Leifr Eiríksson

Dendi Güiquipeya
Nesta página se gasta una ortografía destinta ala que normalmenti se gasta ena Güiquipedia.
Estauta de Leifr Eiríksson en St. Paul en Minnesota enos Estáus Uníus

Leif Eriksson o Leifr Eiríksson nació nel añu 970 y murió en 1020. Jue un esploraol viquingu, con grandi nombrería por mé del su viaji pa América

Nació en Islandia. Hiju del esploraol noruegu Erik el coloráu, acontinó cona tarea de colonización jaddia 'l ponienti qu'esmenzó su pairi. Arreol del añu 1000, ditándussi polos relatus del comecianti Bjarni Herjólfsson, tiró pal ponienti y passó un iviernu pa una tierra que llamó Vinlandia y que descrebió contandu que tenía abondu de salmonis y pastus. El campamentu sería el primel assentamientu uropéu en América, quinientus añus antis que Cristoba Colón llegara pallí. El su hermanu Thorvald Eriksson jue el primel uropéu en tenel contactu con amerindius, y tamién la primel vítima d'ellus. El campamentu, Leifbundir, estaba assitiáu pal estremu norti de la isla de Terranova, nel sitiu conocíu hogañu comu L'Anse aux Meadows, y duró unas pocas de décadas namás antis que lo albandonaran, por mé de lo pegochus que se pusun los indígenas y los ataquis continus que padecían los colonizaoris.