Pokémon
.jpg)
Pokémon es una saga multimeya que encetó nel añu 1995 col lanzamientu xaponés delos videoxuegus Game Boy Pokémon Coloráu i Pokémon Verdi (Orixinalmenti, Pocket Monsters: Red i Pocket Monsters: Green respeutivamente), los cualis llegarían dos añus endispués a América canteyaus en ingrés i con pulas i múas adicionalis baxu'l nomi Pokémon Red Version i Pokémon Blue Version i en 1999 a Uropa i Oceanía en deferentis luengas, incruyendu'l castellanu nel casu d'España, ondi recibirían la denomación de Pokémon Edición Roja i Pokémon Edición Azul. Oguañu se trata d'una las marcas con más nombrayía'l mundu i la saga de videoxuegus más grandi, biendu vendíu los sus títulus en conxuntu 368 millonis de copias ata oi.
Enque e mu anombrá polos sus xuegus, dessistin to tipu de produtus pretenecientis ala marca Pokémon: cartas coleicionablis, cacharritus, peluchus, pañus i otrus tipus d'achiperris comparantis. Amás, tien una seri d'animación que dendi 1997 tien emitías 23 rentonás cun total de 1000 episoyus.
La su criyación[Edital | Editá'l códigu]
La nacenica[Edital | Editá'l códigu]
La criyación el conceutu "Pokémon" hue dessenroá por Satoshi Tayiri (En xaponés, 田尻 智) por mó delas vivencias que tuvu de zagal chicu caçandu i axuntandu cocus nela alamea la ciá ena que passó la su moceá. Prencipiandu'l añu 1990, en tar delantri unus rapazis xugandu alas sus Game Boy, las esperiencias estas le hizun maxinar insseutus viaxandu por mé del Cordón Link que uñía dambas, lo que derivó nuna ideya dun xuegu nel que se puyeran caçar creaturas i entrecambia-las colos xugaoris que tamién lo tuvieran.
Nessi mesmu añu, pressentó el su conceutu ala compañía videoxuegus Nintendo, quienis alo primeru açabucarun ena su arrancaera, peru alogu decidirun de dar lus verdi al proyeutu. Satoshi tuvu a trebajar col su equipu los siguientis 6 añus cola ayúa de Shigeru Miyamoto, diseñaor de videoxuegus talis comu Super Mario o The Legend Of Zelda. Endispués de probremas abondu i aconteceris que quassi rematan cola cancelación assoluta'l proyeutu, Pocket Monsters: Red i Pocket Monsters: Green huerun lanzaus al púbricu xaponés pala consola Game Boy.
El dessenróu Pokémon Coloráu i Pokémon Verdi[Edital | Editá'l códigu]
El dessenróu delos xuegus primerus hue aviau pola empressa Game Freak, una chiquenina desenroaora de videoxuegus creyá por Satoshi Tayiri que esmençó los sus andaris hiziendu xuegus pa NES i Game Boy. El proyeutu esti prencipió pal 1990 cun equipu duna puñá chica de trebaxaoris, encruyendu'l propriu Tayiri i Yunichi Masuda, quien trebaxó comu componeor musical i programaor.
El xuegu tuvu criyándu-si al reor delos seis añus. En ser preguntau pol processu de cryación, Masuda, autual direutor la saga, dixu:
"Nun entamu, éramus entovía una empresa nueva abondu. Aviamus namás unas poquinas pressonas, ansí que, obiamenti, non aviamus títulus sonaus abondu en Game Freak. Queriamus de hazer xuegus que quixeramus, comu biembrus el equipu, xuegar mesmu mussotrus. Al empar precissabamus haze-lu comu compañía. (...) Teniamus de segura-mus, tamién, que Pokémon huessi un gran çucessu."
Alogu acontina:
"Non hue siempri un dessenróu cenziellu. (...) Puímus acontinar en hiziendu xuegus pa sotras compañías alo longu'l camín mentris, al empar, biembrus que querían de trebaxar en Pokémon nel su tiempu libri delos sotrus proyeutus imprementaban las sus ideyas por mé de tóa la su enerxía creativa nel xuegu"
El proyeutu tuvu cargau de non pocus marrus i compricazionis. Masuda lo escuenta asina:
"Creyu que la (esperienzia) más memorabli que entovía e nel pensamientu endispués tos estus añus e que musotrus desenroabamus los xuegus estus enas estazionis Unix que mientan Sun SPARCstation 1 (...) que erraban abondu. Al reor dela metá'l proyeutu, quiciás ya pal quartu añu, uvimus un erru orrorossu que non sabiamus cómu endilgar. (...) Palréi con xenti cona que enxamás palréi, leín librus en ingrés a tientu la propria máquina, to pa poer endilga-la. Pala postri averiguamus cómu hazelu, peru essi hue'l intri de más axinaera, creyu, nel desenróu. "
En pensar de to, los xuegus puyerun ser acompretaus i se lanzorun al mercáu el 27 hebreru 1996. Más alantri passarían a ser coñozíus non namás por aver emprenicpiáu la saga, sinon tamién polos sus numberossus errus de pogramación.
Saga prencipal de xuegus[Edital | Editá'l códigu]
Se mientan prencipalis alos xuegus que cumpartin las mecánicas essencialis encetás con Pokémon Coloráu i Pokémon Verdi i/o que poseyin unas de continación direuta con estas. Cuandu deferentis xuegus lanzaus próssimamenti tienin las mesmas carauterísticas xeneralis, nun supuestu, compartin rexión, los sus gráficus sonin comparantis i/o poseyin las mesmas grandis noveás pala saga se dizi que horman parti la mesma xeneración. Ca golpi que nuevas creaturas, mecánicas o rexionis sonin entroducías, se avança ala siguienti. Ata oi, la saga prencipal tien teníu 8 xeneracionis.
Primera xeneración[Edital | Editá'l códigu]
Prencipió col lanzamientu xaponés de Pokémon Coloráu i Pokémon Verdi el 27 la candelaria 1996 i remató col lanzamientu uropeu de Pokémon Amarillu el 16 el samartín 2000.
Pokémon Coloráu i Verdi[Edital | Editá'l códigu]
Pokémon Amarillu[Edital | Editá'l códigu]
Segunda xeneración[Edital | Editá'l códigu]
Prencipió col lanzamientu xaponés de Pokémon Oru i Pokémon Prata el 21 los tossantus 1999 i remató col lanzamientu uropeu de Pokémon Cristal el 2 los tossantus 2001.
Tercera xeneración[Edital | Editá'l códigu]
Prencipió col lanzamientu xaponés de Pokémon Rubí i Pokémon Çafiru el 21 los tossantus 2002 i remató col lanzamientu uropeu de Pokémon Esmeralda el 21 outubri 2005.
Cuarta xeneración[Edital | Editá'l códigu]
Prencipió col lanzamientu xaponés de Pokémon Diamanti i Pokémon Pelra'l 28 el samiguel 2006 i remató col lanzamientu uropeu de Pokémon HeartGold i Pokémon SoulSilver el 26 marçu 2010.
Quinta xeneración[Edital | Editá'l códigu]
Prencipió col lanzamientu xaponés de Pokémon Brancu i Pokémon Prietu'l 18 el samiguel 2010 i remató col lanzamientu uropeu de Pokémon Brancu 2 i Pokémon Prietu 2 el 12 outubri 2012.