ISSN

Dendi Güiquipeya
ISSN
Tipo identificador de publicación, medio de comunicación y norma técnica
Sitio web www.issn.org
[editar datos en Wikidata]

El ISSN (International Standard Serial Number, Númiru Entrenacional Normalizau de Pubricacionis Seriás)[1] es un cóigu d'ochu dégitus entrenacional que se gasta pa entifical pubricacionis pedióricas i recussus de continu de tolas crassis i editau en qualquiel soporti, que puein sel emprimius en papel o en hormatu degital, evitandu'l trebaju i possiblis marrus de trascrevil el títulu o la enteración biblográfica ala que perteneci. Reservau palas pubricacionis conrelativas comu los diarius i las pubricacionis pedióricas.[2] El ISSN es mayolmente aparenti pa destenguil dentri pubricacionis seriás col mesmu títulu. Los ISSN se gastan pa acolocal, catalogal, empréstamis entrebiblotecarius i otras pláticas relacionás cona literatura seriá.[3] El sistema ISSN se redató por primel ves comu norma entrenacional dela Organización Entrenacional de Normalización (ISO) nel 1971 i se pubricó comu ISO 3297 nel 1975.[4] El subcomité ISO TC 46/SC 9 es responsabli de mantenel el normal. El ISSN premiti normalizal las crassificacionis, enas biblotecas pol exempru. En librus se gasta'l Númiru Normalizau Entrenacional del Libru (ISBN, International Standard Book Number).

Entroduzión[Edital | Editá'l códigu]

El ISSN está costituiu polos caraitis "ISSN" seguíus de dos grupus de quatru cifras desseparás por guionis. La cifra cabera, situá ena otava posición, es la llavi de mandu; puei angunas vezis tenel el valol "X", qu'es el númiru diés.

Pol contrariu al ISBN, las cifras del ISSN no senifican na ena ralidá. Son assisnás de horma secuencial, sin tenel que vel col país d'origi, dela luenga, o algu assina. En ca ISSN ai un títulu-llavi, assín comu una fecha del prencipiu dela pubricación. La fecha del acaberu es polo general "9999". El títulu-llavi está hormau pol nombri dela pubricación i possimenti pol lugal de pubricación.

Hunción del ISSN[Edital | Editá'l códigu]

El ISSN entifica sin marrus una pubricación seriá, i puei cumpril dentri otras, las siguientis huncionis:

  • Entificación dun títulu duna pubricación seriá en qualquiera idioma i en qualquiel lugal del mundu.
  • Métou comenienti i condurau de comunicación entri editoris i destribuioris, muandu los sistemas de sumenistru comercial en sistemas mas desengüeltus i potentis.
  • Gastau enas biblotecas, centrus de decumentación i unidais d'enteración pa una potenti entificación, alquisición i almenistración de pubricacionis seriás i tamién de númirus trasconejaus.
  • Simplificación delos trámitis enos sistemas de empréstami entrebiblotecariu, brindandu la entificación delos títulus enos catálagus coletivus.
  • Brinda'l tratamientu utomatizau de daus delas pubricacionis seriás.
  • Amejora el mandu enos sistemas de depósitu leal i assisnación de cóigus de barras.
  • Enas mentacionis académicas, premiti mental una pubricación seriá con essatitú i sin marrus.

Pubricacionis que puein tenel el ISSN[Edital | Editá'l códigu]

  1. Emprimius o folletus.
  2. Microhormas.
  3. Edicionis conos lenguagis especialis pa descapacitaus.
  4. Meyus mestus.
  5. Fonogramas.
  6. Cintas leyiblis dela computaora inseñás pa produzil listas.
  7. Otrus meyus encruíus tamién los visualis.
  8. Revistas.
  9. Anuarius.
  10. Pdf.

Cálculu dela llavi de mandu[Edital | Editá'l códigu]

S'assisna una ponderación a ca postura (de 8 a 2 nel sentiu decrecienti) i se hazi la suma delos produtus assina agenciaus. Se conserva'l restu dela división euclídea d'esti númiru por 11. Se resta esti númiru a 11: es la llavi.

Exempru: ¿Pal númiru ISSN (de 7 cifras) ISSN 0395-203, quál es la llavi de mandu?

Exempru del cálculu dela llavi de mandu
Código ISSN 0 3 9 5 2 0 3
Ponderación 8 7 6 5 4 3 2
Producto 0 21 54 25 8 0 6

Lo que hazi un total de 0+21+54+25+8+0+6=114, cuyu restu dela división euclídea por 11 es 4 (114/11=10x11+4). La llavi de mandu es 11-4=7. El ISSN compretu es: ISSN 0395-2037.

ISSN-L[Edital | Editá'l códigu]

El ISSN-L (del ingrés Linking ISSN) es un númiru específicu únicu del ISSN qu'apenusga las deferentis edicionis duna mesma pubricación seriá, pubricás en mas dun meyu o soporti, comu en papel, en liña, en CD i mas, ca una delas qualis tién assisnau'l su propiu ISSN. El númiru de ISSN-L es unu delos númirus ya essestentis de ISSN assisnau ala pubricación, concidenti col dela versión en papel si la ai.[5]

Sistemas acomparantis[Edital | Editá'l códigu]

  • ASIN: Amazon Standard Identification Number o Númiru d'Entificación Normalizau d'Amazon.
  • ISBN: International Standard Book Number o Númiru Entrenacional Normalizau del Libru.
  • ISMN: International Standard Music Number o Númiru Musical Normalizau Entrenacional.
  • ISAN: International Standard Audiovisual Number o Númiru Udiuvisual Normalizau Entrenacional.
  • ISBN: Internet Blog Serial Number o Númiru Conrelativu de Blogs d'Entrenet.

Referencias[Edital | Editá'l códigu]

  1. ↑ «ISSN | Biblioteca Nacional del Perú | BNP». Consultado el 26 de agosto de 2023. 
  2. ↑ «¿Qué es el número ISSN? | ISSN». www.issn.org. Consultado el 26 de agosto de 2023. 
  3. ↑ «Get an ISBN or ISSN for your publication». The British Library. Archivado desde el original el 26 de febrero de 2021. Consultado el 26 de agosto de 2023. 
  4. ↑ «ISSN, a standardised code | ISSN». www.issn.org. Consultado el 26 de agosto de 2023. 
  5. ↑ «The ISSN-L for publications on multiple media | ISSN». www.issn.org. Consultado el 26 de agosto de 2023. 

Atijus p'ahuera[Edital | Editá'l códigu]

Arrecuperau dendi "https://ext.wikipedia.org/w/index.php?title=ISSN&oldid=127330"