt).

Organización jurídica

[Edital | Editá'l códigu]

Inque los Caballerus Teutónicus abían abandonau Transilvania, los colonus sajonis permaneçun i el rei Andrés II les permitió conserval los derechus i obligacionis establecíus nel Diploma Andreanum (Ata de Andrés; Goldener Freibrief der Siebenbürger Sachsen, La Bula de Oro delas Sieti Ciais Sajonas) de 1224. Esti documentu otorgaba ala puebración germánica del territoriu assitiau entri Draas (Drăuşeni) i Broos (Orăştie) autonomía aministrativa i religiosa juntu con obligacionis hazia el rei d'Ungría. El territoriu colonizau polos sajonis abarcaba una çona de alreol de 30 000 km². Duranti el reinaú del rei Carlos I d'Ungría (probalementi hazia 1325-1329), los sajonis estaban organizaus enos llamaus Assientus Sajonis, con representación ena Dieta de Transilvania.

Organizacionis religiosas

[Edital | Editá'l códigu]
Frescos góticus del XIII ena ilesia fortificá de Mălâncrav.

Juntu a la Ordin Teutónica abía otras organizacionis religiosas emportantis que contribuyun al desenvolvimiento delas comuniais germánicas cumu las abadías cistercienses de Igrisch (Igriş) ena región del Banato i el monasteriu de Cârţa en Fogarasch (Făgăraş). La ciá de Biertan fue la sedi del Obispu Luterano Evanhélicu de Transilvania entri 1572 i 1867.

La primera representación religiosa delos sajones transilvanus fue el Prevosti de Hermannstad, establecíu el 20 de diziembri de 1191 i que enos sus primerus añus abarcaba los territorius de Hermannstadt, Leschkirch (Nocrich) i Groß-Schenk (Cincu), las primeras çonas colonizadas polos sajonis.

Fortificación delas ciais

[Edital | Editá'l códigu]

L'invasión delos mongolis hazia 1241-1242 devastó gran parti del reinu d'Ungría. Inque los sajones bregun por resistil a los invasoris, muchus delos sus asentamientus resultun destruíus. Tras la retirá delos mongolis, muchas ciais transilvanas encetarun a fortifical-si con castillus de pierda al mesmu tiempu se ludiaba el desenvolvimiento conómicu. Muchas ciais estaban defendías polas Kirchenburgen, ilesias fortificás con enormis murus. L'escapá espansión conómica i demográfica delas ciais sajonas llevó a que Transilvania recebiera en alemán el nombri de Siebenbürgen u en latín Septem Castra (Las Sieti Ciais), refiriéndu-si a sieti delas ciais fortificás.

Ilesia fortificá sajona en Dealu Frumos.

Crassi privilegiá

[Edital | Editá'l códigu]

Juntu alos úngarus (que constituyían la mayoría dela nobreza transilvana) i szeklers, los sajones de Transilvania eran biembrus dela Unio Trium Nationum u Unión delas Tres Nacionis, creá en 1438. Esti acuerdu preservaba los derechus i privilegius políticus destus tres puebrus, al mesmu tiempu que escruía del podel políticu a los rumanus (nesta época conocíus cumu valacus), que conformaban la mayol parti del campesinau.

Duranti la Reforma Protestanti, la mayoría delos sajones transilvanus se convirtun al luteranismu. Cum’el Principau de Transilvania (el qual abía surdiu endispués dela ocupación turca en 1541 de parti del reinu úngaru tras la derrota dela batalla de Mohács en 1526) era unu delos Estaus más tolerantis nel ámbitu religiosu dela época, se permitió a los luteranus practical la su religión, puestu qu'el propiu Príncipi Juan Segismundo Szapolyai era de confesión unitaria. Desta forma, en 1568 se sancionó el Edictu de Turda, que permitía la práctica delas diferentis confesionis religiosas protestantis i la católica.

Porotra parti, la dinastía delos Habsburgo fomentó el catolicismu duranti el periodu dela Contrarreforma, peru la mayoría delos sajones mantuvu las sus creencias luteranas, assina cumu los sucessivus Préncipis úngarus de Transilvania quienis en repetías ocasionis inclusivi ata espulsun a los jesuitas, cumu lo hizu Segismundo Rákóczi alreol de 1607.

La guerra entri la dinastía delos Habsburgo i Ungría contra el Imperiu otomanu entri los sigrus XVI i XVIII reduju la puebración delos sajonis transilvanus. Quandu el Principau de Transilvania passó al control del Sacru Imperiu Romanu Germánicu en 1690, encetó una tercera fasi de colonización germánica que revitalizó las puebracionis sajonas. Entri estus nuevus colonus aportalun protestantis exiliaus dela Alta Austria (Los Landler transilvanos), que s’assentun cerca de Hermannstadt. Los colonus germánicus a menú ocupaban puestus ena aministración i el exércitu, especialmenti duranti las guerras contra los turcus otomanus. La ciá sajona de Hermannstadt (atualmenti Sibiu) se convirtió nun emportanti centru coltural en Transilvania, mentris que Kronstadt (atualmenti Brasov), se convirtió en el centru políticu delos sajonis.

Pérdia de privilegius

[Edital | Editá'l códigu]

El emperaol José II intentó revocal el Unio Trium Nationum a finalis del XVIII. La su decición se basaba ena situación de desigualdá política en Transilvania i al excesivu podel delos sajonis. Inque finalmenti renunció a los sus planís, muchus sajonis encetarun a consideral-si cumu una minoría opuesta a los nacionalistas úngarus i rumanus. Inque constituyían un grupu prósperu i influyenti, ya nu constituyían la clasi dominanti.

Duranti las Revolucionis de 1848, los sajonis sostribun alos rumanus en el su propósitu d’adquiril igualdá política juntu con los demás puebrus transilvanus. Pol otra parti, los úngarus defendían la unificación completa de Transilvania col restu de Ungría. Stephan Ludwig Roth, un pastol protestanti que lideró el apoyu sajón a los nacionalistas rumanus, hue ejecutau por radicalis úngarus duranti la revolución.

Inque el intentu revolucionariu delos úngarus d’adquiril mayol control sobri Transilvania fue bloqueau polos ejércitus austriacus i russus en 1849, el compromisu Austro-Húngaru de 1867 nu fue positivu pa los derechus políticus delos sajonis transilvanus. Duranti el periodu del Imperiu de Austria-Ungría, los úngarus introdujun una política de magiarización pa sofocal l'augi del nacionalismo entri los demás puebrus del reinu d'Ungría.

Al final dela Primera Guerra Mundial i la desaparición del Imperio de Austria-Hungría, muchus sajonis sostribun l'unificación de Transilvania col reinu de Rumania. Se les abían prometíu autonomía i derechus, peru estas garantías nu se cumplun i muchus terratenientis sajonis perdun las sus tierras i privilegius.

Segunda Guerra Mundial i posguerra

[Edital | Editá'l códigu]

Duranti la Segunda Guerra Mundial muchus sajonis desilusionaus cola política del reinu de Rumania se aliun con los nazis i los movimientus rumanus d’estrema derecha contra la Unión Soviética. Debíu a la presión del gobiernu de Adolf Hitler, Rumanía tuvo que cedel gran parti de Transilvania a Ungría.

Brașov (Kronstadt), unu delos centrus más emportantis de sajonis transilvanus. Ena imagin, la calli Apollonia Hirscher, d'indudabri enfruencia germana.

Quando Rumania firmó la pas colos soviéticus en 1944, los militaris alemanis encetarun a evacual a los sajonis de Transilvania; esta operación afetó sobri to a los sajonis de Nösnerland. Alreol de 100 000 sajones huyun anti el avançi del exércitu soviéticu, peru el nuevu gobiernu rumanu nu fomentó l'espulsión de alemanis cumu otrus paísis de Uropa Central i Oriental tras el fin dela guerra. Nostanti, s’estima que más de 80 000 sajonis transilvanus fuerun arrestaus pol exércitu soviéticu i enviaus a campus de labutu en Siberia acusaus de abel cooperau colos nazis. Los sajonis transilvanus que permaneçun fuerun perseguíus pol gobiernu comunista de Rumania i perdun gran parti delos sus derechus políticus cumu minoría.

Debíu a que eran consideraus Auslandsdeutsche (alemanis estranjerus u étnicus) pol gobiernu de Alemaña, los sajonis transilvanus tenían derechu a la ciudadanía alemana. Desta forma muchus sajonis transilvanus decidun emigral a Alemaña, especialmenti tras la caía del régimen comunista rumanu en 1989 i están representaus pol Landsmannschaft der Siebenbürger Sachsen in Deutschland. Debíu a esta emigración la puebración de sajonis transilvanus a descendíu de forma abrupta. Los sajonis que an permaneciíu en Rumania tienin representación política a través del Foru Democráticu delos Alemanis de Rumania.

Klaus Iohannis, quintu presidenti de Rumanía, fue alcaldi dela ciá de Sibiu (Hermannstadt), en 2000, representandu al Foru Democráticu de los Alemanis en Rumania. Inque la puebración alemana dela anteriormenti germanófona Sibiu a disminuíu a una pequeña minoría, Iohannis obtuvo una sorprendenti vitoria i fue reelegíu en 2004, 2008 i 2012. Iohannis s'acredita de convertil la su ciá en unu delos destinus turísticus más popularis de Rumania, i la ciá hue declará capital Uropea dela Coltura en 2007.

Estadísticas demográficas

[Edital | Editá'l códigu]

Dendi 1930 el censu se refieri a tolos grupus germanófonus de Rumania, aparti delos sajonis de Transilvania, que constituyin el grupu más numerosu.

  • 1880: 211 748
  • 1890: 217 640
  • 1900: 233 019
  • 1910: 234 085
  • 1930: 745 421
  • 1956: 384 708
  • 1977: 359 109
  • 1992: 119 462
  • 2002: 60 088

Guipal tamién

[Edital | Editá'l códigu]

Referencias

[Edital | Editá'l códigu]
  1. Jenkins, Simon. "The Forgotten Saxon World that Is Part of Europe's Modern Heritage," The Guardian (octubri de 2009) http://www.theguardian.com/commentisfree/2009/oct/01/romania-saxon-conservation-village

Atijus p'ahuera

[Edital | Editá'l códigu]