Ganaeria

Dendi Güiquipeya

La ganaería es una ativiá económica d'origin mu antiguu que consisti ena criança d'animalis pa el su aprovechamientu. Dependiendu de la especii ganaera, se otienin divelsus produtus derivaus, comu la carni, la lechi, los güevus, los cuerus, la lana i la miel, entri algotrus.

Los ganaus mas emportantis en númeru a nivel mundial son los relacionaus cona ganaeria bovina, la ovina i la porcina. Sin embargu, en angunas regionis del praneta algotrus tipus de ganau tienin mayol emportancia, comu el caprinu i el equinu, comu assín tamién la cunicultura, l'avicultura i l'apicultura.

La ganaeria está mu atijá cona agricurtura, ya qu'en una granja ambas puein realizal-se. Nestus casus el ganau apolta el estiércol, qu'es gastau como abonu, i los curtivus apoltan el alimentu pa los animalis.