Física

Dendi Güiquipeya
Sartal a: Güiquipeandu, Landeal

La física (griegu φύσις (phýsis), ralidá o naturaleza) es la céncia hundamental sistemática qu'estudia las propieais la naturaleza con ayua el lenguahi matemáticu. Es tamién aquel conocimientu essatu i razonau danguna cosa u matéria, sostribándusi nel su estuyu pol mé el métou científicu. Estuya las propieais la matéria, la enelhia, el tiempu, el espáciu i las sus enteracionis.

La física nu es una céncia teórica namás, es tamién una céncia esprimental. Cumu toa céncia, busca que los sus alcuerdus puean sel verificaus meyanti esprimentus i que la toria puea rializal predicionis d'esprimentus huturus. Da l'amplitul el campu estuyu la física, assina comu el su desarrollu estóricu en relación a otras céncias, se la puei consieral la céncia hundamental u central, ya que enclui drentu su campu estuyu a la química i a la biolohia, amás de desprical los sus fenóminus.

La física ena su tentativa de descrebil los fenóminus naturalis con essatitul i veraciá a llegau a límitis impensabris, el coñocimentu atual albarca dendi la descrición partículas hundamentalis microscópias, la nacéncia las estrellas nel univelsu i hata coñocel con una probaliá mu grandi lo que aconteció enos primerus momentus la nacéncia el muestru univelsu, por mental unus poquinus de los coñocimientus que se tiinin.