Agricantus

Dendi Güiquipeya
Ir a la navegación Ir a la búsqueda

Agricantus son un grupu Sicília conocius pola su música fusión, hundamental nel panorama musical italianu i mediterrániu nel géniru world music.

Estória[eital | eital coigu]

El grupu se holmó ena ciá Sicília de Palermu nel 1979, cuentandu conos músicus Tonj Acquaviva, Mario Rivera i Mario Crispi. Alogu, ascomiençus los 90 alcibin a la cantora i compositora Rosie Wiederkehr. El nombri la banda es latinu i senifica "el cantu el campu". Es conocia pol sel una prencipalis bandas cantantis en sicilianu.

Las sus primeras espubricacionis son Gnanzù! (1993) i Viaggiari (1995) de ton eminentimenti mediterrániu, anque no sedria hata un añu endispués con el discu Tuareg con el que consiguirian el éssitu i la reconocéncia entrinacional.

Nel 1997 los Agricantus ganan el Premio Italiano della Musica. Amás, huerun correaliazaoris la la banda sonora la pinicla Hamam-Il bagno turco. Tamién nessi mesmu añu sacarun el cortu Hale Bopp Souvenir, junta la participación Fadimata Wallet Oumar, portavozi la curtura tuareg.

Al sotru añu espubrican Kaleidos, proyeutu nel que se margullan ena música crássica i esprimentan sonis mesturaus conos de Grieg, Brahms, Paganini u Berio. Tamién nesti añu colabutan ena banda sonora la pinicla I giardini dell’Eden.

Nel 1998 espubrican el su primel recopilatóriu Best of Agricantus cuyu sellu World Class premiti que la su música salga en paisis comu Canadá, Austrália, Japón u pa Sulamérica.

Faiddi lo espubrican nel 1999, andi ajuntan estrumentación acústica con degital, sonis muelnus conos de patrás, con gran emportáncia la vozi Rosie. Esti discu, amás, sonó comu hundón ena esposición fotográfica On ther side, olganizá pol UNICEF.

Endispués de nuevas colabutacionis cinematográficas, los Agricantus espubrican el discu Ethnosfere (2001), andi s’uñin sonis mediterránius con tibetanus.

Al sotru añu espubrican Jamila, junta el quitarrista Francesco Bruno. Nel 2002 sacarun Calura, discu que contién angunas remesclas comu las de DJ Rocca del Mafia Club u DJ Keir del Blue Cheese romanu.

Los sus úrtimus trebajus son Habibi (2005) i Luna khina (2007).

Miembrus[eital | eital coigu]

  • Tonj Acquaviva: percussionis, vozis, pogramación, wavedrum, tamboris, darbouka.
  • Mario Crispi: frautas.
  • Rosie Wiederkehr: vozis.

Discografia[eital | eital coigu]

  • Gnanzù! (1993).
  • Viaggiari (1995).
  • Tuareg (1996).
  • Hale-Bopp souvenir (1997).
  • Kaleidos (1998).
  • Faiddi (1999).
  • Ethnosphere (2001).
  • Calura (2002).
  • Habibi (2005).
  • Luna khina (2007).

Atijus[eital | eital coigu]