Calera de León

Calera de León
Entidad subnacional
Escudo
Coordenadas	38°06′23″N 6°20′16″O
Capital	Calera de León
Entidad	Monicipiu d'España
• País	España
Superficii
• Total	69,2 km²
Altol
• Media	710 m s. n. m.
Puebración (2023)
• Total	917 hab.
• Densidá	13,25 hab/km²
Huso horario	UTC+01:00
Código postal	06292
Sitio web oficial

Calera de León es un monicipio i localidá estremeña dela provincia de Badajós, ena comunidá utónoma d'Estremaúra. El monicipiu tieni una puebración de 917 abitantis sigún el INE 2023,

Sitiación

Está sitiau nuna colina de setecientus nuevi metrus i tolos sus alreoris andan enllenus de sierras i colinas que pertenecin ala Sierra de Tentudía. Envera del monicipiu se halla'l monti Tentudía, el de mas altol dela provincia de Badajós con mil cientu quatru metrus sobri'l nivel dela mari.

Dendi la ciá de Badajós ain cientu venti seis kilometrus i dendi la ciá de Sevilla ain cientu unu kilometrus. Perteneci ala comarca de Tentudía i al partíu judizial de Çafra. La su puebración en el 2017 era de 999 abitantis i nel 2023 de 917 abitantis sigún el INE.

Estoria

Quandu la dominación arabi se le mentó comu Al-Caxera, que quié izil branca, peru el su verdaeru renombri estóricu es de metá del siegru XIII. Pola reconquista de Sevilla pol rei Fernandu III, El Santu, esti l'encargó al maestri santiaguista Pelay Pérez Correa atacal a un exércitu sarracenu que estava enos puertus d'estas sierras, alibrandu una ferós batalla i viendu que s'escurecía sin decedil-si la vitoria, el valerosu capitán cramó ala Vigin dandu gritíus ¡Santa María deten tu día!, i referi la tradición qu'el sol s'aparó nel orizonti, comu enos tiempus bíblicus, pa premitil alos cristianus l'alampau trunfu.

Ena acordança d'esti fenómenu, el maestri encargó alçal un templu ena cumbrera del monti mas altu, el qual hue entangarillau ala crassi de monesteriu pol papa León X nel 1514 i que hue cabecera dela Vicaría de Tudía que comprendía nuevi puebrus dela zona i albergó una escuela d'umanidais que hata la su desparición, a mediaus del siegru XIX, era la mas emportanti d'Estremaúra.

Endispués dela costrución d'esti templu, al que se le hue dotandu de grandis rentas i cona edificación posteriolmenti del Conventual Santiaguista, Calera de León passó a sel unu delos centrus mas senificativus dela Ordin de Santiagu. Hata'l 1873 perteneció ala diócesis del Priorato de San Marcos de León i a raís d'entocis passó ala jurición dela diócesis de Badajós. Dendi l'aprovación dela Costitución, el puebru se conforma en monicipiu costitucional ena Comunidá Utónoma d'Estremaúra. Dendi'l 1834 queó integrau nel partiu judizial de Huenti Cantus. Nel censu del 1842 contava con trezientus dezinuevi fogaris i mil dozientus cincuenta i un vezinus.

Patrimoñu

La ilesia Santiagu Apostol

La ilesia de Santiagu Apostol

Envera'l claustru s'encuentra la ilesia de Santiagu Apostol, costruía a manu con barru huerti, ladrillu i pieras con altus murus. La su fachá es mu inregulal hormandu un componimientu velumétricu aondi sobrissali una escalera de caracol, estribus acopraus i un campanariu barrocu del siegru XVIII. Es una obra gótica tardía, d'acaberus del siegru XV, es duna navi namás i duna grandi ampritú, con quatru capillas hornichis nel laeru dela Epístola, sacrestía i la capilla del bautismu, qu'es oi el Sagrariu. Tié una bóveda de cruzería en horma d'estrella, cúyus niervus descansan en pilaris costituíus por semicolunas acoprás. Las capillas hornichis tien bovedinas de cruzería, ena su variedá de espeju sobri arcus de meyu puntu.

La portá prencipal del templu es renacentista, adintelá, con quatru colunas toscanas i hornichis vazíus enos entrecolunius, quatru candelabrus por coronamientu i tímpanu nel arcu. La del lau del Evangeliu es gótica, acabijá en toça, con dos quartus de reondel i hornichi vazíu. El misteriu mayol está hormau por ochu liençus d'Eduardo Acosta, que entrepetan alos quatru evangelistas, sitacionis dela batalla de Tentudía, cona aparición dela Vigin a Pérez Correa i amás coronandu l'escena la figura a cavallu del Apostol Santiagu.

El hornichi está acupau por una talla de maera del Cristu Encruzijau, datá nel siegru XVI, qu'á siu restaurá. Enas alvidrieras poemus guipal la frol de lis qu'entrepreta el trunfu i la espá dela Ordin de Santiagu. El púlpitu, sitiau junta'l arcu toral, es de piera de granu con cuerpu otogonal que descansa en basi galloná, assujetá por un pilal del mesmu material. Ampié dela escalera d'acessu ai una pileta d'augua bendita de piera de granu cona caçuela galloná. Ampiés dela navi s'encuentra la tribuna que s'alça sobri un arcu pocu arqueau i bóveda de cruzería mu prana. Mentris qu'anduvierun pallí los frairis de San Marcus de León, la ilesia se benefició delos muebris i aperus que truxerun con segu, teniendu anguna ves hata cincu órganus, peru dentri los inciendus i los que robarun, no quea nengunu ugañu.

Monesteriu de Tentudía

El Monesteriu de Tentudía.

Esta obra es un emportanti conjuntu arquitetónicu d'estilu góticu mudéja catalagau de Bien d'Interés Coltural Nacional.La ilesia hue alçá sobri un umildi templu anteriol hechu en comemoración dela mítica batalla de Tentudía. Devió d'estal hormau por tres navis, comunicás por mé de hilás d'arcus de cantería, con una capilla de pranta quadrá ena navi central i otras mas chiqueninas, adosás alas laeras. El cerraeru sedría con una covija normal de maera, d'arti mudéja. Alos acaberus del siegru XIV huerun adosás al cabeceru dos capillas funerarias, enganchás conas navis laeras por mé dun reútu passillu aondi poemus encuentral a dos maestris dela Ordin de Santiagu, a Gonzalo Mexías i Fernando Oxores.

Las capillas laeras tien misterius d'azulejus, posterioris alas del altal mayol, entrepetandu unu a Santiagu, cavalleru en cavallu brancu, hateau con armaúra, cona espá ena manu derecha i banderina ena sotra, tumbaus alos sus pies los enemigus vencíus en luchi. Arroea la sitación dos grandis arvus i está bordeá de senefa con ramais i guirlandas. Nel frontil dela mesa del altal ai una cartela cona imagi dela Vigin i el Zagalinu. La capilla de San Agustín tié nel su misteriu de loza al Santu caraitirizau de Pairi dela ilesia, con mitra i báculu, susteniendu ena su manu derecha la pruma de dotol i ena chota la ilesia del hundaol. Oficia'l templu la repolía imagi dela Vigin de Tentudía, proteción de grandi enrazu endrentu i ahuera dela región. Es una imagi delas llamás de palmatoria, en cuya cara s'aprecia l'almonía dela dolçura cona magestá que los artistas del siegru XVIII emprimían alas sus obras.

Lo mas interessanti del Monesteriu es el misteriu mayol, hechu nel 1518 pol anombrau lozeru Niculoso Pisano assentau ena ciá de Sevilla, aondi l'estilu mudéja se mestura cona rica almonía del su lindu coloríu, siendu unu delos conjuntus de loza mas emportantis dela península. Las sus demensionis sonin de tres con quarenta metrus d'altol por dos con sessenta i cincu metrus d'anchol, con un total de seiscientus quarenta azulejus. La obra entrepeta ena su mayoría con sitacionis marianas, refrexandu'l delicau arti d'esti grandi artista del Renacimientu. Pal lau derechu del altal junta una escrición s'encuentra la tumba del hundadol, Pelay Pérez Correa, revestía d'azulejus del mesmu destraçu i estilu.

El claustru d'estilu mudéja cenzillu i costruíu con ladrillus, es una galería en quatru cachus con dos pisus montaus col baxeru de quatru arcus de meyu puntu i el alteru de cincu vanus de meyu puntu embaxaus. L'arquería s'assujeta en pilaris otogonais con basi i capitel i nel centru ai un algibi de grandi cabusía. Alos laus dela galería ain varias abitanças ronçosas cobiertas de tillis pranas de maera o conas bóvedas de cruzería. Tamién se costruyó una sacristía i tribuna, abertura de portás pa comunical l'ábsidi conas capillas funerarias. Decenius endispués huerun restituías las tres navis del templu, queandu comu una ilesia d'única navi cobierta con bóvedas de cañón.

Conventual santiaguista

Claustru del conventual

Es una costrución de piera de granu i con barru huerti, hecha alos acaberus del siegru XV, comu residencia mas ampria i holgona delos cavallerus qu'abitavan en Tentudía. Albergó por quarenta añus el Colegiu de San Marcus de León que la Ordin muó dendi la capital del antigu reinu nel 1562. Lo mesmu qu'el monesteriu de Tentudía el edificiu está declarau Bien d'Interés Estóricu Artísticu Nacional dendi'l 1931. El su claustru de dupli pranta está costruiu con piera de granu i la su colunata i las artísticas bóvedas delas sus salonas i galerías enseñan abondu la belleza de l'estilu renacentista.

Del 1930 al 1934, esti anombrau menumentu hue ojetivu de varius ententus d'esmangajal-lu cona entención de proval las sus artísticas pieras pa mandal-las pa Almérica. Una delas sus estruturas mas emportantis es el claustru, de pranta quairá i dividíu en dos pisus montaus, col baxeru d'arcus de meyu puntu, que descansan sobri pilaris conas pilastras jónicas adosás i entopetás, col afechamientu en bóvedas de cruzería. Las abitanças monásticas mas polías estan ena pranta baxa destacandu la Sala delos Capítulus o delas Piñas, por esponel las llavis delos niervus delas sus bóvedas adornás con froronis. Ena adornación de tou l'edificiu, ain tallás concunelas santiaguistas i santus d'armas.

Armita de Muestra Señora delos Doloris

Está nel arrayu'l puebru, nel caminu pa Tentudía i hue costruía a tencias delas dacionis delos vezinus del puebru alo largu de varius siegrus. Enque hue hecha comu armita-millaeru i mentá primeramenti comu armita de Muestra Señora delas Angustias, ara está hondamenti morificá polas retahilas d'entrevenencias, que huerun haziendu col passu los siegrus i possimenti nel barrocu. Es de demensionis chiqueninas, con una navi solu i con una covija a dos auguas. Lo mas senificativu, amás dela su portá prencipal o delos pies, es el tambol otogonal que s'assienta sobri la cabecera, qu'está cerrá con una cupulina. S'arremata esti cimborriu con un templi dela mesma pranta, coronau por un pináculu chiqueninu.

La portá tieni un grandi valol práticu, d'ispiración crássica comu lo demuestran los elementus que l'adornan. Tuvu en sotru tiempu un enrejau de maera que desseparava'l presbiteriu o lugal mas sacru, dela navi o terrenu laicu. L'ojetivu d'esti enrejau, era'l de protegel las conrelativas robanzinas i esvalijus, qu'avía al axual artísticu i letúrgicu del templu, assitiau ena su mayol parti nel mentau presbiteriu. Sonin caraitirísticas las sus alpoyatas de drentu, al mó d'assientus junta los cimientus delos murus.

Fiestas

Romería de Tentudía

La Romería de Tentudía es un dissantu que se celebra tolos ochu de setiembri dendi la segundera metá del siegru XIII i tié mas de setecientus añus d'antigüedá. Quandu se costruyó'l Monesteriu, la devoción ala Vigin tuvu un grandi aúgi i aumentu, mesmamenti mentándola el rei Alfonsu X El Sabiosu, enas sus celebris cantigas. Col passu del tiempu, la romería hue ganandu en popularidá i assestencia, por essu, alos acaberus del siegru XIV, el rei Enrique II de Trastámara atorga al vicariu varius previlegius pal dissantu dela Vigin, qu'encruían el preciu alos feriegus del pagamentu d'assientus i baras. N'aquellus tiempus la assestencia a esta romería reballava las seis mil pessonas, que s'empicavan a venil dendi'l sul dela provincia de Badajós i tamién dela parti norti de Güelva i Sevilla. Sigún angunus datus, se pué izil que la romería de Tentudía es una delas mas antigas d'España.

Dendi la praça mayol dela villa, en ca aclarecel del día ochu de setiembri, sali la muestra imagi dela Vigin de Tentudía, patrona de Calera de León i dela comarca de Tentudía, acompañá de romerus i pelegrinus hazia'l Monesteriu de Tentudía, pa espressal la su devoción ala su patrona. Tous en pelegrinación esmiençan el caminu de nuevi kilometrus acompañandu ala Vigin, qu'angunas vezis se hazi pesau, peru aluegu tó s'aborra cona frorencia delos paisagis, l'airi frescu dela sierra i las paranças pal descansaeru, aondi los romerus puen proval los ducis tradicionais i las viandas dela tierra, basás mayolmenti enos produtus del cochinu ibéricu.

Mas fiestas d'interés

• San Marcus: dentri los días 24 al 26 d'abril.
• San Isidru Labraol: del 15 al 18 de mayu.
• Abaxá dela Vigin de Tentudía del Monesteriu: el 15 d'abostu.
• Ferias i Fiestas n'Onol ala Vigin de Tentudía: del 7 al 10 de setiembri.
• Feria del Piñón: La Puenti dela Inmaculá.

Demografía

Cuenta con una puebración de novecientus dezissieti abitantis sigún el INE del 2023).

Gráfica de evolución demográfica de Calera de León entre 1842 y 2021

Puebración de diretu sigún los census de puebración del INE.     Puebración de hechu sigún los census de puebración del INE.

Atijus p'ahuera

• En Commons ai conteníu multimedia sobre Calera de León.
• web Calera de León
• cóigu postal

• Datos: Q1074219
• Multimedia: Calera de León / Q1074219