Pedro de Valdivia
Pedro de Valdivia (Villanueva dela Serena, Estremaúra, 17 d'abril de 1497 - Tucapel, Governación de Chili, 25 de diziembri de 1553) hue un milital i conquistaol estremeñu al serviciu dela Monarquía Hispánica.
Endespués de participal en varias campañas militaris n'Uropa, Valdivia viajó p'América, i hormó parti del exércitu de Francisco Pizarro, governaol del Perú. Col títulu de tenienti governaol otorgau por Pizarro, Valdivia lideró la Conquista de Chili a partil de 1540. Comu tal, hue hundaol delas ciais más antiguas del país, encruyendu la capital Santiagu en 1541, La Serena (1544), Concepción (1550), Valdivia (1552) i La Imperial (1552). Amás, dispusu la hundación delas ciais de Villarrica i Los Confines (Angol).
En 1541 recibió delos sus compañerus conquistaoris organizaus nun cabildu, el título de Governaol i Capitán General del Reinu de Chili, huendu'l primeru n'ostental dichus cargus. Endespués de contenel la resistencia indígena i angunas conspiracionis ena su contra, regresó al Virreinatu del Perú en 1548, ondi Pedro dela Gasca le confirmó el títulu. Golvió a Chili, i inició la llamá Guerra d'Araucu contra los machupis, ena qual murió en 1553 ena batalla de Tucapel.