Santurrostru

Santurrostru

El santurrostru [santʊˈroʰtʰɾʊ] (nom. cient. Tarentola mauritanica) es un retilinu dela familia delos gecónidas destensu enos paísis mediterranius i de faci visteu en Estremaúra.

Sinonimia

En estremeñu acibi tamién los nombris corrientis de lagartija, saltacara o salturrostru.

Esparramamientu

Vivin por tola península Ibérica. Son mu corrientis en Estremaúra, lo mesmu en puebrus que en capitalis o campu. Le gustan de vivil en sitius canchalosus o peñuscosus, si se trata del campu, i en hiendas i buracus delas parelis en puebrus i capitalis.

Comportamientu

Ivernan entre noviembri i hebreru. Ena iverná, enantis dela ivernación, aprovechan las orinas de sol pa soleal-si i cogel temperatura, mentris que en veranu racean más de nochi a trocu d'evital las caloris del día.

Comin bichinus enos mesis más calorosus del añu, caçandu los que s'aposan cerca dela lus de farolas i bombillas. Essa dieta enclúi grillus, polillas, moscas, fínfanus, etc.

Engoran dos uevus dos vezis al añu, entre abril i juniu. Las crías nacin al cabu delos quatru mesis, midiendu apeninas 5 centimetrus de largu. Crecin lentamenti ata cogel los 8,5 centimetrus que suelin medil, viviendu ata 8 añus.

Alas vezis chían i son bastanti territorialis, defendiendu el níu i los sitius de caça.