Poipa

Dendi Güiquipeya
Ir a la navegación Ir a la búsqueda
Poipa
 (Upupa epops)
Poipa
Otrus nombris: Bobilla, popa, pupi, paticarrera, boguilla
Destribución
Destribución de Poipa
Crassificación científica
Reinu
Animalia
Filu
Cordata
Crassi
Avis
Ordin
Coraciiformis
Familia
Upupidae
Géneru
Upupa
Especii
Upupa epops
Autol
Linaeus, 1758
Estau de conservación
Conservación dePoipa

La poipa [ˈpoi̯pa] (nom. cient. Upupa epops) es el únicu biembru dela familia delos upúpidus. Es un'avi del grandol duna mielra que se destaca polos coloris i el moñu que alça.

Sinonimia[eital | eital coigu]

La poipa tamién es mu conocía por quasi que tol territoriu estremeñu con el nombri de bobilla. Los machus tienin los nombris de poipu i bobillu. Dambus dos nombris, poipa i bobilla, dimanan del latinu upupa.

Morfología[eital | eital coigu]

Midi de media 28 dendi la punta'l picu ata'l rabu. Las alas se señalan pol debuju de bandas brancas i negras. El moñu la cabeça que puei alçal i abril midi pa 6 cm i las sus prumas del mesmu colol que'l pescueçu i el pechu, pardas, tienin las puntinas brancas i negras. El rabu es negru, con una banda branca ancha nel últimu cachu. El restu del cuerpu es pardu claru.

La poipa i el poipu son comparantis. Las hembras son más chiquinas que los machus i tienin un colol más mati.

Comportamientu[eital | eital coigu]

En volandu, se destinguin por hazé-lu a talluscus, volandás largas con cortas.

En cantandu, el son que has es el que le da nombri (pu, pu, pu o bu, bu, bu) que repiti a entrevalus. Tien otrus cantíus comu los que has d'alarma o en estuviendu nel níu. Con el largu picu tamién puein hazel el gaspachu quandu están caldíus.

Poipa a cogel el ceviqui

Vivin en sitius llanus o endulaus delas arias templás, secas con arvolau no mu abondosu i vegetación rala. Suelin vel-si en el llanu en sitius de hesa, olivus o de cautivu en cata de bichus grandis comu grillus, escaravajus. Tamién comin cocus i más ralu miñocas o morgañus. Son escapás de comel lagartinus i uevus d'otras avis.

Las poipas s'emparejan estacionalmenti. Quandu hazin los machus la ruea, pegan unus carpíus con el moñu encrestillau. Quandu la hembra s'acerca, l'ofreci alimentu i la sigui duranti vuelus largus. El machu pisa la hembra nel llanu. Los níus, que antis ya asseñaló el sitiu con carpíus la hembra, los hazin enos árvolis, enas raízis, en buracus delas parelis o mesmu na tierra.

La puesta es anual, enque angunas pobracionis de poipas más baxeras puein hazel una segunda puesta. Ponin entre 5 i 7 uevus azulinus o verdinus pintorreaus. Duranti la hembra esté echá, el poipu s'encarga de trael el ceviqui al níu. Los uevus precisan de más de dos semanas p'abril, enque sigún aiga hechu la puesta, angunus precisan de ata 25 días.

Esparramamientu[eital | eital coigu]

Enque sea un'avi mu destendía por toa Uropa, bien reprodutora ata metá del sigru passau, fatoris comu las demuacionis, es esgalaçu delos biotopus i las curas gastás ena agricoltura hizun que'l aria de cría i vida se amenuyera muchu. Mesmu en Alemaña, Austria i Suíça está drentu delas especiis amenazás.

La poipa ena coltura estremeña[eital | eital coigu]

Esta avi tradicionalmenti s'á dichu que chera mal i s'á teníu mal considerá. Por essu son corrientis los dichus hedel más que una bobilla, hedel más que una poipa o golel a poipu.