Darío Bacas
Darío Bacas Montero (Cilleros (Caçris), 1845 - Cilleros 1913). Jue un engenieru naval milital, industrial y centíficu estremeñu. Su vía estuvu encaminá a la enseñanza, las matemáticas, la economía y la investigación. Darío Bacas es mentau comu unu de los investigaoris pionerus en el campu de l'engenieria industrial en España.[1]
Su pairi tamién jue un ilustri de su época: el abogau Ignacio Bacas (1810-1877), jue diputau en las Cortis en 1842-1843, alcaldi de Cilleros y presidenti de la Diputación de Caçris. De mou que el su hiju Darío, endispués de jadel los estudius secundarius en Caçris y Salamanca, marchó a la escuela de Engenieria Naval en Ferrol (Coruña), pa sacalsi la graduación equivalenti a Alférez de Fragata e Engenieru Naval.[2]
Lo más renombrau de los inventus y patentis que jidu jue un aparatinu que mentó comu Goniobarímetro, estu es una báscula que daba en una escala graduá, un ángulo respectivi al pesu dau.
Escribió abondus artículus centíficus y librus.[3] Recibió reconocimientus honoríficus, comu la Medalla de Plata de la Exposición Onubo-Extremeña celebrá en Huelva en 1901.[4]
A los cien añus de su muelti, el Centru de Estudius de Sierra de Gata le jidu, en eneru de 2013, un homenaji por tou lo altu en Cilleros con el patrociniu de la Diputación de Caçris, el Centru de Profesoris y Recursus de Hoyos y el Ayuntamientu de Cilleros.[5]
Tantu en el lugal de la su nacencia comu en Villamiel (Caçris) le tienin dedicau una calli con el su nombri.
Huentis[Edital | Editá'l códigu]
- ↑ Extremeños ilustres, Dario Bacas Montero
- ↑ Bacas, Pilar. Biografía de Darío Bacas (1845-1913) Sierra de Gata, revista digital. 3 septiembre 2013
- ↑ Dario Bacas Montero Dialnet
- ↑ Bacas Leal, P. "Darío Bacas, Ingeniero Naval. 1845-1913", Ed. Diputación de Cáceres, Cáceres. 1998 ISBN:84-86854-91-1
- ↑ Lorenzo, Sergio. Cien años sin el sabio Darío Bacas. Diario Hoy 21.01.13