Arquiología
L'Arquiología (del griegu «ἀρχαίος» archaios (antiguu), i «λόγος» logos (cencia o estudiu)) es una diciplina qu'estudia las sociedais a través delos sus restus materialis, seyan estus entencionalis o no. La huerça d'arquiólogus nel passau definierun l'arquiología comu el estudiu sistemáticu delos restus materialis dela vida umana ya desaparecía.
Otrus arquiólogus se centrarun enos aspetus condutistas i definierun l'arquiología comu la recostrución dela vida delos puebrus antiguus.
N'angunus paisis, especialmenti enos Estaus Uníus, l'arquiología á siu considerá siempri comu una subdiciplina de l'antropología. Mentris esta se centrava nel estudiu delas colturas umanas, l'arquiología se dedicava al estudiu delas manifestacionis materialis d'essas mesmas colturas.
La moerna arquiología entra en relación con otras diciplinas científicas. Assina, los arquiólogus, pol establecel la cronología, escomençarun a gastal métodus de datación desenreoaus pol otras cencias: el sistema del carbonu 14 (radiocarbonu) hue desenreoau polos físicus nuclearis, las ténicas de datación geológica se debin alos geólogus i las ténicas d'estudiu delos restus de fauna sonin obra delos paleontólogus.
Amás, pa recostruil antiguas hormas de vida, los arquiólogus gastan procedimentus dela sociología, la demografía, la geografía, la conomía o las cencias políticas.