Estereocéano

Estereocéano hue un efímeru grupu música eletrónica gallegu.

Estória

Estereocéano se holmó nel 1997 embahu la direción Juan Rivas, músicu vigués que bia esprimentau en várius conhuntus. En 1998 mandarun una maqueta al pograma música eletrónica Radio 3 "Siglo XXI". Dende essi momentu el produtol, músicu i DJ Big Toxic s’enteressó pol ellus i pol mé dél se hizun de la discográfica Polygram. A lo primeru apaició el cenzillu En tu nuca en veranu el 1998 el qualu llamó l’atención las emissoras arrádiu españolas. Dispuesinu cona produción Big Toxic i la de Pablo Iglesias sacarian de la manu de Polygram el su únicu discu Caleidoscópicu.

Nesti trebahu s’uñin eletrónica, pop i rimus mu cudiaus cona puesia las sus letras a lo largu los sus dozi cortis. S’oyin las enfruyéncias la música populal los 60 i 70, nacional i tamién la vanguárdia la eletrónica finalis sigru XX cumu chill out u drum & bass. Dos ambientis se hallan nesti albun, unu mas pressonal, íntimu, escuru a vezis, en músicas cumu En tu nuca, Nunca me iré de ti, Envejeceremos juntos u Invierno, i otru mas festivu, alegri i tropical cumu Lejana flor u Nunca nos diremos adiós. El segundu los cenzillus espubricaus hue Lejana flor, qu’anduvu sonandu angunas semanas enas emissoras arrádiu i el su vídiu apaiciendu en pogramas música.

El discu, que podria bel siu unu los mas sonaus i emportantis el panorama musical español, queó clissau i densiguia desapaiciu. La compañia Polygram, a ná de belsi espubricau Caleidoscópico, hue assolvia pol Universal, de mó i maea qu’el discu queó nel orviu, hiziendu que la poca fama que consiguió el grupu los desseparara.

Caleidoscópico, sin embargu, hue consierau pola revista Zona de Obras unu los dies discus imprescindibris la música gallega i unus los mihoris discus el añu pola revista La Luna. Arcançó el númiru unu ena lista música independienti El País de las tentaciones.

Juan Rivas en solitáriu acontinó trebahandu, espubricandu discus ena línia mas latina i pop, mesturandu eletrónica i sonis tropicalis i retro. El su primel discu en solitaru hue Devenir del paraíso, en 2002, con EMI.

Miembrus

• Alberto Regueira: quitarras.
• Rafa M. Villarino: tecraus.
• Carlos Rodríguez: tecraus
• Juan Rivas: vozis i quitarras.

Discografia

Albun

• Caleidoscópico (1998).

Cenzillus

• En tu nuca (1998).
• Lejana flor (1998).
• Lejana flor (versión ragga ’99) (1999).

Atihus

• Portás el su discu i los sus cenzillus
• Páhina oficial Juan Rivas
• Espáciu Juan Rivas