Iniciativa pol Asturianu

Iniciativa pol Asturianu es un colectivu criau en 2011 que trebaja pola normalización la lengua asturiana i pola reconocencia los derechus lingüísticus los sus palrantis.

El andal de trebaju l'organización es en ogañu el territoriu la comunidá autónoma d'Asturias, enque está a trebajal por mé la colavoración con otras organizacionis del dominiu lingüísticu astul-leonés enos territorius ondi l'asturianu o astul-leonés es lengua propia.

Esta associación precura por espacius de normalidá pala lengua asturiana por mé d'acionis concretas que le premita allegal a acordanças con entidais de toa crassi que supongan assental el gastu l'asturianu en andaris nuevus. Precura, velaquí, consensus i acordanças a tentu l'usu la idioma, peru tamién dan en campañas revindicativas enas situacionis que huera mestel.

Ojetivus

Meneal a la sociedá asturiana pol huturu la idioma, luziendu el conflitu lingüísticu.
Arrecuperal pal asturianu l'espaciu central comu lengua común de tolas pressonas d'Asturias i de tol dominiu lingüísticu astul-leonés.
Ahinchonal i colavoral con campañas de normalización lingüística.
Acostodial el cumprimientu la legislación lingüística vigenti, defendiendu los derechus los palrantis embilmaus.
Briegal pala oficialización de tol corpus toponímicu tradicional asturianu, vegilandu'l el gastu que hazin d'él las estitucionis i impresas.
Barajal el cumprimientu las políticas lingüísticas comprometías, lo mesmu que ahinchonal unus graus mayoris de compromissu lingüísticus d'estitucionis i otras entidais.
Acimal la colavoración entre organizacionis de tol dominiu lingüísticu pa general una concencia ciudadana a tentu l'unidá la idioma i trebajal pa cedel ojetivu comunis.
Internacionalizal la conocencia la idioma i del conflitu lingüísticu por mé d'acionis colturalis i de denuncia entre los organismus estatalis i internacionalis dela situación inregulal que vivin los ciudadanus asturianus eno que toca ala custión lingüística. Amás de trebajal con otras comunidais lingüísticas con situacionis aparecías en qualquiera sitiu del mundu.
Acimal una reconocencia assoluta l'asturianu comu lengua oficial en tol territoriu asturianu i junta'l eonaviegu o a fala ena haça correspondienti, amás de colavoral paque esta reconocencia s'arcanci velaquí tamién enos demás territorius ondi l'asturianu es lengua propia.
Recramal un estatus jurídicu d'oficialidá pal asturianu drentu los organismus uropeus.

Atijus