Praenomen

Dendi Güiquipeya

El praenomen (del latín prae, nomen "prenombri") enas convencionis el nombraeru los romanus era el nombri pila. Era el primel de los tres nombris que se compón el nombraeru latinu, hunta el nomen i el cognomen.

El repertóriu los praenomina romanus era mu acutainu, unus 40, anque dellus 17 son los mas freqüentis. Assinque quasique siempri diba abreviau, especialmenti enas escricionis u enas obras literárias andi se quiria refrehal. Los prencipalis praenomina masculinus i las sus abreviaturas son velaquí las siguientis:

  • Appius: Ap.
  • Aulus: A.
  • Decimus: D.
  • Flauius: Fl.
  • Gaius: C.
  • Gnaeus: Cn.
  • Lucius: L.
  • Manius: M'.
  • Marcus: M.
  • Publius: P.
  • Quintus: Q.
  • Seruius: Ser.
  • Sextus: Sex.
  • Spurius: Sp.
  • Tiberius: Ti.
  • Titus: T.

Praenomina cumu Primus, Secundus, Tertius, Quartus, Quintus, Sextus, Septimus, Octauius i Decimus (cuyus angunus sobrivivin cumu Segundu u Otáviu) en orihin mentaban al ihu varón sigún el ordin en que nacia, anque tamién pia hazel referéncia al mes la su nacéncia.

Los praenomina Gaius i Gnaeus cuentan conas abreviaturas C. i Cn. arcaica al respetivi, andi nu se deferenciaban ena primitiva ortografia entri oclusivas sordas i sonoras pol mó la enfruyéncia etrusca. Assinque la trascrición correta destus nombris nu es *Cayu ni *Cneu, sinu Gayu i Neu.

El nomen Aurelius de la gens Aurelia a partil el emperaol Marcu Uréliu se heneralizó cumu praenomen. Lo mesmu aconteceria con nomina cumu Iulius u Augustus mas tardinu.