Crus Colorá
Crus Colorá es el nombri comun con que se conoci al Movimientu Internacional la Crus Colorá i de la Meya Luna Colorá, tamien llamau Crus Colorá Internacional, qu'está entegrá por:
- Comité Internacional la Crus Colorá (CICR).
- Federacion Internacional de Socieais de la Crus Colorá i de la Meya Luna Colorá (FICR).
- 186 Socieais Nacionalis la Crus Colorá i la Meya Luna Colorá.
Los componentis del Movimientu, enque conservan la su endependencia enos límitis el Estatutu el Movimientu, atúan siempri de conformiá conos sus Prencipius Hundamentalis i colaboran entre ellus i ellus nel desempeñu las sus tareas respetivas i pa realiçal la su mision comun.
Los componentis el Movimientu se reúnin conos Estaus Partis enos Convenius de Ginebra del 27 júliu de 1929 o del 12 agostu de 1949 ena Conferencia Internacional de la Crus Colorá i de la Meya Luna Colorá (palantri: la Conferencia Internacional).
La crus colorá tamien es el emblema enicial el Movimientu, enversa de los goloris la Bandera Suiça, en reconocimientu a los sus hundaoris i la su neutraliá. La crus colorá, juntu cona meya luna colorá i el cristal colorau sobri hondu blancu, sonin emblemas umanitarius reconocius oficialmenti por abati la totaliá paisis el mundu i el su gastaeru está enmarcau nel Derechu Internacional Umanitariu, polo qu'ebin sel respetaus en toa circunstancia, pa que se puean desarrollal las laboris umanitarias enos desastris i conflitus armaus.
