Derechu

Dendi Güiquipeya

El Derechu es el ordin normativu i estitucional la conduta umana en socieá espirau en postulaus de justícia, cuya basi son las relacionis socialis essistentis que determinan el su conteniu i caraiti. En otras parabras, es el conjuntu normas que regulan la convivéncia social i premitin resolvel los conflitus interpressonalis.

La definicion enicial da cuenta del Derechu positivu, pero non endilga el su hundamentu; por ellu juristas, filósofus i teóricus del Derechu án propuestu a lo largu la estória muchas definicionis alternativas, i destintas teorias jurídicas sin qu'essista, hata la fecha, consensu al tentu la su validés. El estuyu el concetu el Derechu lo realiza una de las sus ramas, la Filosofia el Derechu. Con tó, la definicion propuesta enicialmenti resolvi el pobrema de "validés" del hundamentu del Derechu, al entegral el valol Justícia en el su concetu.

Los concetus de derechu positivu i el derechu vigenti se puein reduzil a que el primeru es el que s'aprica i el segundu es el que el órganu legislativu pubrica pa sel obeeciu entre que duri la su vigéncia, mentris non seya sustituiu por meyu la arrogacion o derogacion. Polo tantu, no tó derechu vigenti es positivu, es dizil, ain normas jurídicas que tienin poca apricacion plática, no es derechu positivu, pero sí es derechu vigenti.