Cambión

Un cambión es un vículu motoriçau inseñau pal trasporti de proutus i mercancías. A deferencia delos atomóvilis, que suelin tenel una costrucción monocascu, muchus cambionis se construyin sobri una estrutura resistenti mentá bastiol. La mayol parti dela estrutura está integra pol un bastidol portanti, generalmenti un marcu estrutural, una gabina i una estrutura (o caxa) pa trasportal la carga.

El vocablu cambión se puei referil a dos vículus deferentis: cambionis rígius i camionis articalaus.

Enos «cambionis rígius» no se puei desseparal la caxa dela gabina​ (ondi s'assitia la cabeça tratora); puein tenel dos o tres lexis.​ Están inseñaus pal trasporti de cargancia relativamenti ligeru i destancias cortas o meyas; generalmenti, se gasta pal trasporti de cargas menoris, carga fragi. Sonin cambionis rígius los cambionis de repartu de muebris, artícalus de fogal, comestiblis, ária de salú, vestuariu, muanças, bomberus, emergencias, etc. Los «cambionis articalaus» se componin de tratucambión i remolqui o, más frecuentementi, semirremolqui; se gastan pa largas distancias i carga pesa, tantu de líquius comu material secu o a granel, comu los cambionis de trasporti de combustibli, cambionis maererus, cambionis pal transporti de conteneoris i caxas móvilis. Essestin divelsas crassificacionis de cambionis: pol su pesu, pol su volumi o cabusía de carga i pola hunción que desempeñan. Ain cambionis de tó tipu i de diversus grandoris: chiqueninus (ordinarius), meyanus (cambionis tó-terrenu de 200 tonelás gastás en minería) i estragrandis («trenis de carretera»).

Los cambionis se huerun especialiçandu i adotandu una serii de caraitirísticas propias del trebaju al qual se destinan. Ain volucionau endi una simpli caxa — abierta o fechá — hormas sofisticás con inseñu i equipamentus específicus aparentis ala materia a trasportal: peligrosa, líquia, refrigerá, en giramientu continuu qu'impida el faraguau, con grúa, etcétera.